ఐఏఎస్‌కు ఎంపికయ్యాడు కానీ,,, రాజీనామా చేసి సొంత సంస్థ ఏర్పాటు

‘సివిల్ సర్వీసెస్’‌కు ఎంపిక కావడం దేశంలో చాలా మంది యువతకు ఒక కల. ఇందుకోసం అనేక ఏళ్లు తపస్సు చేస్తుంటారు. కానీ, ఓ యువకుడు మాత్రమే 22 ఏళ్లకే సివిల్స్‌లో ఉత్తీర్ణత సాధించి నేరుగా ఐఏఎస్‌కు ఎంపికయ్యాడు. కానీ, అతడికి అది సంతృప్తినివ్వలేదు. కలెక్టర్‌గా కొన్ని రోజుల పనిచేసిన అతడు.. తనకు సరిపడదని గ్రహించి రాజీనామా చేశాడు. స్నేహితులతో కలిసి ఒక ఎడ్-టెక్ సంస్థను స్థాపించి, అంచెలంచెలుగా రూ.2,600 కోట్ల విలువైన కంపెనీగా తీర్చిదిద్దాడు. అతడే రాజస్థాన్‌కు చెందిన రోమన్‌ సైనీ.

16 ఏళ్ల వయసులోనే ప్రతిష్ఠాత్మక ఎయిమ్స్‌ ఎంట్రన్స్ టెస్ట్ రాసి అర్హత సాధించి.. ఎంబీబీఎస్‌లో చేరాడు. మెడిసిన్ పూర్తయిన తర్వాత ఆరు నెలల పాటు ఎయిమ్స్‌లోని నేషనల్ డ్రగ్ డిపెండెన్స్ ట్రీట్మెంట్ సెంటర్ (ఎన్‌డీడీటీసీ)లో ఆరు నెలల పాటు పనిచేశాడు. ఇందులో భాగంగా మెడికల్ క్యాంపుల కోసం గ్రామాలకు వెళ్లేటప్పుడు అక్కడ పేదల పరిస్థితి చూసి చలించిపోయేవాడు. వారికి ఆరోగ్యం, పరిశుభ్రత, మంచి నీళ్లపై సరైన అవగాహన లేదని సైనీ గుర్తించాడు. వైద్య వృత్తిలో ఉంటూ వారి సమస్యలను పరిష్కరించడం కష్టమని తెలుసుకున్నాడు.

ఈసారి తన లక్ష్యం సివిల్స్ అని భావించి, ఆ ఉద్యోగాన్ని వదులుకుని.. యూపీఎస్సీకి సిద్ధమయ్యాడు. అత్యంత క్లిష్టమైన సివిల్స్‌ను మొదటి ప్రయత్నంలోనే 22 ఏళ్ల వయసుకే సాధించి ఐఏఎస్‌గా ఎంపికయ్యాడు. మధ్యప్రదేశ్‌లో జిల్లా కలెక్టర్‌గా పనిచేసిన సైనీకి ఆ ఉద్యోగం తనకు సరిపడదని గ్రహించాడు. కలెక్టర్‌గా ఉన్న సమయంలోనే తన స్నేహితులు గౌరవ్‌ ముంజాల్‌, హిమేశ్‌ సింగ్‌లతో కలిసి యూట్యూబ్‌లో సివిల్‌ సర్వీసెస్‌కు కోచింగు ఇవ్వాలని రోమన్‌ సైనీ నిర్ణయించుకున్నారు. ‘అన్‌ అకాడమీ’ అనే యూట్యూబ్ ఛానల్‌ ప్రారంభించి, సివిల్స్‌కు సన్నద్ధమయ్యే యువతకు ఉచితంగా పాఠాలు బోధించారు. దేశవ్యాప్తంగా దీనికి మంచి స్పందన రావడంతో ఆ ఛానల్‌ కాస్తా ‘అన్‌ అకాడమీ’గా మారింది. వివిధ పోటీ పరీక్షల ఆన్‌లైన్‌ శిక్షణలతో ఈ కంపెనీ నేడు రూ.2,600 కోట్ల సంస్థగా ఎదిగింది.

కోచింగ్ కోసం లక్షలు ఖర్చు చేయాల్సిన అవసరం లేకుండా అందుబాటు ధరల్లోనే శిక్షణను అందుబాటులోకి తీసుకొచ్చారు. మొదట్లో ఈ అకాడమీ ద్వారా యూపీఎస్కి మాత్రమే శిక్షణ ఇచ్చేవారు. ప్రస్తుతం మెడికల్, ఇంజినీరింగ్, స్కూల్ ఎడ్యుకేషన్ వంటి వాటికి కూడా విస్తరించారు. ప్రస్తుతం ఈ ఎడ్‌టెక్ కంపెనీ వార్షిక టర్నోవర్ రూ.15 వేల కోట్లకు దాటడం విశేషం. అన్ అకాడమీ ఏర్పాటుకు సీఈఓగా ఉన్న గౌరవ ముంజాల్ రూ.1.58 కోట్లు, హిమేశ్ సింగ్ రూ.1.19 కోట్లు, రోమన్ సైనీ రూ.88 లక్షల పెట్టుబడి పెట్టారు.