ఉత్తర భారతాన్ని వణికిస్తున్న కుండపోత వానలు,,,ప్రమాదకర స్థాయిని మించి ప్రవహిస్తున్న యమునా నది

కుండపోత వర్షాలు ఉత్తర భారతాన్ని తీవ్రస్థాయిలో వణికిస్తున్నాయి. ఎడతెరిపి లేకుండా కురుస్తున్న వానలకు నదులు, వాగులు, వంకలు పొంగి పొర్లి ప్రవహిస్తున్నాయి. ఈ నేపథ్యంలోని యమునా నదిలో ప్రవాహం.. డేంజర్ బెల్స్ మోగిస్తోంది. ఎగువ రాష్ట్రాల్లో కురుస్తున్న వర్షాలకు.. అక్కడి ప్రాజెక్టులు నిండిపోవడంతో అధికారులు ముందస్తు చర్యల్లో భాగంగా నీటిని దిగువకు వదులుతున్నారు. ఈ క్రమంలోనే యమునా నదికి వరద పోటెత్తుతోంది. ఈ క్రమంలోనే అధికారులతో ఢిల్లీ ముఖ్యమంత్రి అరవింద్ కేజ్రీవాల్ ఉన్నత స్థాయి సమీక్ష నిర్వహించారు. ఎలాంటి పరిస్థితులు ఎదురైనా తట్టుకునేలా అన్ని పటిష్ఠ చర్యలు చేపట్టినట్లు వివరించారు.

భారీ వర్షాలతో ఉత్తరాది రాష్ట్రాలు తీవ్ర ఇబ్బందులు పడుతున్నాయి. ముఖ్యంగా దేశ రాజధాని ఢిల్లీని ఎడతెరిపి లేని వానలు ఉక్కిరి బిక్కిరి చేస్తున్నాయి. దీంతో యమునా నది తీవ్ర స్థాయిలో ఉప్పొంగి ప్రవహిస్తోంది. దీంతో ఢిల్లీకి వరద ముప్పు పొంచి ఉందన్న హెచ్చరికలు వినిపిస్తున్నాయి. ప్రమాదకర స్థాయిని మించి యమునా నది ప్రవహిస్తుండటంతో ఢిల్లీ ప్రభుత్వం, అధికారులు చర్యలు చేపట్టారు. ఈ క్రమంలోనే ఢిల్లీ ముఖ్యమంత్రి అరవింద్‌ కేజ్రీవాల్‌ అధికారులతో అత్యవసర భేటీ ఏర్పాటు చేశారు. ఈ సమావేశం తర్వాత మీడియాతో మాట్లాడిన కేజ్రీవాల్.. భారీ వానల పట్ల అప్రమత్తంగా ఉన్నామని.. ఎలాంటి పరిస్థితి ఎదురైనా ఎదుర్కొనేందుకు సిద్ధంగా ఉన్నట్లు చెప్పారు. అయితే ఇప్పటికి మాత్రం ఢిల్లీకి వరద ప్రభావం ఉండే పరిస్థితి లేదని అన్నారు.

యమునా నదిలో నీటి ఉద్ధృతి పెరగడంతో కేంద్ర జల కమిషన్‌ను సంప్రదించామని కేజ్రీవాల్ తెలిపారు. ప్రస్తుతానికి ఢిల్లీకి వరద ముప్పు వచ్చే పరిస్థితులు లేవని నిపుణులు అంచనా వేసినట్లు చెప్పారు. అయితే ఎలాంటి పరిస్థితులు ఎదురైనా వాటికి అనుగుణంగా పనిచేసేందుకు అధికార యంత్రాంగం పూర్తి సంసిద్ధంగా ఉందని వెల్లడించారు. యమునా నదిలో నీటి మట్టం 206 మీటర్లు మించితే.. నదీ పరిసరాల్లోని లోతట్టు ప్రాంతాల్లో ఉన్న ప్రజలను ఖాళీ చేయించి సురక్షిత ప్రాంతాలకు తరలిస్తామని పేర్కొన్నారు. ప్రమాదాలు జరగకుండా రోడ్లపై ఏర్పడిన గుంతలను పూడుస్తున్నట్లు తెలిపారు. ఇటీవల ఢిల్లీలో రోడ్లు కుంగిన ఘటనలపై తాము విచారణకు ఆదేశించినట్లు కేజ్రీవాల్ వెల్లడించారు. ఢిల్లీకి వరద పోటెత్తవచ్చన్న అధికారుల హెచ్చరికలతో అధికార యంత్రాంగం అలర్ట్ అయ్యింది. ఈ మేరకు ఢిల్లీ మంత్రి ఆతిషి.. యమునా నది పరిస్థితిని ఎప్పటికప్పుడు పర్యవేక్షిస్తున్నారు. ఇప్పటికే 16 కంట్రోల్‌ రూమ్‌లను ఏర్పాటు చేసినట్లు చెప్పారు. క్విక్‌ రెస్పాన్స్‌ టీమ్‌, బోట్లను అందుబాటులో ఉంచినట్లు తెలిపారు.

ఎడతెరిపి లేకుండా కురుస్తున్న వానలతో హరియాణాలో ఉన్న హతనికుంద్‌ బ్యారేజ్‌ నుంచి అధికారులు నీటిని దిగువకు విడుదల చేశారు. దీంతో యమునా నదిలో నీటి ఉద్దృతి పెరుగుతోందని అధికారులు చెబుతున్నారు. సోమవారం మధ్యాహ్నం ఒంటి గంట వరకు ఢిల్లీలోని పాత రైల్వే బ్రిడ్జ్‌ వద్ద ఉన్న యమునా నదిలో నీటిమట్టం 204.63 మీటర్లకు చేరినట్లు అధికారిక గణాంకాలు చెబుతున్నాయి. అయితే యమునా నది డేంజర్ అలర్ట్‌ 204.5 మీటర్లను ప్రస్తుతం వరద దాటిందని చెప్పారు. మంగళవారం మధ్యాహ్నం 12 గంటల వరకు యమునా నదిలో ప్రమాదకర స్థాయి 205.33 మీటర్లను దాటి 205.5 మీటర్లకు పెరిగే అవకాశం ఉందని అధికారులు అంచనా వేస్తున్నారు.