భర్తకు విడాకులిచ్చింది, మళ్లీ కలిసే ఉంటోంది

భార్యాభర్తలు అన్న తర్వాత గొడవపడటం.. తర్వాత కలిసిపోవడం సహజం. కొన్ని సందర్భాల్లో ఇగోలకు పోయి విడాకులు తీసుకున్న జంటలు ఉంటాయి. ఇలాగే, ఓ మహిళ పెళ్లైన పదిహేనేళ్ల తర్వాత భర్త నుంచి విడిపోయింది. తనను గృహహింసకు గురిచేస్తున్నాడని, అతడితో నేను కలిసి ఉండలేని కోర్టులో విడాకుల పిటిషన్ వేసింది. ఆమెకు విడాకులు మంజూరు చేసిన కర్టు.. మనోవర్తి కింది భర్త నెలకు రూ. 2 వేల చెల్లించాలని ఆదేశాలు జారీచేసింది.

భర్తతో గొడవపడటం, గృహహింస కేసు పెట్టి అతడ్ని అరెస్ట్ చేయించడం.. మళ్లీ కొద్ది నెలల తర్వాత బెయిల్‌‌పై‌ తనే విడుదల చేయించడం. ఇలా ఒకటి రెండు కాదు పదేళ్లలో ఆమె ఏడుసార్లు గృహహింస కేసులతో భర్తను జైలుకు పంపింది. ప్రతిసారీ ఆమె జామీను ఇచ్చి బెయిల్‌పై భర్తను విడుదల చేయిస్తోంది. గొడవపడటం, విడిపోవడం, మళ్లీ కలవడం గత పదేళ్లుగా ఈ దంపతులది ఇదే బాణీ. విచిత్రమైన సంఘటన గుజరాత్‌లో కడిలో వెలుగుచూసింది. వివరాల్లోకి వెళ్తే.. పటాన్‌కు చెందిన ప్రేమ్‌చంద్ మలీకి.. 2001లో మెహసానాకు చెందిన సోనుతో వివాహం జరిగింది. పెళ్లైన తర్వాత ఈ దంపతులు కడిలో కాపురం పెట్టారు.

దశాబ్దానికిపైగా వీరి కాపురం సజావుగానే సాగిపోయింది. ఇద్దరు పిల్లల కూడా పుట్టారు. కానీ, 2014 నుంచి దంపతుల మధ్య మనస్పర్దలు మొదలయ్యాయి. చీటికీ మాటికీ ఇద్దరూ గొడవపడేవారు. ఈ క్రమంలో 2015లో భర్తపై సోను గృహహింస కేసుపెట్టింది. తనను శారీరకంగా, మానసికంగా వేధింపులకు గురిచేస్తున్నాడని ఆరోపించిన ఆమె.. భర్త నుంచి విడాకులు ఇప్పించాలని కోర్టుకెక్కింది. దీంతో విడాకులు మంజూరు చేసిన కోర్టు.. నెలకు రూ.2,000 మనోవర్తి ఇవ్వాలని భర్తను ఆదేశించింది.

ఆమెకు మనోవర్తి చెల్లించడంలో విఫలం కావడంతో కోర్టు అరెస్ట్ వారెంట్ జారీచేసింది. ప్రేమ్‌చంద్‌ను పోలీసులు అరెస్ట్ చేసి జైలుకు పంపారు. ఐదు నెలల పాటు జైల్లో ఉండగా.. ఒక రోజు హఠాత్తుగా సోను బెయిల్ ఇవ్వడానికి ముందుకొచ్చింది. చట్టపరంగా ఇద్దరూ విడిపోయినా.. కలిసుండాలని నిర్ణయించుకున్నారు. కానీ, ఇది మూన్నాళ్ల ముచ్చటే అయ్యింది. ఇద్దరూ తరుచూ గొడవలు పడుతున్నారు.

కేసుకు సంబంధించిన పత్రాల ప్రకారం.. 2016 నుంచి 2018 వరకు ప్రతి సంవత్సరం భార్య సోనును గాయపరిచాడనే ఆరోపణలపై ప్రేమ్‌చంద్ అరెస్టయ్యాడు. ప్రతిసారీ ఆమె జోక్యం చేసుకుని అతడి బెయిల్‌కు ఏర్పాట్లు చేస్తుంది. 2019, 2020లో ప్రేమ్‌చంద్ వేర్వేరు సందర్భాల్లో భరణం చెల్లించడంలో విఫలం కావడంతో జైలుకెళ్లాడు. జైలు నుంచి వచ్చిన తర్వాత మళ్లీ ఇద్దరూ కలిశారు. ఈ ఏడాది ఆరంభంలో భరణం చెల్లింపుల విషయంలో ప్రేమ్‌చంద్ మరోసారి నిర్లక్ష్యంగా వ్యవహరించడం అతడ్ని మళ్లీ కటకటాల వెనక్కి నెట్టింది. సోను మరోసారి బెయిల్ ఇవ్వడంతో జులై 4న విడుదలయ్యాడు.

అయితే, ఈసారి రెండు రోజులకే భార్యాభర్తల మధ్య గొడవ ప్రారంభమైంది. జులై 5న తన మొబైల్ ఫోన్, పర్సు కనిపించడంలేదని సోనును ప్రేమ్‌చంద్ అడగడంతో.. తనకు తెలియదని సమాధానం ఇచ్చింది. ఈ క్రమంలో ఇరువురి మధ్య వాగ్వాదం గొడవకు దారితీసింది. ఒకరిపై ఒకరు దాడి చేసుకోగా.. వారి కుమారుడు రవి (20) మధ్యలో దూరి తండ్రిని బ్యాటు తీసుకుని కొట్టాడు. దీంతో పోలీస్ స్టేషన్‌కు వెళ్లి భార్య, కుమారుడిపై ఫిర్యాదు చేసిన భర్త.. సోను తన కళ్లలో కారంపొడి కొట్టిందని ఆరోపించాడు. తీవ్రంగా కలతచెంది పటాన్‌లోని తన తల్లి వద్దకు వెళ్లిపోయాడు.