ట్రాఫిక్ చలాన్ల పేరు వింటేనే జల్లుమంటున్న వాహనదారులు,,,ట్రాఫిక్ పోలీసులకు చిక్కకుండా వాహనాలతో స్టంట్లు

మీరు రోడ్డు మీద వాహనంలో వెళ్తున్నారా. అయితే డ్రైవింగ్ లైసెన్స్, వాహనానికి సంబంధించిన పత్రాలు, ఇన్సూరెన్స్, పొల్యూషన్, బైక్ మీద వెళ్లేవారు అయితే హెల్మెట్, కారులో వెళ్లేవారు అయితే సీట్ బెల్ట్ తప్పనిసరి. ఇలా రకరకాల పత్రాలు, నిబంధనలు పాటించాల్సి ఉంటుంది. ఇవన్నీ ఉంటే రోడ్డు మీద ఏ ట్రాఫిక్ పోలీస్ మన వాహనాన్ని ఆపినా.. సంబంధిత పత్రాలు చూపించి రయ్ మంటూ వెళ్లిపోవచ్చు. ఇక ఇందులో ఏ ఒక్కటీ లేకపోయినా తగిన మూల్యం చెల్లించుకోవాల్సిందే. అదే జరిమానా రూపంలో. అయితే దేశ రాజధాని ఢిల్లీ ఎన్‌సీఆర్ పరిధిలోని నోయిడాలో ఒక వింత సంఘటన జరిగింది. ఓ మహిళకు ట్రాఫిక్ పోలీసులు చలానా వేశారు. అది చూసి ఆమె ఖంగుతిన్నారు. ఇదేం విచిత్రమని ఆవేదన వ్యక్తం చేశారు.

గ్రేటర్ నోయిడా పరిధిలోని హోషియార్ పూర్ పరిధిలో నివసించే శైలజా చౌదరీ అనే మహిళకు గత శుక్రవారం ఒక ఈ- చలాన్ వచ్చింది. ఆమెకు జూన్ 27 వ తేదీన గౌతమ్ బుద్ధ నగర్ ట్రాఫిక్ పోలీసులు రూ.1000 చలానా వేశారు. అయితే ఎందుకు వేశారో చెబితే అంతా షాక్ అవుతారు. ఎందుకంటే ఆమె పేరు మీద అసలు ఎలాంటి బైక్ రిజిస్టర్ అయి లేదని శైలజా చౌదరీ తెలిపారు. తనకు కారు మాత్రమే ఉందని పేర్కొన్నారు. ఇంకా విచిత్రం ఏంటంటే ఆమె జూన్ 27 వ తేదీన తన కారులో హోషియార్ పూర్ ప్రాంతంలో ప్రయాణించ లేదని శైలజా చౌదరీ స్పష్టం చేశారు. అసలు తనకు బైకే లేకుండా.. కారులో ప్రయాణించకుండా ఎలా చలానా వేస్తారని ఆమె ప్రశ్నిస్తున్నారు. అయితే తొలుత తన కారును ఎవరైనా కుటుంబ సభ్యులు తీసుకెళ్లారో ఏమోనని అనుమానించారు. అయితే ఆ చలానాలో కారు కాకుండా బైక్ ఉండటంతో ఆమెకు ఏం చేయాలో అర్థం కాలేదు.

తన పేరు మీద కేవలం హ్యూందాయ్ ఐ20 కారు మాత్రమే రిజిస్టర్ అయి ఉందని.. ట్రాఫిక్ పోలీసుల నిర్లక్ష్యం కారణంగానే ఈ చలాన్ వేశారని శైలజా చౌదరీ ఆరోపించారు. వెంటనే దాన్ని తొలగించాలని డిమాండ్ చేశారు. సంబంధిత తేదీలోగా నోయిడా సెక్టార్ 14 ఏ లోని ట్రాఫిక్ కంట్రోల్ రూమ్‌లో సంప్రదించాలని.. లేని పక్షంలో చట్టపరమైన చర్యలు చేపడతామని చలానాలో ఉన్నట్లు ఆమె తెలిపారు. తాను నివసిస్తున్న ప్రాంతం నుంచి ట్రాఫిక్ కంట్రోల్ రూమ్ 35 కిలోమీటర్లు ఉంటుందని శైలజా చౌదరీ వెల్లడించారు. అయితే తాను చేయని నేరానికి 35 కిలోమీటర్లు వెళ్లేందుకు ఆమె నిరాకరించింది.

అయితే ఈ ఘటనపై ట్రాఫిక్ డిప్యూటీ కమిషనర్ ఆఫ్ పోలీస్ ప్రీతీ యాదవ్ స్పందించారు. ట్రాఫిక్ చలానాలు వేసేందుకు తాము ఇంటిగ్రేటెడ్ ట్రాఫిక్ మేనేజ్‌మెంట్ సిస్టమ్ ఉపయోగిస్తామని.. దీని ద్వారా ఆటోమెటిక్‌గా వెహికల్ రిజిస్ట్రేషన్ నంబర్ గుర్తిస్తుందని పేర్కొన్నారు. అలాంటి సమయంలో చిన్న చిన్న తప్పుల వల్ల వెహికల్ రిజిస్ట్రేషన్ నంబర్ తప్పుగా డిటెక్ట్ చేస్తుందని తెలిపారు. అలాంటి సమయంలో వాహనదారులు ఎలాంటి ఆందోళనకు గురి కాకుండా.. సంబంధిత ట్రాఫిక్ పోలీసులను సంప్రదించాలని సూచించారు. అప్పుడు వారు తప్పుగా ఉన్న చలానాలను తొలగిస్తారని చెప్పారు. ఫోన్ కాల్, ఈ - మెయిల్ ద్వారా తమ కార్యాలయాన్ని నేరుగా కూడా సంప్రదించవచ్చని ట్రాఫిక్ డీసీపీ ప్రీతీ యాదవ్ స్పష్టం చేశారు.