చట్టప్రకారం 180 రోజుల ప్రసూతి సెలవు,,,రెట్టింపు చేస్తున్నట్టు ప్రకటించిన సిక్కిం సీఎం

మెటర్నిటీ సెలవుల విషయంలో ప్రభుత్వ ఉద్యోగులకు సిక్కిం ప్రభుత్వం శుభవార్త చెప్పింది. ప్రభుత్వ ఉద్యోగులకు 12 నెలల ప్రసూతి సెలవులు, ఒక నెల పితృత్వ సెలవులు ఇవ్వనున్నట్టు సిక్కిం ముఖ్యమంత్రి ప్రేమ్ సింగ్ తమాంగ్ బుధవారం వెల్లడించారు. సిక్కిం స్టేట్ సివిల్ సర్వీస్ ఆఫీసర్స్ అసోసియేషన్ (ఎస్‌ఎస్‌సీఎస్‌ఓఏ) వార్షిక సర్వసభ్య సమావేశంలో సీఎం ప్రసంగిస్తూ.. ఈ ప్రయోజనం కల్పించేందుకు సర్వీస్ రూల్స్‌లో మార్పులు చేయనున్నట్లు తెలిపారు. దీని వల్ల ప్రభుత్వ ఉద్యోగులు తమ పిల్లలు, కుటుంబాలను మరింత మెరుగ్గా చూసుకోవడానికి దోహదపడుతుందని ఆయన అన్నారు. ఇందుకు సంబంధించిన వివరాలను త్వరలోనే వెల్లడిస్తామని చెప్పారు.

మెటర్నిటీ బెనిఫిట్ యాక్ట్ 1961 ప్రకారం.. ఉద్యోగం చేసే మహిళకు ఆరు నెలలు లేదా 26 వారాలు వేతనంతో కూడిన ప్రసూతి సెలవు మంజూరు చేస్తారు. ఇక, దేశంలోనే అత్యంత తక్కువ జనాభా కలిగిన రాష్ట్రం సిక్కిం. అక్కడ జనాభా కేవలం 6.32 లక్షలు మాత్రమే. అధికారులు రాష్ట్ర పరిపాలనకు వెన్నెముక అని.. సిక్కిం, దాని ప్రజల అభివృద్ధికి గణనీయంగా దోహదపడుతున్నారని సీఎం తమాంగ్ అన్నారు. సివిల్ సర్వీసెస్ అధికారులకు పదోన్నతుల ప్రక్రియను క్రమబద్ధీకరించడంపై దృష్టి సారించామని, దీనివల్ల పదోన్నతుల సంఖ్య పెరుగుతుందని ఆయన పేర్కొన్నారు. రాష్ట్రంలో కొత్తగా చేరిన ఐఏఎస్, SCS (సిక్కిం సివిల్ సర్వీసెస్) అధికారులందరినీ ఆయన అభినందించారు. వారి కెరీర్ విజయవంతంగా సాగాలని సీఎం శుభాకాంక్షలు తెలిపారు.

ఉద్యోగం చేసే మహిళలకు ప్రత్యేకమైన రాయితీలను, అవకాశాలను ప్రభుత్వాలు కల్పించాయి. వారికి గృహ సంబంధం బాధ్యతల నిర్వహణకు అదనంగా, శరీర నిర్మాణపరంగా తలెత్తే ఆరోగ్య సంబంధమైన ఇబ్బందులను దృష్టికి ఉంచుకొని ప్రభుత్వం కల్పించిన సదుపాయాలలో ముఖ్యమైంది ప్రసూతి సెలవు. ప్రస్తుతం మన దేశంలో ప్రసూతి సెలవు 180 రోజుల వరకు లభిస్తుంది. అయితే ఇద్దరు లేదా అంతకన్నా తక్కువ సంఖ్యలో ఉన్న పిల్లలు ఉన్న మహిళా ఉద్యోగులకే ఈ సదుపాయం పరిమితం.

మంజూరైన ప్రసూతి సెలవు మొత్తం 180 రోజులకు పూర్తి జీతం లభిస్తుంది. సెలవు మంజూరు చేయించుకున్న పక్షంలో ప్రసూతిసెలవు తీసుకున్న ఉద్యోగికి ప్రతి నెలా జీతం పొందే హక్కు ఉంది. పురుషుల విషయానికి వస్తే 15 రోజుల వరకూ పితృత్వ సెలవులు ఉంటాయి. కాబట్టి, ఈ రెండు సెలవులను సిక్కిమ్ ప్రభుత్వం రెట్టింపు చేయబోతుంది. ఉద్యోగులకు మరింత వెసులుబాటు కల్పించేందుకు ఆ రాష్ట్ర ప్రభుత్వం చర్యలు చేపట్టింది.