గండికోటలో ఒబెరాయ్ హోటల్ ,,,,శంకుస్థాపన చేసిన సీఎం జగన్

ఒబెరాయ్ హోటల్ ఏర్పాటుతో గండికోటను ప్రపంచానికి పరిచయం చేయబోతున్నామని ఏపీ సీఎం జగన్మోహన్ రెడ్డి అన్నారు. వైఎస్సాఆర్ జిల్లా జమ్మలమడుగు మండలంలోని ప్రముఖ పర్యాటక కేంద్రం గండికోటలో పర్యటించిన సీఎం.. ఒబెరాయ్‌ హొటల్‌ నిర్మాణ పనులకు శంకుస్థాపన చేశారు. భవన నిర్మాణానికి భూమి పూజ చేశారు. తిరుపతి, విశాఖల్లో నిర్మిస్తున్న ఒబెరాయ్ హోటల్స్‌కు అక్కడి నుంచే వర్చువల్‌గా శంకుస్థాపన చేశారు. అనంతరం ఏర్పాటు చేసిన సభలో ప్రసంగించిన సీఎం.. ఒబెరాయ్‌ గ్రూప్‌ హోటల్స్‌ ఏపీలో పెట్టుబడులు పెట్టడం శుభపరిణామన్నారు. స్టార్‌ గ్రూపుల రాకతో గండికోటను టూరిజం మ్యాప్‌లోకి తీసుకెళ్తామన్నారు. హోటల్స్‌ నిర్మాణం వల్ల ఈ ప్రాంతం అభివృద్ధి చెందటంతో పాటు స్థానికులకు కూడా ఉపాధి లభిస్తుందని చెప్పారు.

గండికోట అంతర్జాతీయ మ్యాప్‌లోకి వెళ్తుందని..ఇక్కడకు మరో స్టార్‌ గ్రూప్‌ను కూడా తీసుకొస్తామని చెప్పారు. గండికోటలో ఒబెరాయ్ సంస్థ గోల్ఫ్‌ కోర్టు పెట్టే యోచనలో ఉన్నట్లు చెప్పారు. రేపు (సోమవారం) కొప్పర్తిలో డిక్సన్‌ పరిశ్రమ ప్రారంభించబోతున్నామని.. ఈ కంపెనీ ద్వారా మరో వెయ్యి మందికి ఉద్యోగాలు లభిస్తాయన్నారు. కొప్పర్తిలో పలు కంపెనీలతో రేపు ఎంవోయూలు చేసుకుంటామని వెల్లడించారు. జులై 15 తర్వాత అన్ని రకాల అనుమతులు వస్తాయన్నారు. ఛానెల్‌ ప్లే, టెక్నో ఇండియా కంపెనీలతోనూ రేపు కడపలో ఎంవోయూ కుదుర్చుకుంటామన్నారు. త్వరలో కడప స్టీల్‌ఫ్యాక్టరీకి ఎన్విరాన్మెంట్‌ క్లియరెన్స్‌ రాబోతుందని సీఎం జగన్ వెల్లడించారు. శంకుస్థాపన అనంతరం అక్కడ ఏర్పాటు చేసిన ఫొటో ఎగ్జిబిషన్‌ను సీఎం జగన్ తిలకించారు. ఈ కార్యక్రమంలో ఒబెరాయ్‌ హొటల్స్‌ ఎండీ, సీఈవో విక్రమ్‌ ఒబెరాయ్‌, పలువురు మంత్రులు, ఎంపీలు, ఎమ్మెల్యేలు పాల్గొన్నారు.