జనసేనలోకి ఆమంచి కృష్ణమోహన్ సోదరుడు

వైసీపీ సీనియర్ నాయకుడు ఆమంచి కృష్ణమోహన్ సోదరుడు ఆమంచి స్వాములు జనసేన పార్టీలో చేరారు. స్వాములకు పవన్ కళ్యాణ్ పార్టీ కండువా కప్పి జనసేన లోకి ఆహ్వానించారు. ఈ సందర్భంగా పవన్ మాట్లాడుతూ.. జగన్ సర్కారుపై నిప్పులు చెరిగారు. చీరాల మాజీ ఎమ్మెల్యే, పర్చూరు వైఎస్సార్ కాంగ్రెస్ పార్టీ ఇన్‌ఛార్జి ఆమంచి కృష్ణమోహన్‌ సోదరుడు ఆమంచి శ్రీనివాసరావు (స్వాములు) శనివారం జనసేన పార్టీలో చేరారు. మంగళగిరిలోని జనసేన పార్టీ కేంద్ర కార్యాలయంలో ఏర్పాటు చేసిన కార్యక్రమంలో ఆమంచి స్వాములుకు అధినేత పవన్‌ కళ్యాణ్ కండువా కప్పి పార్టీలోకి ఆహ్వానించారు. ఇటీవల చీరాల నియోజకవర్గంలో జనసేన పార్టీ తరఫున స్వాములు ఫొటోతో కూడిన ఫ్లెక్సీలు ఏర్పాటు చేయడం చర్చనీయాంశమైంది. ఈ నేపథ్యంలో శనివారం స్వాములు జనసేన పార్టీ తీర్థం పుచ్చుకున్నారు.

ఈ సందర్భంగా పవన్ కళ్యాణ్ మాట్లాడుతూ.. చీరాల నుంచి ఆమంచి స్వాములు జనసేన పార్టీలో చేరడం చాలా సంతోషంగా ఉందన్నారు. తాను చీరాలలో పెరిగిన వాడినే అంటూ ఆ ప్రాంతంలో పేటల పేర్లను పవన్ కళ్యాణ్ చదివి వినిపించారు. ఆమంచి శ్రీనివాసులను మనస్ఫూర్తిగా జనసేనలోకి ఆహ్వానిస్తున్నానని చెప్పారు. కార్యకర్తలకు అండగా నిలబడే నాయకుడు.. కష్టం వస్తే నేను ఉన్నా అని నిలబడే వ్యక్తి.. స్వాములు రాకతో ప్రకాశం, గుంటూరు, కృష్ణా జిల్లాల్లో జనసేనకు బలం వచ్చినట్టే అని అన్నారు. ఆమంచి కుమారుడు రాజేంద్ర కూడా జనసేన పార్టీలో చేరడం యువత మార్పుకు చిహ్నమన్నారు.

కొంత మంది మాత్రమే కాదు అందరూ బాగుండాలని జనసేన పార్టీ సిద్ధాంతం అని పవన్ కళ్యాణ్ అన్నారు. మన హక్కులను మనం సాధించుకుందామని.. ఒకరిని దేహీ దేహీ అని అడుక్కొవద్దని పిలుపునిచ్చారు. అందరం కలిసి రాష్ట్రం హితం కోసం పని చేద్దామన్నారు. మీ ప్రాణాలకు నా ప్రాణం అడ్డుపెడతా.. ఎవడొస్తాడో ఇక నుంచి చూద్దామని అన్నారు. శ్రీకాళహస్తిలో జనసేన నాయకుడిపై పడిన దెబ్బ తన మీద పడినట్లే అని.. ఆమంచి స్వాములుపై దెబ్బ పడినా తాను వెళతానని వెల్లడించారు. జనసేనకు జన బలం ఉందని.. అన్ని జిల్లాల్లోనూ వైసీపీ దౌర్జన్యాలను బలంగా ఎదుర్కొందామని పవన్ కళ్యాణ్ పిలుపునిచ్చారు. ఈ అరాచక ప్రభుత్వం పోవాలని.. అవినీతి ప్రభుత్వానికి బుద్ధి చెప్పాలన్నారు. జనం బాగుండాలంటే జగన్ పోవాలని పవన్ కళ్యాణ్ నినదించారు.