రైల్వే ప్లాట్‌ఫామ్ మీద నిద్రపోతున్న బాలుడు,,,మానవత్వం మరిచిపోయిన పోలీస్ కానిస్టేబుల్

రైల్వే ప్లాట్‌ఫామ్ మీద నిద్రపోతున్న బాలుడిపై ఓ పోలీస్ కానిస్టేబుల్ మానవత్వం మరిచిపోయి ప్రవర్తించాడు. ఉత్తర్‌ప్రదేశ్‌లోని బల్లియా జిల్లా బేల్తారా రోడ్ రైల్వే స్టేషన్‌లో పోలీసు దాష్టీకాన్ని చాటుగా రికార్డుగా చేసిన ఓ వ్యక్తి.. ఆ వీడియోను సోషల్ మీడియాలో షేర్ చేయడంతో వైరల్ అయింది. చివరికి అధికారుల దృష్టికి చేరడంతో ఈ ఘటనపై విచారణకు ఆదేశించారు.

వైరల్ అవుతోన్న వీడియోలో.. ప్లాట్‌ఫామ్‌పై నిద్రపోతున్న బాలుడి మెడపై ఆర్పీఎఫ్ కానిస్టేబుల్ కాలుతో నొక్కిపెట్టడం.. తర్వాత తన్నడం స్పష్టంగా కనిపిస్తోంది. పాపం ఆ చిన్నారి మాత్రం నిస్సహాయంగా ఉండిపోయాడు. పిల్లాడనే ఇంగితం లేకుండా వ్యవహరించిన పోలీసుపై నెటిజన్లు తీవ్రస్థాయిలో మండిపడుతున్నారు. అభివృద్ధి చెందిన దేశాలకు, భారత్ మధ్యనున్న మరో తేడా ఇదేనని కొందరు కామెంట్లు చేయగా... ఇలాంటి వారిని ఎట్టి పరిస్థితుల్లోనూ వదిలిపెట్టకూడదని మరికొందరు డిమాండ్ చేశారు. చిన్న పిల్లాడు ఏం చేశాడని అంత క్రూరంగా వ్యవహరించారని ఇంకొందరు.. ఉత్తర్ ప్రదేశ్‌లో ఇంతకుమించి ఊహించడం తప్పే అవుతుందని మరికొందరు ఆవేదన వ్యక్తం చేశారు.

ఈ వీడియో వైరల్ కావడంతో అధికారుల దృష్టికి చేరింది. దీంతో స్థానిక అధికారులు విచారణ చేపట్టారు. అటు, రైల్వే ప్రొటక్షన్ ఫోర్స్ సైతం నిందితుడ్ని గుర్తించి, బాధ్యుడిపై చర్యలకు ఉపక్రమించింది. ఉన్నతాధికారుల ఆదేశాలతో నిందితుడ్ని విధుల నుంచి తప్పించారు. అయితే, ఈ ఘటన ఎప్పుడు చోటుచేసుకుందో మాత్రం తెలియరాలేదు. దీనిపై రైల్వే అధికారులను సంప్రదించగా.. స్పందించడానికి నిరాకరించారు. నిందితుడ్ని వారణాసి డివిజన్‌లో పనిచేస్తోన్న బాలేందర్ సింగ్‌గా గుర్తించారు. అజమ్‌గఢ్ ఆర్పీఎఫ్ ఇన్‌స్పెక్టర్లు దీనిపై విచారణ సాగిస్తారని, ఇదే సమయంలో అతడ్ని సస్పెండ్ చేశామని వారణాసి రైల్వే డివిజన్ అధికార ప్రతినిధి తెలిపారు.