వారిపై పెట్టిన కేసులన్నీ మాఫీ: మంత్రి సురేష్

విజయవాడలోని స్వరాజ్య మైదానంలో భారత రాజ్యాంగ నిర్మాత డాక్టర్ బీఆర్ అంబేద్కర్ విగ్రహం నిర్మాణ పనులను రాష్ట్ర మున్సిపల్ శాఖ మంత్రి ఆదిమూలపు సురేష్‌ మంగళవారం పరిశీలించారు. అనంతరం ఆదిమూలపు సురేష్ మీడియాతో మాట్లాడుతూ.. డాక్టర్ బీఆర్ అంబేడ్కర్ విగ్రహ నిర్మాణ పనులు 90 శాతం పూర్తయ్యాయని తెలిపారు. దేశంలోనే ఎక్కడా లేనివిధంగా అతిపెద్ద ఎత్తయిన విగ్రహం ఏర్పాటు చేస్తున్నామని పేర్కొన్నారు. అతి త్వరలోనే ఈ విగ్రహాన్ని పూర్తి చేసి జాతికి అంకితం చేస్తామని వెల్లడించారు.

డాక్టర్ బీఆర్ అంబేడ్కర్ విగ్రహంతో పాటు ఏర్పాటయ్యే స్మృతి వనంలో అనేక వసతులు కల్పిస్తున్నామని, 100 సీట్లతో ఏసీ థియేటర్‌, మ్యూజియం, లైబ్రరీ, నీటి కొలను ఏర్పాటు చేస్తున్నామని మంత్రి సురేష్ పేర్కొన్నారు. ఇక, ముఖ్యమంత్రి వైఎస్ జగన్మోహన్ రెడ్డి పాలనపై దళితులకు ఎంతో నమ్మకం ఉందని సీఎం జగన్ తెలిపారు. అయితే, చంద్రబాబు మాత్రం మాల, మాదిగల మధ్య విభేదాలు సృష్టిస్తున్నారని ఆరోపించారు. గతంలో ఎస్సీ వర్గీకరణ కోసం పోరాడిన సమయంలో కేసులు పెట్టించారని.. ఎస్సీలపై కేసులు పెట్టించిన చంద్రబాబును ఎలా నమ్మాలని మంత్రి సురేష్‌ సూటిగా ప్రశ్నించారు. అయితే, ఎస్సీ వర్గీకరణ కోసం పోరాటం చేసిన సమయంలో పెట్టిన కేసులను ఎత్తివేయాలని ముఖ్యమంత్రి వైఎస్ జగన్మోహన్ రెడ్డి కోరామని చెప్పారు.

మందకృష్ణ మాదిగతో పాటు మాదిగలందరి పైనా పెట్టిన కేసులు ఎత్తేయాలని వినతిపత్రం ఇచ్చామని మంత్రి ఆదిమూలపు సురేష్ తెలిపారు. గరగపర్రు, లక్ష్మీపురం వంటి సంఘటనల్లో ఎస్సీలపై పెట్టిన కేసులను ఎత్తేయాలని కోరామని పేర్కొన్నారు. ఈ కేసులు మాఫీ చేసేందుకు సీఎం జగన్ అంగీకరించారని వెల్లడించారు. మాదిగలంతా సీఎం జగన్‌కు రుణపడి ఉంటారని మంత్రి ఆదిమూలపు సురేష్ పేర్కొన్నారు.