బంగాఖాతంలో అల్పపీడనానికి ఛాన్స్,,,ఏపీలో ఊపందుకున్న వర్షాలు

వాయవ్య బంగాళాఖాతంలో ఉన్న ఉపరితల ఆవర్తనం ప్రభావంతో.. ఆదివారం ఉత్తర ఒడిశా, పశ్చిమబెంగాల్‌ పరిసరాల్లో అల్పపీడనం ఏర్పడింది. ఈ ప్రభావంతో కోస్తాలో పలుచోట్ల, రాయలసీమలో అక్కడక్కడా వర్షాలు పడ్డాయి. రానున్న 24 గంటల్లో కోస్తాలో పలుచోట్ల, సీమలో చెదురుమదురుగా వర్షాలు కురుస్తాయని వాతావరణ శాఖ తెలిపింది. ఈ నెల 18 నుంచి ఉత్తరకోస్తా, 1 నుంచి కోస్తాలోని మిగిలిన ప్రాంతాల్లో వానలు పెరగనున్నాయని అంచనా వేస్తున్నారు. ఈనెల 18న ఉపరితల ఆవర్తనం ఏర్పడనుందని.. ఈ ప్రభావంతో అల్పపీడనం ఏర్పడేందుకు అవకాశాలున్నాయి అంటున్నారు.

సోమవారం ఉత్తర, దక్షిణ కోస్తాల్లో కొన్నిచోట్ల, రాయలసీమలో అక్కడక్కడా వానలకు అవకాశం ఉందని అంచనా వేస్తున్నారు. నేడు శ్రీకాకుళం, పార్వతీపురం మన్యం, అల్లూరి సీతారామరాజు జిల్లాల్లో అక్కడక్కడ పిడుగులతో కూడిన తేలికపాటి వర్షాలు కురిసే అవకాశం ఉందని ఏపీ విపత్తుల నిర్వహణ సంస్థ తెలిపింది. మిగిలిన జిల్లాల్లో జల్లులు పడతాయని.. ప్రజలు అప్రమత్తంగా ఉండాలని సూచించారు. ఆదివారం ఉత్తర కోస్తాలో అనేకచోట్ల, దక్షిణ కోస్తాలో కొన్నిచోట్ల, రాయలసీమలో ఒకటి, రెండు చోట్ల తేలికపాటి నుంచి మోస్తరు వర్షాలు కురిశాయి.

జులై 18 నుంచి 20 వరకు- కోస్తాంధ్ర జిల్లాల్లో అక్కడక్కడ భారీ వర్షాలు పడతాయంటున్నారు. జులై 16 నుంచి 20 వరకు కోస్తాంధ్ర, యానాం ప్రాంతాల్లో ఉరుములు, మెరుపులతో కూడిన వానలు కురస్తాయంటున్నారు. జులై 17 నుంచి 20 వరకు తెలంగాణలో అక్కడక్కడ భారీ వర్షాలు పడతాయంటున్నారు. జులై 16 నుంచి 17 వరకు తెలంగాణలో ఉరుములు, మెరుపులతో కూడిన వానలు కురుస్తాయని అంచనా వేస్తున్నారు.

తెలంగాణపై ఆవర్తనం ప్రభావం కనిపిస్తోంది. అలాగే వాయవ్య బంగాళాఖాతంలో ఈ నెల 18న ఒక ఆవర్తనం ఏర్పడే అవకాశం ఉందని అంచనా వేస్తున్నారు. వాయవ్య బంగాళాఖాతంలో అల్పపీడన ప్రాంతం ఏర్పడిన సంగతి తెలిసిందే. రాగల రెండు రోజుల్లో దక్షిణ వాయవ్య దిశలో జార్ఖండ్‌ మీదుగా కదిలే అవకాశం ఉందంటున్నారు. సోమవారం సంగారెడ్డి, వికారాబాద్‌, సిరిసిల్ల, భూపాలపల్లి, భద్రాద్రి కొత్తగూడెం, జగిత్యాల, నిజామాబాద్‌, ఆసిఫాబాద్‌, మంచిర్యాల జిల్లాల్లో భారీ వర్షాలు కురుస్తాయంటున్నారు. మంగళవారంలో రాష్ట్రంలో చాలా చోట్ల తేలికపాటి నుంచి మోస్తరు వర్షాలు కురిసే అవకాశం ఉందంటున్నారు.

మంగళవారం నుంచి గురువారం వరకు ఉమ్మడి నిజామాబాద్‌, ఆదిలాబాద్‌, వరంగల్‌ జిల్లాతో పాటుగా రాజన్న సిరిసిల్ల, కరీంనగర్‌, పెద్దపల్లి, జయశంకర్‌ భూపాలపల్లి, సంగారెడ్డి, రంగారెడ్డి, హైదరాబాద్‌, మేడ్చల్‌ మల్కాజ్‌గిరి మహబూబ్‌నగర్‌, వనపర్తి, నారాయణపేట జిల్లాల్లో భారీ వర్షాలు కురిసే అవకాశాలున్నాయి అంటున్నారు. ఆయా జిల్లాలకు ఎల్లో అలెర్ట్‌ను జారీ చేసింది. మంచిర్యాల జిల్లా కోటపల్లిలో 9 సెంటీమీటర్లకుపైగా వర్షపాతం నమోదైంది.