మసీదులో ఏఎస్ఐ సర్వే.. స్టే విధించిన సుప్రీంకోర్టు

వారణాసిలోని జ్ఞానవాపీ మసీదులో శాస్త్రీయ సర్వేపై సర్వోన్నత న్యాయస్థానం జులై 26 సాయంత్రం 5 గంటల వరకూ స్టే విధించింది. మసీదు ప్రాంగణంలో సర్వేకు అనుమతిస్తూ వారణాసి జిల్లా కోర్టు రెండు రోజుల కిందట ఉత్తర్వులు జారీచేసిన విషయం తెలిసిందే. ఈ నేపథ్యంలో సోమవారం ఉదయం జ్ఞానవాపీ మసీదుకు ఆర్కియాలాజికల్ సర్వే ఆఫ్ ఇండియా (ఏఎస్ఐ) బృందం చేరుకుని ప్రక్రియ మొదలుపెట్టింది. దీనిపై సుప్రీంకోర్టును ఆశ్రయించిన మసీదు కమిటీ.. వారణాసి జిల్లా కోర్టు ఆదేశాలను రద్దుచేయాలని కోరింది. ఈ పిటిషన్‌పై విచారణ చేపట్టిన ప్రధాన న్యాయమూర్తి జస్టిస్ డీవై చంద్రచూడ్ ధర్మాసనం.. రెండు రోజుల పాటు స్టే విధించింది. అంతేకాదు, కింద కోర్టు ఉత్తర్వులపై అలహాబాద్ హైకోర్టుకు వెళ్లాలని సూచించింది.

కాగా, కేంద్ర తరఫున వాదనలు వినిపించిన సొలిసిటర్ జనరల్ తుషార్ మెహతా..‘ఆర్కియోలాజికల్ సర్వే ఆఫ్ ఇండియా (ఏఎస్‌ఐ) సర్వే వారణాసిలోని జ్ఞాన్‌వాపి మసీదు ర్మాణాన్ని ఏ విధంగానూ మార్చదని తెలిపారు.. ఒక్క ఇటుక కూడా తొలగించడం జరగదు.. ఇందుకు ప్రణాళిక లేదు.. పిటిషనర్లు ఎటువంటి ఆందోళనకు గురికావాల్సిన అవసంర లేదు.. అక్కడ తవ్వకాలు జరగడం లేదు.. కేవలం ప్రాంగణం చుట్టుకొలతలు, ఫోటోగ్రఫీ వంటివి మాత్రమే జరుగుతాయి’ అని నొక్కి చెప్పారు.

ధర్మాసనం స్పందిస్తూ.. ‘ఏఎస్‌ఐ తవ్వకాలు చేపట్టే ఆలోచన చేయడం లేదని తెలుస్తోంది.. వచ్చే సోమవారం వరకు ఒక వారం పాటు ఈ దశలో ఎటువంటి తవ్వకాలు జరగలేదని మేము స్టేట్‌మెంట్‌ను రికార్డ్ చేస్తాం’ అని జస్టిస్ డీవై చంద్రచూడ్ అన్నారు. ఈ సందర్భంగా కేంద్రం సమర్పించిన రికార్డులను పరిగణనలోకి తీసుకున్నారు. ఇక, జ్ఞానవాపీ మసీదు ప్రాంగణం మొత్తాన్ని ఆర్కియోలాజికల్ సర్వే ఆఫ్ ఇండియా (ఏఎస్ఐ)తో శాస్త్రీయ సర్వేకు వారణాసి జిల్లా కోర్టు శుక్రవారం అనుమతించింది. ఈ సర్వే నివేదికను ఆగస్టు 4లోగా అందజేయాలని కోర్టు ఆదేశించింది. మసీదు నిర్మాణంపై శాస్త్రీయ సర్వే నిర్వహించాలని కోరుతూ నలుగురు హిందూ మహిళలు దాఖలు చేసిన పిటిషన్లను విచారించిన కోర్టు.. ఈ మేరకు ఉత్తర్వులు జారీచేసింది. జ్ఞానవాపి మసీదు ప్రాంగంణంలో పురాతన హిందూ దేవాలయం గుర్తులు ఉన్నాయని.. ఆ ప్రదేశంలో స్వయంభూ జ్యోతిర్లింగం లక్షల సంవత్సరాలుగా ఉనికిలో ఉందని పిటిషనర్లు వాదించారు. కొందరు మతోన్మాదులు ఆలయాన్ని కూల్చి.. దానిపై మసీదు నిర్మించారని ఆరోపించారు. కాగా, గతేడాది మసీదు ప్రాంగణంలో శివలింగం వంటి ఆకారం బయటపడిన విషయం తెలిసిందే.