ఢిల్లీలో రెండు దశాబ్దాల తర్వాత అత్యదిక వర్షం,,,రాజస్థాన్‌లోని 9 జిల్లాలకు రెడ్ అలర్జ్ జారీ
national | Suryaa Desk | Published : Sun, Jul 09, 2023, 09:13 PM
రాబోయే కొద్ది రోజులు ఉత్తర భారతంలో భారీ వర్షాలు కురుస్తాయని భారత వాతావరణ విభాగం (IMD) హెచ్చరించింది. ఢిల్లీ, హరియాణా, హిమాచల్ ప్రదేశ్, ఉత్తరాఖండ్, రాజస్థాన్, పంజాబ్, జమ్మూ కశ్మీర్‌లో భారీ నుంచి అతిభారీ వర్షాలు కురుస్తాయని పేర్కొంది. ఉత్తరాది మీదుగా వీస్తున్న పశ్చిమ పవనాల ప్రభావంతో గత రెండు రోజుల నుంచి భారీ వర్షాలు కురుస్తున్నాయి. శనివారం పలు రాష్ట్రాలను భారీ వర్షాలు ముంచెత్తాయి. దీంతో పలుచోట్ల రహదారులు జలమయమై... లోతట్టు ప్రాంతాలు మునిగాయియి. ఇక, దేశ రాజధాని ఢిల్లీలో అత్యధికంగా 126.1 మిల్లీమీటర్ల వర్షపాతం నమోదైంది.
ఢిల్లీలో ఈ స్థాయిలో వర్షం కురవడం గత 20 ఏళ్లలో ఇదే మొదటిసారి. చివరిసారి 2003లో జులై 10న 133.4 మిల్లీమీటర్లు కురిసిందని ఐఎండీ తెలిపింది. ఆదివారం కూడా భారీ వర్షాలు కురిసే అవకాశం ఉందని ఎల్లో అలర్ట్ జారీ చేశారు. శనివారం కురిసిన భారీ వర్షానికి ఇంటి సీలింగ్ కూలి ఓ 58 ఏళ్ల వ్యక్తి మృతిచెందాడు. హిమాచల్ ప్రదేశ్‌లో వర్షాలు బీభత్సం సృష్టించాయి. దీంతో వాహనాలు, రైళ్ల రాకపోకలకు తీవ్ర అంతరాయం కలుగుతోంది. ఇప్పటికే ఆ రాష్ట్రంలోని ఏడు జిల్లాలకు రెడ్ అలర్ట్ ప్రకటించారు. బియాస్ నది ఉప్పొంగి ప్రవహిస్తోంది. కొన్ని చోట్ల రైల్వే ట్రాక్‌లను వరద నీరు ముంచెత్తింది. మనాలి- లెహ్‌ రహదారిని మూసివేశారు.
అటు, రాజస్థాన్, హరియాణా, జమ్మూ కశ్మీర్‌, ఉత్తర్‌ప్రదేశ్‌, పంజాబ్‌లలోనూ వర్షాలు జనజీవనాన్ని అతలాకుతలం చేశాయి. ఎడతెరిపి లేకుండా కురుస్తున్న వర్షాల కారణంగా అమర్‌నాథ్‌ యాత్రను కూడా నిలిపివేశారు. జమ్మూ- శ్రీనగర్ జాతీయ రహదారిపై ఓ చోట రోడ్డు కుంగిపోవడంతో వాహనాల రాకపోకలు ఆపేశారు. దీంతో 3,000 వరకూ లారీలు, ట్రక్కులు నిలిచిపోయాయి. రాజస్థాన్‌లో వర్షాల కారణంగా గడచిన 24 గంటల్లో నలుగురు మృతి చెందారు. మరోవైపు, రాజ్‌సమద్, జలోర్, పాలీ, అజ్మేర్, అల్వార్, బన్స్వారా, భరత్‌పూర్, భిల్వారా, బుండీ, చిత్తోర్‌గఢ్, దౌసా, ధోల్‌పూర్, జైపూర్, కోటా సహా 9 జిల్లాల్లో ఆదివారం అతి భారీ వర్షాలు కురుస్తాయని ఐఎండీ తెలిపింది.
కర్ణాటక, కేరళల్లోనూ భారీ వర్షాలు కురుస్తున్నాయి. కేరళలోని కోజికోడ్, వాయనాడ్, కన్నూర్, కాసర్‌గోడ్ జిల్లాలకు ఐఎండీ ఎల్లో అలర్ట్ జారీచేసింది. భారీ వర్షాల కారణంగా హరియాణ, పంజాబ్‌లో ఉష్ణోగ్రతలు సాధారణ కంటే తక్కువకు పడిపోయాయి. చండీగఢ్‌లో శనివారం ఉదయం నుంచి రాత్రి వరకూ వర్షం కురుస్తూనే ఉంది.
|
|