విద్యార్థినుల బాత్రూం వీడియోలు తీసిన యువతులు,,,సోషల్ మీడియాలో వైరల్ కావడంతో చర్యలు

యువతులు బాత్‌రూమ్‌లోకి వెళ్లిన ప్రైవేటు వీడియోలను తీశారు తోటి విద్యార్థినులు. అయితే వీడియోలు తీస్తున్నట్లు అనుమానం వచ్చిన ఓ బాధిత విద్యార్థి.. కాలేజీ యాజమాన్యంతోపాటు పోలీసులకు ఫిర్యాదు చేసింది. దీంతో ఈ విషయం వెలుగులోకి వచ్చింది. అయితే ఒక వర్గం వారి ప్రైవేటు వీడియోలను మరో వర్గం వారు తీశారన్న ఆరోపణలు రావడం ఈ ఘటనలో మరో ట్విస్ట్. దీంతో రంగంలోకి దిగిన పోలీసులు ముగ్గురు విద్యార్థినులపై కేసు నమోదు చేశారు. ఈ ఘటన కర్ణాటకలో చోటు చేసుకుంది. అయితే ఆ కళాశాల యాజమాన్యం నిందితులను సస్పెండ్‌ చేసినట్లు వెల్లడించింది. ఈ వ్యవహారం కర్ణాటకలో రాజకీయ దుమారానికి కారణమైంది.

ఉడుపి పట్టణంలోని ఓ మహిళా నర్సింగ్ కాలేజీకి ఈ దారుణం జరిగింది. ఆప్టోమెట్రీ కోర్సు చేస్తున్న విద్యార్థినులు బాత్‌రూమ్‌లోకి వెళ్లినపుడు గమనించి తోటి విద్యార్థినులు ఆ ప్రైవేటు వీడియోలను తీస్తున్నారనే ఆరోపణలు వచ్చాయి. ఈ ఘటనపై తమ ప్రైవేటు వీడియోలను మరో వర్గం విద్యార్థినులు తీస్తున్నారని ఓ బాధితురాలు మొదట కాలేజీ యాజమాన్యానికి తెలిపింది. అనంతరం వారు పోలీసులకు విషయాన్ని తెలియజేశారు. దీంతో రంగంలోకి దిగి విచారణ చేపట్టిన పోలీసులు.. ముగ్గురు విద్యార్థులపై ఎఫ్‌ఐఆర్‌ నమోదు చేశారు. అయితే ఈ ఘటనకు సంబంధించిన ఓ వీడియో మొదట ఓ యూట్యూబ్‌ ఛానెల్‌లో ప్రత్యక్షమైనట్లు పోలీసులు గుర్తించారు. ఆ తర్వాత దాన్ని ఓ వ్యక్తి ట్విటర్‌లో ఉంచినట్లు తేల్చారు.

విద్యార్థినుల ప్రైవేటు వీడియోలు తీయడం.. వాటిని సోషల్ మీడియాల్లో పెట్టడానికి సంబంధించి 2 ఎఫ్‌ఐఆర్‌లు నమోదు చేసినట్లు ఉడుపిలోని మాల్పే పోలీసులు వెల్లడించారు. బాధితురాలి ఫిర్యాదుతోపాటు సుమోటోగా మరో కేసును కూడా నమోదు చేశామని చెప్పారు. అనంతరం ఇంత పెద్ద ఘటన జరిగినా నిర్లక్ష్యంగా ఉన్న కాలేజీ యాజమాన్యంపైనా కేసు నమోదు చేశామని పోలీసులు వెల్లడించారు. అయితే ఈ ఘటన రెండు వర్గాలకు సంబంధించినది కావడంతో.. కొందరు మతవిద్వేషాలు రెచ్చగొడుతున్నారనే అభియోగాలను కూడా నమోదు చేసినట్లు వివరించారు.

దీంతో ఈ ఘటన రాజకీయంగా తీవ్ర దుమారానికి కారణమైంది. ఇంతటి దారుణానికి పాల్పడిన విద్యార్థినులను వెంటనే అరెస్టు చేయాలని బీజేపీ డిమాండ్‌ చేసింది. అనంతరం కర్ణాటక వ్యాప్తంగా ఆందోళనకు పిలుపునిస్తున్నట్లు ప్రకటించింది. ఈ ఘటనతో ఎలాంటి అవాంఛనీయ సంఘటనలు జరగకుండా పోలీసులు పటిష్ఠ చర్యలు చేపడుతున్నారు. రెండు వర్గాల మధ్య జరిగిన ఘర్షణగా కాకుండా ఒక కళాశాలలో చోటు చేసుకున్న ఘటనగా మాత్రమే చూస్తున్నట్లు తెలుస్తోంది. ఈ నేపథ్యంలోనే బందోబస్తు నిర్వహించారు.