జోరందుకున్న బలప్రదర్శన రాజకీయాలు,,,,పోటీపోటీగా బీజేపీ, కాంగ్రెస్ సమావేశాలు

ఓవైపు బీజేపీ సారథ్యంలోని ఎన్డీయే, మరోవైపు కాంగ్రెస్ నాయకత్వంలోని ప్రతిపక్షాలు ఆ గట్టునుంటావా.. ఈ గట్టుకొస్తావా..? అంటూ రాజకీయ పార్టీలను పోటీపోటీగా ఆకర్షించే పనిలో పడ్డాయి. ఇరుపక్షాలు తమ బలాన్ని ప్రదర్శించే పనిలో పడ్డాయి. ఇప్పటికే కాంగ్రెస్ నాయకత్వంలోని విపక్షాలు పాట్నాలో సమావేశం కాగా.. నేడు (సోమవారం) బెంగళూరులో మరోసారి భేటీ అవుతున్నాయి. దీంతో బీజేపీ కూడా అప్రమత్తమైంది. పాత మిత్రులను దగ్గరికి తీయడం మొదలుపెట్టింది. ఎన్డీయే 30 పార్టీలతో మంగళవారం ఢిల్లీలో సమావేశం నిర్వహించనుంది.

ఆసక్తికరమైన విషయం ఏంటంటే.. ఈ రెండు కూటములు నిర్వహిస్తున్న పోటాపోటీ భేటీలకు తెలుగు రాష్ట్రాల నుంచి ఒక్క పార్టీ మాత్రమే వెళ్తోంది. బీజేపీ మిత్రపక్షమైన జనసేన ఎన్డీయే పక్షాల సమావేశానికి హాజరుకానుంది. ఏపీలోని అధికార పక్షమైన వైఎస్సార్సీపీ బీజేపీతో స్నేహంగానే మెలుగుతున్నప్పటికీ.. ఆ పార్టీ ఎన్డియే కూటమిలో చేరుతుందనే ప్రచారం జరిగినప్పటికీ.. ఆ పార్టీ ఎన్డీయే భేటీకి వెళ్లడం లేదు. మరోవైపు ఎన్డీయేలో చేరాలని.. బీజేపీతో దోస్తీ చేయాలని టీడీపీ ఆసక్తి చూపుతోంది. కానీ ఆ పార్టీకి ఎన్డీయే నుంచి ఆహ్వానం అందలేదు. ఇక తెలంగాణలో బీఆర్ఎస్‌కు బీజేపీతో ఏమాత్రం పొసగడం లేదు. కాంగ్రెస్ కూటమి సంగతి సరేసరి. అంటే తెలుగునాట ఇప్పుడు ఎన్డీయేలోగానీ, ఇటు కాంగ్రెస్‌లో గానీ ఉన్న ప్రాంతీయ పార్టీ జనసేన మాత్రమే.

వైఎస్సార్సీపీ, బీజేపీ మధ్య జాతీయ స్థాయిలో మంచి సంబంధాలే ఉన్నాయి. మోదీ సర్కారు ఏ బిల్లు పెట్టినా.. జగన్ పార్టీ అనుకూలంగా వ్యవహరిస్తోంది. అయినా సరే అఫీషియల్‌గా ఎన్డీయేలో చేరడానికి వైఎస్సార్సీపీ సుముఖంగా లేదు. దీనికి బోలెడు కారణాలున్నాయి. కానీ ఈ రెండు పార్టీ మధ్య మంచి అవగాహన ఉందనే విషయం పలు సందర్భాల్లో బయటపడింది.

ఇక టీడీపీ ఎన్డీయే వైపు చూస్తున్నా.. బీజేపీ మాత్రం వెల్‌కమ్ చెప్పట్లేదు. గతంలో చంద్రబాబుతో బీజేపీ పెద్దలకు ఉన్న చేదు అనుభవాలే దీనికి కారణం కావొచ్చేమో. కానీ వచ్చే ఎన్నికల్లో టీడీపీ, బీజేపీ, జనసేన కలిసి పోటీ చేయాలని.. వైస్సార్సీపీని గద్దె దింపాలంటే ఇలా చేయాల్సిందేనని జనసేన అధినేత పవన్ కళ్యాణ్ బలంగా నమ్ముతున్నారు. టీడీపీ, జనసేన-బీజేపీ వేర్వురుగా పోటీ చేస్తే అది అధికార పార్టీకి లబ్ధి చేకూరుస్తుందనే భావనలో ఆయన ఉన్నారు. కానీ ప్రస్తుతం ఎన్డీయే కూటమికి టీడీపీని ఆహ్వానించకుండా.. జనసేనను మాత్రమే పిలవడం ద్వారా ఏపీలో తమ మిత్రుడు పవన్ కళ్యాణ్ మాత్రమేనని కమలనాథులు చెప్పినట్లయ్యింది.

ఇది పవన్ కళ్యాణ్‌కు కూడా రుచించని విషయం. ఎందుకంటే మూడు పార్టీలు కలిసి ఎన్నికలకు వెళ్లాలనే పవన్ ప్రతిపాదనకు బీజేపీ పరోక్షంగా నో చెప్పినట్లయ్యింది. అయినా సరే టీడీపీతో పొత్తుకు బీజేపీ పెద్దలను ఒప్పించేందుకు పవన్ చివరి వరకూ ప్రయత్నించే అవకాశం ఉంది. ఒకవేళ కాషాయ పార్టీ గనుక కుదరదని తేల్చి చెబితే.. ఎన్డీయే కూటమి నుంచి పవన్ బయటకొచ్చి బాబుతో కలిసి బరిలోకి దిగుతాడనే ప్రచారం జరుగుతోంది. అంటే అప్పుడు ఎన్డీయే కూటమిలో తెలుగు రాష్ట్రాల నుంచి ఎవరూ ఉండరు. కానీ ఎన్నికల్లో టీడీపీ-జనసేన కూటమిగా పోటీ చేసి, గెలిస్తే.. అప్పుడు అవసరాన్ని బట్టి బాబు-పవన్ ద్వయాన్ని బీజేపీ ఎన్డీయేలోకి ఆహ్వానించొచ్చు. జగనే మళ్లీ పవర్‌లోకి వస్తే.. భారీగా ఎంపీ సీట్లు గెలిస్తే.. బీజేపీ, వైఎస్సార్సీపీ మధ్య స్నేహ బంధం మరింత బలపడుతుంది. ఒకవేళ పవన్‌ టీడీపీ వెంట వెళ్లకుండా బీజేపీ ఉంచగలిగితే..?