కార్గిల్ యుద్ధవీరుడికి ఇండిగో విమానంలో సన్మానం

కార్గిల్ యుద్ధం. ఈ పేరు వినగానే ప్రతీ ఒక్క భారతీయుడికి రోమాలు నిక్కబొడుచుకుంటాయి. భారత్, పాకిస్థాన్‌ దేశాల మధ్య జరిగిన ఈ భీకర పోరులో మన దేశ సైనికులు ప్రత్యర్థిని మట్టికరిపించి విజయం సాధించారు. ఈ యుద్ధం జరిగి దాదాపు 25 ఏళ్లు కావస్తున్నా.. ఇప్పటికీ భారత దేశం దాన్ని మరిచిపోలేదు. అయితే ఈ కార్గిల్ యుద్ధంలో పోరాడి దేశాన్ని గెలిపించిన సైనికులకు అడుగడుగునా నీరాజనాలు అందుతున్నాయి. తాజాగా విమానంలో ప్రయాణిస్తున్న ఓ కార్గిల్ యుద్ధవీరుడికి.. సదరు విమానయాన సంస్థ అరుదైన గౌరవాన్ని కల్పించింది.

కార్గిల్ యోధుడు, పరమ వీర్ చక్ర గ్రహీత సుబేదార్ మేజర్ సంజయ్ కుమార్ తాజాగా ఓ ఇండిగో విమానంలో ప్రయాణించారు. ఈ నేపథ్యంలోనే ఇండిగో విమాన సిబ్బంది ఆ మేజర్‌కు ఘన స్వాగతం పలికారు. అనంతరం ఆయనకు అరుదైన ఆతిథ్యాన్ని కల్పించారు. పుణేకు వెళ్తుండగా.. ఆయనకు ఓ గిఫ్ట్‌ను కూడా అందజేశారు. మేజర్ సంజయ్ కుమార్ విమానంలో తమతో పాటే ప్రయాణిస్తున్నట్లు కెప్టెన్.. అనౌన్స్‌మెంట్ చేశారు. ఈ సందర్భంగా ఆయన దేశానికి చేసిన సేవలను విమానంలోని ప్రయాణికులకు.. కెప్టెన్ వివరించారు.

"ఇవాళ మనతో పాటు ఓ గొప్ప వ్యక్తి ప్రయాణించబోతున్నారు. కార్గిల్ యుద్ధంలో శత్రువులను మట్టికరిపించి పరమ్ వీర్ చక్ర పురస్కారాన్ని అందుకున్న సుబేదార్ మేజర్ సంజయ్ కుమార్ ఇవాళ ఇదే విమానంలో ప్రయాణిస్తున్నారు. దేశ చరిత్రలో ఇప్పటివరకు కేవలం 21 మంది మాత్రమే అందుకున్న అత్యంత అరుదైన ఈ పరమ్ వీర్ చక్ర అవార్డును ఆయన దక్కించుకున్నారు. యుద్ధంలో సైనికులు చూపిన ధైర్యసాహసాలకు ఇచ్చే అత్యున్నత గ్యాలెంట్రీ అవార్డే ఈ పరమ్ వీర్ చక్ర. ఛాతీపై రెండు బుల్లెట్లు, చేతిపై ఒక బుల్లెట్ తగిలినా.. ప్రాణాలకు తెగించి యుద్ధంలో పోరాడారు. శత్రువుల బంకర్‌లోకి వెళ్లి మరీ ప్రత్యర్థి సైనికులను మట్టుబెట్టారు" అని కెప్టెన్.. విమానంలోని ప్రయాణికులకు వివరించారు.

1999 లో పాకిస్తాన్‌తో జరిగిన కార్గిల్ యుద్ధంలో జులై 4 వ తేదీన జమ్మూకశ్మీర్ రైఫిల్స్ 13 వ బెటాలియన్ సభ్యుడిగా సంజయ్ కుమార్ ఉన్నారు. కెప్టెన్ చేసిన అనౌన్స్‌మెంట్‌తో విమానంలోని ప్రయాణికులు అంతా చప్పట్లతో సంజయ్ కుమార్‌కు స్వాగతం పలికారు. అనంతరం ఇండిగో విమాన సిబ్బంది అందించిన ఓ గిఫ్ట్‌ను కూడా ఆయన ప్రేమతో తీసుకున్నారు. ఈ మొత్తం సంఘటనకు సంబంధించిన వీడియోను ఇండిగో విమానయాన సంస్థ తన ట్విట్టర్‌లో పోస్టు చేసింది. ఇది కాస్త ప్రస్తుతం సోషల్ మీడియాలో వైరల్‌గా మారింది. దీంతో ఇండిగో చేసిన పనికి నెటిజన్లు హర్షం వ్యక్తం చేస్తున్నారు.