తీసుకున్న అప్పు చెల్లించలేదని,,, భర్త ముందే భార్యపై అత్యాచారానికి ఒడిగట్టిన వడ్డీ వ్యాపారి

అప్పు. ఈ మాట వింటేనే చాలా మంది భయపడిపోతూ ఉంటారు. అయితే తప్పని పరిస్థితుల్లో అప్పు చేయాల్సిన పరిస్థితులు ఏర్పడతాయి. అత్యవసర పరిస్థితుల్లో ఎంత వడ్డీకైనా అప్పు తెచ్చుకోవాల్సి ఉంటుంది. దాని కోసం ఇల్లు, భూమి, ఆస్తులు ఇలా దేన్నైనా తాకట్టు పెట్టి రుణం తీసుకుంటూ ఉంటారు. అయితే ఓ వ్యక్తి తాను తీసుకున్న అప్పు తీర్చడంలో ఆలస్యం కావడంతో.. డబ్బులు ఇచ్చిన వ్యక్తి ఇంటికి వచ్చాడు. అతడ్ని బెదిరించి అతని కళ్లముందే అతని భార్యపై అత్యాచారానికి పాల్పడ్డాడు. దీనికి సంబంధించిన వీడియోను సోషల్ మీడియాలో పోస్ట్ చేయడంతో అది కాస్త వైరల్‌గా మారింది. అనంతరం బాధితురాలి ఫిర్యాదుతో కేసు నమోదు చేసుకున్న పోలీసులు.. నిందితుడిని అరెస్ట్ చేసి జైలుకు పంపించారు.

ఈ అమానవీయ ఘటన మహారాష్ట్రలోని పూణేలో చోటు చేసుకుంది. హడప్సర్ గవర్నమెంట్ కాలనీలో ఉండే ఓ దంపతులకు అర్జంటుగా డబ్బులు కావాల్సి వచ్చింది. అయితే స్థానికంగా ఉండే ఇంతియాజ్ షేక్ అనే వ్యక్తి వద్దకు అప్పు కోసం వెళ్లారు. ఈ ఏడాది ఫిబ్రవరిలో ఇంతియాజ్ షేక్ నుంచి రూ. 40 వేలు అప్పుగా తీసుకున్నారు. అయితే త్వరలోనే ఆ అప్పును తీర్చేస్తామని చెప్పారు. ఇచ్చిన గడువు తీరినప్పటికీ వారు ఆ అప్పును చెల్లించలేకపోయారు. ఆర్థిక సమస్యలు, సమయానికి డబ్బు అందకపోవడంతో వారు ఆ రుణం కట్టలేక పోయారు. దీంతో వారి ఇంటికి వచ్చిన ఇంతియాజ్‌ షేక్.. తన అప్పు ఎలాగైనా చెల్లించాలని బెదిరింపులకు దిగాడు.

ఇలా కొన్నిరోజుల గడిచిన తర్వాత ఓ రోజు ఇంతియాజ్ షేక్.. వారి ఇంటికి కత్తి తీసుకుని వచ్చాడు. అప్పు తీసుకున్న వ్యక్తిని చంపుతానని కత్తితో భయపెట్టి అతని భార్యపై అత్యాచారానికి ఒడిగట్టాడు. ఆపై ఆ దుర్మార్గపు పనిని తన ఫోన్‌లో వీడియో తీసుకున్నాడు. ఆ తర్వాత కూడా ఆ వీడియో చూపించి బెదిరించి పలుమార్లు రేప్ చేయడానికి ప్రయత్నించాడు. ఆమె ఒప్పుకోకపోవడంతో ఆ వీడియోను సోషల్ మీడియాలో ఉంచాడు. దీంతో ఆ వీడియో కాస్త వైరల్‌ అయింది. ఈ విషయం ఆ అప్పు తీసుకున్న దంపతుల వద్దకు చేరడంతో వారు అవమానంగా భావించారు.

వెంటనే భార్యాభర్తలు ఇద్దరు పోలీసులను ఆశ్రయించాడు. జరిగిన విషయం మొత్తం చెప్పారు. తాము తీసుకున్న అప్పు చెల్లించడంలో విఫలం అయినందుకు ఇంతియాజ్ షేక్ అనే వ్యక్తి తన భార్యపై అత్యాచారానికి పాల్పడ్డాడని ఆ తర్వాత వీడియో తీసి సోషల్‌ మీడియాలో పోస్ట్ చేశాడని ఫిర్యాదు చేశాడు. దీంతో కేసు నమోదు చేసుకున్న పోలీసులు నిందితుడిని అరెస్టు చేశారు. అనంతరం కోర్టులో ప్రవేశపెట్టి రిమాండ్‌కు తరలించారు.