అన్నమయ్య జిల్లాలో ఘోర ప్రమాదం.. ఐదుగురు దుర్మర
Andhra Pradesh Telugu | Suryaa Desk | Published : Sat, Jul 22, 2023, 07:24 PM
అన్నమయ్య జిల్లా ఘోర ప్రమాదం జరిగింది. పుల్లంపేట మండలంలో శనివారం సాయంత్రం ఈ ఘటన చోటుచేసుకుంది. ఆర్టీసీ బస్సు, ఆయిల్‌ ట్యాంకర్‌ ఢీకొన్న ప్రమాదంలో ఐదుగురు అక్కడికక్కడే దుర్మరణం చెందారు. మరో 8 మందికి తీవ్ర గాయాలయ్యాయి. క్షతగాత్రులను రాజంపేట ప్రభుత్వ ఆస్పత్రికి తరలించి చికిత్స అందిస్తున్నారు.
పుల్లంపేట సమీపంలోని మలుపు వద్ద జాతీయ రహదారిపై కడప నుంచి తిరుపతికి వెళ్తున్న ఆర్టీసీ బస్సును ఎదురుగా వచ్చిన ఆయిల్‌ ట్యాంకర్‌ వేగంగా ఢీకొట్టింది. దీంతో ఆర్టీసీ బస్సులో ప్రయాణిస్తున్న ఐదుగురు వ్యక్తులు అక్కడికక్కడే ప్రాణాలు కోల్పోయారు. లారీ డ్రైవర్‌ అతి వేగమే ఈ ప్రమదానికి కారణమని పోలీసులు, స్థానికులు చెబుతున్నారు. ఈ ప్రమాద ఘటనతో రాజంపేట- తిరుపతి జాతీయ రహదారిపై ట్రాఫిక్‌ స్తంభించింది. సంఘటనా స్థలానికి చేరుకున్న పోలీసులు ట్రాఫిక్‌ను క్లియర్‌ చేశారు.
ఈ ప్రమాదంలో ఓబులవారిపల్లె మండలానికి చెందిన గుండాల శ్రీనివాసులు అలియాస్‌ బుడ్డయ్య (62), రాజంపేట మండలం వెంకట రాజంపేటకు చెందిన శేఖర్‌ (45), కడపకు చెందిన బాషా (65)తో పాటు మరో ఇద్దరు మహిళలు మృతి చెందారు. మృతి చెందిన వారు, గాయపడ్డ వారి వివరాలు తెలియాల్సి ఉంది.
|
|