దేశంలో ఎక్కడ గంజాయి దొరికినా ఏపీలోనే మూలాలు

దేశంలో ఎక్కడ గంజాయి దొరిగిన దాని మూలాలు ఆంధ్రప్రదేశ్ రాష్ట్రంలోనే ఉంటున్నాయని నారా లోకేష్ తెలిపారు. ఈ మేరకు శనివారం రాష్ట్ర గవర్నర్ జస్టిస్ అబ్దుల్ నజీర్‌కు లోకేష్ ఫిర్యాదు చేశారు.  ఆంధ్రప్రదేశ్‌లో విచ్చలవిడి గంజాయి లభిస్తోందని రాష్ట్ర గవర్నర్‌ జస్టిస్‌ అబ్దుల్ నజీర్‌కు తెలుగు దేశం పార్టీ (టీడీపీ) జాతీయ ప్రధాన కార్యదర్శి నారా లోకేష్ ఫిర్యాదు చేశారు. ఈ మేరకు శనివారం రాజ్‌భవన్‌లో గవర్నర్‌ అబ్దుల్ నజీర్‌తో నారా లోకేష్ భేటీ అయ్యారు. ఈ సందర్భంగా డ్రగ్స్‌ సరఫరాలో ఆంధ్రప్రదేశ్ రాష్ట్రం అగ్రస్థానంలో ఉందని చెబుతున్న డీఆర్‌ఐ నివేదికను గవర్నర్‌కు ఆధారాలుగా అందజేశారు.

దేశంలో ఎక్కడ గంజాయి దొరికినా ఆ మూలాలు ఏపీకి ముడిపడి ఉన్నాయని వివరించారు. ప్రస్తుత పరిస్థితులు చూస్తుంటే డ్రగ్స్‌ కేంద్రంగా రాష్ట్రం మారుతోందంటూ ఆందోళన వ్యక్తం చేశారు. మరోవైపు హవాలా లావాదేవీలు రాష్ట్ర ఆర్థిక వ్యవస్థపై ప్రతికూల ప్రభావం చూపుతున్నాయని నారా లోకేష్ ఫిర్యాదులో పేర్కొన్నారు. దీనిపై సమగ్ర విచారణ జరిపించి బాధ్యులపై చర్యలు తీసుకోవాలని నారా లోకేష్ కోరారు.

గవర్నర్‌తో భేటీ అనంతరం నారా లోకేష్ మీడియాతో మాట్లాడుతూ.. వైఎస్సార్ కాంగ్రెస్ పార్టీ నేతల ప్రమేయంతోనే రాష్ట్రంలో మాదకద్రవ్యాల సరఫరా జరుగుతోందని ఆరోపించారు. డ్రగ్స్‌ ఉత్పత్తి, స్మగ్లింగ్‌లో పట్టుబడ్డ వారిలో వైసీపీ నేతలే ఉన్నారని పేర్కొన్నారు. గత నాలుగేళ్లలో యువత మత్తులో దాడులు చేసిన సంఘటనలు అనేకం ఉన్నాయని చెప్పారు. విద్యార్థులపైనా ఈ మహమ్మారి తీవ్ర ప్రతికూల ప్రభావం చూపుతోందన్నారు. డ్రగ్స్‌పై గవర్నర్‌కు ఫిర్యాదు అనంతరం లోకేష్ యువగళం పాదయాత్రకు బయల్దేరి వెళ్లారు. కాగా, నారా లోకేష్ యువగళం పాదయాత్ర ఉమ్మడి నెల్లూరు జిల్లా నుంచి ఉమ్మడి ప్రకాశం జిల్లాలోకి ప్రవేశించనుంది. లోకేష్‌తో పాటు గవర్నర్‌ వద్దకు వెళ్లిన వారిలో టీడీపీ నేతలు షరీఫ్‌, నక్కా ఆనంద్‌బాబు, కొల్లు రవీంద్ర ఉన్నారు.