టీడీపీ కాకపోయినా లోకేష్ అంటే అభిమానం,,,,బండ్ల గణేష్ ట్వీట్

టీడీపీ జాతీయ ప్రధాన కార్యదర్శి నారా లోకేష్‌కు నటుడు, నిర్మాత బండ్ల గణేష్ ఆల్ ది బెస్ట్ చెప్పారు. యువగళం పాదయాత్ర 2వేల కిలోమీటర్ల మైలు రాయిని చేరుకోవడంపై గణేష్ ట్విట్టర్ వేదికగా స్పందించారు. 'నిజంగా నేను మీరు 200 కిలోమీటర్లు కూడా పాదయాత్ర చేయరు అనుకున్నా.. ఏదో ఒక సాకు చెప్పి ఆపేస్తారని ఊహించుకున్నా.. కానీ నేను అనుకున్నది తప్పు. చాలా ఆనందం ఇచ్చింది మీరు 2000 కిలోమీటర్లు పాదయాత్ర పూర్తి చేయడం, నాకు మీ పార్టీతో సంబంధం లేదు కానీ మీరంటే అభిమానం.. ఆల్ ది బెస్ట్ మిస్టర్ లోకేష్' అంటూ ట్వీట్ చేశారు.

బండ్ల గణేష్‌ ట్వీట్‌పై తెలుగు తమ్ముళ్లు స్పందిస్తున్నారు.. గణేష్‌కు థ్యాంక్స్ చెబుతున్నారు. అంతేకాదు లోకేష్ పాదయాత్ర ప్రారంభమయ్యే ముందు కూడా ఆల్ ది బెస్ట్ చెప్పారు. యువగళం పాదయాత్ర (Yuva Galam) దిగ్విజయం కావాలని ఆకాంక్షిస్తూ దిగ్విజయ ప్రాప్తిరస్తు అంటూ ట్వీట్ చేశారు బండ్లగణేష్. మళ్లీ ఇప్పుడు 2వేల కిలోమీటర్లకు చేరడంతో స్పందించారు. మొత్తానికి బండ్ల ట్వీట్‌ ఇప్పుడు వైరల్ అవుతోంది.

నారా లోకేష్ యువగళం పాదయాత్ర 2వేల కిలోమీటర్లు అందుకుంది. నారా లోకేష్ పాదయాత్ర ప్రస్తుతం నెల్లూరు జిల్లా కావలి నియోజకవర్గంలో 153వ రోజు కొనసాగుతోంది. ఇప్పటి వరకు లోకేష్ పాదయాత్రలో భాగంగా 53 నియోజకవర్గాలు కవర్ చేశారు. అలాగే 135 మండలాలు, 1297 గ్రామాలను దాటుకుని.. ఏకంగా 50 బహిరంగ సభలు, 118 చోట్ల ముఖాముఖి సమావేశాలు జరిగాయి. అలాగే ఆరుచోట్ల ప్రత్యేక సమావేశాలు.. ఐదు చోట్ల రచ్చబండ కార్యక్రమాలు నిర్వహించారు. లోకేష్‌కు టీడీపీ నేతలు, కార్యకర్తలు అభినందనలు తెలియజేస్తున్నారు. నారా లోకేష్ యువగళం పాదయాత్ర 2000 కిలోమీటర్ల కు చేరుకున్న సందర్భం గా శుభాకాంక్షలు తెలుపుతూ టీడీపీ అధినేత చంద్రబాబు నాయుడు ట్వీట్ చేశారు. యువగళాన్ని వినిపిస్తూ, ప్రజల సమస్యలను ప్రస్తావిస్తూ సాగుతున్న పాదయాత్రను చూసి గర్వపడుతున్నాను అన్నారు.

యువగళం పాదయాత్రలో భాగంగా.. తాను పూర్తిచేసుకున్న ప్రతి వంద కిలోమీటర్లకు గుర్తుగా.. అక్కడి ప్రజలకు మేలు చేసే ఒక పథకానికి హామీ ఇస్తూ.. శిలాఫలకం వేసుకుంటూ వెళ్తున్నారు లోకేష్. తెలుగుదేశం పార్టీ అధికారంలోకి రాగానే ఆయా నిర్మాణాలను వెంటనే చేపడతారు. అంతేకాదు స్థానికంగా ప్రజల నుంచి వస్తున్న వినతలుతో పాటుగా వారి సమస్యలను పరిష్కరిస్తానని హామీలు ఇస్తున్నారు. లోకేష్ పాదయాత్ర 400 రోజుల్లో 4వేల కిలో మీటర్ల టార్గెట్‌గా ముందుకు సాగుతోంది.