రాత్రివేళ ఒకే సమయానికి ఆగిపోతున్న కరెంట్,,,అసలు దొంగలను రెడ్ హ్యాండెడ్‌గా పట్టుకున్న గ్రామస్థులు

ఓ గ్రామంలో రోజూ రాత్రివేళ ఒకే సమయానికి విద్యుత్ సరఫరా నిలిచిపోతోంది. కొన్నాళ్లుగా ఇదే తంతు. అధికారికంగా పవర్ కట్ ఉందా? అదీ లేదు. విద్యుత్ సరఫరా నిలిచిపోవడంతో గ్రామం మొత్తం చీకట్లు అలముకుంటున్నాయి. ఈ సమయంలో బైక్‌లు, కరెంట్ మోటార్లు, మేకలు చోరీకి గురువుతున్నాయి. దీంతో అనుమానించిన గ్రామస్థులు.. ఇలా ఎందుకు జరుగుతుందోనని ఓ రోజు రాత్రి మాటు వేశారు. కొద్ది సేపటి తర్వాత ఓ యువతి ట్రాన్స్‌ఫార్మర్ దగ్గరకు వచ్చి.. విద్యుత్ సరఫరా నిలివేయడం చూసి షాకయ్యారు. రెడ్ హ్యాండెడ్‌గా ఆమెను పట్టుకున్న గ్రామస్థులు.. రాత్రిపూట తన ప్రియుడ్ని కలుసుకోడానికి ఇలా చేస్తున్నట్టు ఆమె చెప్పడంతో విస్తుపోయారు.

ఈ ఘటన బిహార్‌లోని బేతియా జిల్లా నౌతన్‌ పోలీస్‌స్టేషను పరిధిలోని ఓ గ్రామంలో వెలుగులోకి వచ్చింది. గ్రామానికి చెందిన యువతి.. ఓ యువకుడ్ని ప్రేమించింది. అతడ్ని రోజూ రాత్రిపూట ఏకాంతంగా కలుసుకునేది. ఎవరి కంట పడకుండా ఉండేందుకు ప్రియుడు వచ్చే సమయానికి గ్రామంలోని ట్రాన్స్‌ఫార్మరు వద్దకు వెళ్లి విద్యుత్తు సరఫరాను నిలిపివేసేది. గత కొన్ని రోజుల నుంచి గ్రామంలో ఒకే సమయానికి కరెంట్ పోవడం.. పలువురు బైక్‌లు, కరెంట్ మోటార్లు, మేకలు చోరీకి గురవుతున్నాయి. ఇలా ఎందుకు జరుగుతుందో గ్రామస్థులకు అంతుబట్టలేదు. చివరకు ఎలాగైనా దొంగలను పట్టుకోవాలని ఓ రోజు రాత్రి మాటువేసిన గ్రామస్థులకు యువతి నిర్వాకం గురించి తెలిసిపోయింది.

రోజూ కరెంట్ తీసి ఏకాంతంలో ఆనంద డోలికల్లో మునిగి తేలుతున్న ప్రేమికులకు గ్రామస్థులు షాకిచ్చారు. వారిని రెడ్‌హ్యాండెడ్‌గా పట్టుకుని... యువకుడికి కొందరు దేహశుద్ధి కూడా చేశారు. అయితే, యువతి మాత్రం తాము ఇద్దరం ప్రేమించుకున్నామని, ఈ విషయంలో ఎవరూ జోక్యం చేసుకోవద్దని హెచ్చరించింది. అంతేకాదు, తమను వేధించినట్టు పోలీసులకు ఫిర్యాదు చేస్తానని బెదిరింపులకు దిగింది. దీంతో విషయం పోలీస్ స్టేషన్‌కు చేరింది. పోలీసుల పంచాయతీలో ఈ ప్రేమజంట పెళ్లికి పెద్దలు అంగీకరించడంతో‘కరెంటు’ కథ సుఖాంతమైంది. గతేడాది కూడా బిహార్‌లోని పూర్ణియా జిల్లాలో ఇటువంటి ఘటనే వెలుగులోకి వచ్చింది.

ఆ జిల్లాలోని గణేశ్‌పూర్ గ్రామానికి చెందిన ఎలక్ట్రీషియన్.. తన ప్రియురాలిని ఏకాంతంగా కలవడానికి ఈ విధంగానే చేసి ఒక రోజు అడ్డంగా దొరికిపోయాడు. రాత్రి వేళలో విద్యుత్ సరఫరా నిలివేసి.. ఆమె ఇంటికి వెళ్లి కలుసుకునేవాడు. రోజూ కరెంట్ ఎందుకు పోతుందోనని అనుమానించిన గ్రామస్థులు.. కాపలా కాయడంతో ఎలక్ట్రీషియన్ వారి కంటపడటంతో పట్టుకుని దేహశుద్ధి చేశారు.