వెయిటర్ నుంచి నటుడిగా ఎదిగిన దేవ్,,,చైనా పాఠ్యాంశాల్లో భారతీయుడి విజయగాథ

భారత్‌పై నిరంతరం విద్వేషంతో రగలిపోయే పొరుగు దేశం చైనా.. తన పాఠ్యాంశంలో ఓ భారతీయుడి విజయ ప్రస్థానాన్ని చేర్చిందంటే నమ్మగలమా?. కానీ, ఇది ముమ్మూటీకి నిజం. ఉత్తరాఖండ్‌ లోని ఓ కుగ్రామంలో జన్మించిన 46 ఏళ్ల దేవ్‌ రతూఢీ జీవిత ప్రయాణాన్ని చైనీయులు సిలబస్‌లో చేర్చారు. ఎక్కడో ఉత్తరాఖండ్‌లోని మారుమూల గ్రామంలో పుట్టి అనేక కష్టాలను ఎదుర్కొని పొట్టకూటి కోసం చిన్నాచితక పనులు చేస్తూ.. చైనాలో మోస్ట్ పాపులర్‌ నటుల్లో ఒకడిగా ఎదిగారు. ఆయన విజయగాథను విద్యార్థులకు తెలియజెప్పి వారిలో స్ఫూర్తిని కలిగించేందుకు చైనా అధికారులు పాఠ్యాంశంగా చేర్చారు. దీంతో దేవ్ రతూఢీ గురించి తీవ్ర చర్చ జరుగుతోంది.

ఉత్తరాఖండ్‌ రాష్ట్రం తెహ్రీ గర్వాల్ జిల్లా కెమ్రియా సౌర్‌ అనే ప్రాంతంలోని ఓ వ్యవసాయ కుటుంబంలో దేవ్‌ రతూఢీ జన్మించారు. చిన్నతనం నుంచి బ్రూస్‌ లీకి పెద్ద అభిమాని. ఆయనపై అభిమానంతోనే కరాటే ఛాంపియన్‌గా మారాలనుకున్నా కుటుంబ పరిస్థితులు అందుకు సహకరించలేదు. ఇంటర్ పూర్తిచేసిన తర్వాత పొట్టకూటి కోసం దేశ రాజధాని ఢిల్లీకి వచ్చి.. దాదాపు పదేళ్ల పాటు అక్కడ హోటల్స్, మాల్స్‌లో పనిచేశారు. ఆ తర్వాత 2005లో చైనాలోని ఓ భారత రెస్టారంట్‌లో వెయిటర్‌గా ఉద్యోగం లభించడంతో దేవ్ జీవితం మలుపు తిరిగింది.

చైనాలో నెలకు రూ.10వేల జీతంలో ఉద్యోగంలో చేరిన దేవ్‌.. అక్కడికి వెళ్లిన తర్వాత మార్షల్‌ ఆర్ట్స్‌లో శిక్షణ తీసుకునేందుకు ప్రయత్నించాడు. ఈసారీ ఆయనను ఆర్థిక ఇబ్బందులు వెంటాడాయి. దీంతో మార్షల్ ఆర్ట్స్‌పై ఆశలు వదులుకున్నాడు. 2013లో ఓ ప్రముఖ హోటల్‌లో మేనేజర్‌గా ఉద్యోగం సంపాదించి.. కొన్నాళ్లకు షియాన్‌ సిటీలో ‘రెడ్‌ ఫోర్ట్‌ ’ పేరుతో సొంతంగా రెస్టారెంట్‌ ప్రారంభించారు.

ఈ క్రమంలో చైనా డైరెక్టర్‌ ఒకరు దేవ్‌ రతూఢీ రెస్టారంట్‌కు 2017లో వచ్చారు. దేవ్‌ను చూసి సినిమాల్లో నటిస్తావా? అని అడగడం.. సంశయంగానే ఆయన అంగీకరించడం జరిగిపోయాయి. ‘స్వాట్‌’ అనే టీవీ సిరీస్‌లో ఓ చిన్న పాత్రలో మెరిశారు. అయితే, ఈ సిరీస్‌ సూపర్ హిట్‌ అయి, దేవ్‌ నటనకు మంచి గుర్తింపు వచ్చింది. ఆ తర్వాత వరుసగా అవకాశాలు ఆయన్ను వెతుక్కుంటూ రావడంతో దేవ్ జీవితం ఒక్కసారిగా మారిపోయింది. దేవ్‌ ఇప్పటివరకు 35 చైనీస్‌ సినిమాలు, టీవీ సీరియళ్లలో నటించారు. ఇప్పుడు అక్కడ పాపులర్‌ స్టార్‌గా మారారు.

ఇక, నటుడిగా వచ్చిన పాపులారిటీ ఆయన వ్యాపారానికి కూడా బాగా కలిసొచ్చింది. ప్రస్తుతం అక్కడ ఏకంగా ఎనిమిది రెస్టారంట్లను నిర్వహిస్తున్నారు. పొరుగు దేశంలో స్థిరపడినా మాతృభూమిపై మాత్రం ప్రేమను ఆయన మర్చిపోలేదు. అందుకే తన గ్రామానికి చెందిన 150 మందిని చైనాకు తీసుకెళ్లి తన రెస్టారెంట్‌లు, సంస్థల్లో ఉద్యోగాలుగా చేర్చుకున్నారు. దేవ్‌కు చెందిన ఓ రెస్టారంట్‌లో 70 మంది సిబ్బంది ఉండగా.. అందులో 40 మంది ఉత్తరాఖండ్‌ వాసులే కావడం విశేషం.

18 ఏళ్ల కిందట వెయిటర్‌గా కెరీర్‌ను ప్రారంభించి.. పాపులర్‌ నటుడిగా, బెస్ట్‌ సీఈవోగా దేవ్ ఎదిగిన తీరు.. ఆయన స్ఫూర్తిదాయక ప్రయాణం గురించి విద్యార్థులకు తెలియజేసి వారిలో ప్రేరణ కలిగించాలని షాంగ్జీ ప్రావిన్సుల అధికారురలు కీలక నిర్ణయం తీసుకున్నారు. దీంతో ఏడో తరగతి విద్యార్థుల ఇంగ్లిష్‌ పుస్తకంలో దేవ్‌పై ఓ పాఠ్యాంశాన్ని తీసుకొచ్చింది. ఇక, చైనా వెళ్లకముందే దేవ్‌ 1998లో బాలీవుడ్‌లో తన అదృష్టాన్ని పరీక్షించుకునేందుకు ప్రయత్నాలు చేశారు. పునీత్ ఇస్సార్ సినిమా ఆడిషన్‌‌కు వెళ్లినా సెలెక్ట్‌ కాలేదు..!

దేవ్ రతూఢీ మాట్లాడుతూ.. ‘నెలకు రూ.10,000 జీతంతో రెస్టారెంట్‌లో వెయిటర్‌గా పనిచేస్తున్నప్పుడు మాండరిన్‌లో (చైనా భాష) ప్రావీణ్యం సంపాదించాను. మార్షల్ ఆర్ట్స్‌లో శిక్షణ పొందాలనే నా కల నన్ను రాత్రిపూట మేల్కొనేలా చేసింది. శిక్షణ కోసం బౌద్ధమతానికి జన్మస్థలంగా, షావోలిన్ కుంగ్ ఫూకు గుర్తింపు పొందిన ప్రఖ్యాత ఆశ్రమం షావోలిన్ ఆలయానికి వెళ్లాలని అక్కడి స్థానికులు చెప్పడంతో నా మార్షల్ ఆర్ట్స్ ఆశలు అడియాశలయ్యాయి.. నాకు పట్టుదల తప్ప వేరే మార్గం లేదు. తర్వాత ఏడేళ్లు కష్టపడి ప్రముఖ రెస్టారెంట్‌లో మేనేజర్ స్థాయికి ఎదిగాను.. 2013లో జియాన్‌లో రెడ్ ఫోర్ట్ అనే నా స్వంత రెస్టారెంట్‌న్ ప్రారంభించాను.. నేను భారత్ గొప్ప సాంస్కృతిక వారసత్వం ఆధారంగా దీనిని రూపొందించాను’ అని అన్నారు.

‘నా పనితీరు చైనీస్ సినిమాల్లో పాపులర్‌గా మారడానికి సహకరించింది..కోవిడ్-19 మహమ్మారి సమయంలో నాకు సహాయం చేసిన స్థానికుల నుంచి నేను అపారమైన ప్రేమను పొందాను. వారు నన్ను వారి స్వంత మనిషిా స్వీకరించారు’ అని దేవ్ హర్షం వ్యక్తం చేశాడు. ప్రస్తుతం షియాన్‌లో తన భార్య అంజలి.. ఇద్దరు కుమారులు అర్వ (11), అర్నావ్ (9)తో కలిసి ఉంటున్నారు.