శ్రీశైలంలో అరుదైన పునుగు పిల్లి,,,భక్తుల క్యూ లైన్‌లో ప్రత్యక్షం

శ్రీ భ్రమరాంబిక మల్లికార్జున స్వామి కొలువై ఉన్న ప్రముఖ పుణ్యక్షేత్రం శ్రీశైలంలో అరుదైన పునుగు పిల్లి ప్రత్యక్షమైంది. స్వామి అమ్మవారి ఉచిత దర్శనానికి వెళ్లే క్యూలైన్‌లో పునుగు పిల్లి భక్తులకు కనిపించింది.. పిల్లిని చూసి భక్తులు ఆశ్చర్యపోయారు. వ్యక్తం చేశారు. క్యూలైన్‌లో పునుగు పిల్లి సందడిని చూసి అక్కడి ఆలయ సిబ్బంది, భక్తులు తమ తమ మొబైల్స్‌లో చిత్రీకరించారు. గతంలో క్యూలైన్ ఏర్పాటుకు ముందు ఈ ప్రాంతంలో ఎక్కువగా పునుగు పిల్లుల సందడి ఉండేదని స్థానికులు చెబుతున్నారు.

గతంలో ఈ పునుగు పిల్లి విజయవాడతో పాటు తిరుమలలో కనిపించింది. విజయవాడలో పునుగు పిల్లిని పట్టుకుని తిరుమలకు తరలించారు. ఇప్పుడు అనూహ్యంగా శ్రీశైలంలో పునుగు పిల్లి ప్రత్యక్షం కావడం చర్చనీయాంశం అయ్యింది. ఆ పక్కనే అటవీ ప్రాంతం ఉండటంతో అటు వైపు నుంచి వచ్చి ఉంటుందని భక్తులు భావిస్తున్నారు.

ఈ పునుగు పిల్లిని ఇంగ్లిష్‌లో సివెట్, టాడీ క్యాట్ అని కూడా పిలుస్తుంటారు. అంతరించిపోతున్న జాతుల్లో ఒకటిగా పునుగుపిల్లిని చెబుతారు. భారత్‌తో పాటూ సింగపూర్‌, మయన్మార్, భూటాన్, శ్రీలంకలలో మాత్రమే ఉంటుందట. తిరుమల శ్రీవారికి అభిషేక సేవకు వినియోగించే సుగంధ ద్రవ్యాలను ఈ పునుగుపిల్లి నుంచి సేకరిస్తారు. ఈ పిల్లుల జాతి చాలా అరుదుగా ఉన్నాయి.. ఈ పునుగు పిల్లులు అంతరించిపోతుడంటంతో.. టీటీడీ ప్రత్యేకంగా తిరుమలలోని గోశాలలో పెంచుతోంది. అప్పుడప్పుడు ఇలా అటవీ ప్రాంతానికి సమీపంలో అక్కడక్కడా ప్రత్యక్షమవుతుంటాయి. వెంకటేశ్వర స్వామి అభిషేకం తర్వాత ఈ పునుగు పిల్లి నుంచి తీసిన తైలాన్ని విగ్రహానికి ప్రతి శుక్రవారం పూస్తారని చెబుతుంటారు.

తిరుమల గోశాలలో వీటిని పెంచడంపైనా గతంలో అభ్యంతరాలు వచ్చాయి. ఈ పునుగు పిల్లి వన్యప్రాణి కాబట్టి ఇలా బంధించి పెంచడం సరికాదని వాదనలు వినిపించాయి. కాకపోతే 1972 వన్యప్రాణి సంరక్షణ చట్టం ప్రకారం వన్యప్రాణుల సేవలను దైవ కార్యక్రమాలకు వినియోగించుకోవచ్చని కూడా ఉందట. ఈ చట్టం ప్రకారమే టీటీడీ పునుగు పిల్లులను పెంచుతున్నట్లు చెబుతుంటారు.

ఈ పునుగు పిల్లి ప్రతి 10 రోజులకు ఒకసారి శరీర గ్రంథుల ద్వారా చెమటను విసర్జిస్తుందట. అందుకే ఈ పునుగుపిల్లి శరీరం నుంచి తైలం తీయడానికి ఇనుప జల్లెడలో ఉంచి.. చందనపు కర్రను నిలబెడతారు. ఈ పిల్లి శరీరంపై కొద్దిగా అట్టలా ఏర్పడుతుంది.. పునుగు తన శరీరాన్ని ఇనుప జల్లెడలో నిలబెట్టిన చందనపు కర్రకు రుద్దుతుంది. అలా కర్రకు శరీరంపై చెమట ద్వారా వచ్చినదంతా బంకలా మారుతుంది. అలా తైలాన్ని తీసి స్వామివారి సేవకు ఉపయోగిస్తుంటారు.