గ్రామంలో కాటికాపరిగా పనిచేస్తోన్న గంగాధర్,,,శ్మశానవాటిక వద్దే ఘనంగా వివాహం

చితి మంటలు, బంధువుల రోదనలు, భయంకరమైన నిశ్శబ్దం ఇవి శ్మశానంలో ఎప్పుడూ కనిపించే దృశ్యాలు. వాస్తవంగా శ్మశానవాటిక ప్రతి వ్యక్తి జీవిత చివరి ప్రయాణం. కానీ ఓ తండ్రి తన కుమార్తె కొత్త జీవితం ప్రారంభానికి ఈ ప్రదేశాన్ని వేదికగా ఎంచుకున్నాడు. శ్మశానవాటికలో మంగళవాయిద్యాలు, వేద మంత్రాల నడుమ.. బంధు మిత్రుల సమక్షంలో పెళ్లి జరుగుతుందని కలలోనైనా ఊహించగలమా?. అయితే, ఊహను నిజం చేశాడో తండ్రి. మూఢనమ్మకాలను పటాపంచలు చేస్తూ నేరుగా శ్మశానాన్న పెళ్లి మండపంగా చేసి.. కుమార్తె వివాహం జరిపించాడు. విస్తుగొలిపే ఈ ఘటన మహారాష్ట్రలోని అహ్మద్‌నగర్ జిల్లా రహతా పట్టణంలో చోటుచేసుకోగా.. ఈ పెళ్లి స్థానికంగా తీవ్ర చర్చనీయాంశమయ్యింది.

రహతా పట్టణానికి చెందిన గంగాధర్ గైక్వాడ్.. కాటికాపరిగా పనిచేస్తూ చాలా ఏళ్లుగా కుటుంబంతో కలిసి శ్మశాన వాటిక వద్దే నివాసం ఉంటున్నాడు. ఇతరులు అశుభంగా భావించే శ్మశానమే మహాసంజోగి వర్గానికి చెందిన ఆ కుటుంబానికి జీవనాధారంగా మారింది. గంగాధర్‌ కుమార్తె మయూరి అక్కడే ఉంటూ.. ఇంటర్ వరకూ చదివింది. ఈ క్రమంలో మయూరి విద్యాభ్యాసం పూర్తయిన తర్వాత పెళ్లి చేయాలని గంగాధర్ నిర్ణయించాడు. అయితే, తాను షిర్డీకి చెందిన మనోజ్ అనే యువకుడ్ని ప్రేమించానని కుమార్తె చెప్పడంతో అతడికిచ్చి పెళ్లిచేయడానికి అంగీకరించాడు.

ఈ పెళ్లికి ఇరు కుటుంబాలు అంగీకరించగా.. మయూరి పెరిగినచోటే ఆమె పెళ్లి చేయాలన్న గంగాధర్‌ సంకల్పించాడు. దీంతో శ్మశానవాటికలో పెళ్లి మండపం వేసి అంగరంగ వైభవంగా వివాహం జరిపించాడు. మయూరి, మనోజ్ పెళ్లి బంధు మిత్రులు, నగర పౌరుల సమక్షంలో దిగ్విజయంగా జరిగింది. సంగీత్, బారాత్ వేడుకల నిర్వహించారు. ఈ వివాహానికి గ్రామస్థులు కూడా తమవంతు సహకారం అందించారు. నగర మాజీ మేయర్లు, ఇతర నాయకులు ఈ వివాహ వేడుకలో పాల్గొని నవదంపతులను ఆశీర్వదించారు.

మూఢనమ్మకాలను పారద్రోలేందుకు ఈ వివాహం ఓ ఉదాహరణగా నిలిచింది. ప్రముఖ సామాజిక కార్యకర్త దశరథ్ తూపే ఈ పెళ్లికి హాజరై గంగాధర్ ప్రయత్నాన్ని అభినందించారు. మనోజ్, మయూరి కొత్త జీవితాన్ని నేరుగా స్మశానవాటికలో ప్రారంభించారు. ఇంటర్‌లో ఉండగా.. షిర్డీకి చెందిన మనోజ్ జైస్వాల్‌తో మయూరికి పరిచయం ఏర్పడింది. ఆ తర్వాత ఇద్దరూ షిర్డీలోని ఓ చోట పని చేస్తూ స్నేహితులయ్యారు. తర్వాత ఈ స్నేహం ప్రేమగా మారింది. దీంతో ఇరువురూ పెళ్లి చేసుకోవాలని అనుకున్నారు. ఇందుకు పెద్దలు కూడా అంగీకరించడంతో ఎటువంటి ఆటంకం లేకుండా సాఫీగా పెళ్లి జరిగిపోయింది.