బస్సుల్లో మొదటి ప్యాసింజర్‌గా మహిళలే,,,,సూచించిన మహిళా కమిషన్

ప్రస్తుత సమాజం రోజురోజుకూ ఎంత అభివృద్ధి చెందుతున్నా.. కొంతమంది మాత్రం పాత కాలపు మూఢ విశ్వాసాలనే నమ్ముతూ ఉంటారు. చిన్న పిల్లలు ఇది చేయవద్దు.. వృద్ధులు అది చేయకూడదు.. మహిళలు అక్కడికి రాకూడదు.. పురుషులు ఇక్కడికి రాకూడదు అంటూ రకరకాలుగా కొత్త కొత్త భయాలు సృష్టిస్తూ ఉంటారు. అయితే ఇలాంటి సంఘటనే తాజాగా ఒకటి చోటు చేసుకుంది. బస్సులోకి మొదటి ప్రయాణికులుగా మహిళలను ఎక్కనీయలేదంటూ కొంత మంది ఆరోపణలు చేశారు. మహిళలు ఎక్కితే అపశకునమని బస్సు సిబ్బంది వారిని అడ్డుకున్నట్లు తెలిపారు. ఈ ఘటనపై రాష్ట్ర మహిళా కమిషన్ తీవ్రంగా స్పందించింది. ఈ ఘటన ఒడిశాలో చోటు చేసుకుంది.

ఒడిశా రాజధాని భువనేశ్వర్‌ బారాముండా బస్టాండ్‌లో ఈ సంఘటన జరిగింది. బస్సులోకి ఓ మహిళ ఎక్కుతుండగా.. అక్కడ ఉన్న బస్సు సిబ్బంది అడ్డుకున్నారు. దీంతో ఈ ఘటనపై ఒడిశా మహిళా కమిషన్‌కు.. సోనేపుర్‌కు చెందిన సామాజిక కార్యకర్త ఘసిరామ్ పాండా ఫిర్యాదు చేశారు. బస్సులో మహిళ మొదట ఎక్కడాన్ని కొంతమంది అపశకునంగా భావించి అడ్డుకున్నట్లు ఆ పిటిషన్‌లో తెలిపారు. ఈ ఘటనపై తీవ్రంగా స్పందించిన ఒడిశా మహిళా కమిషన్‌ విచారణ మొదలు పెట్టింది.

బస్సులో అందరికంటే ముందు ఓ మహిళ మొదట ఎక్కితే.. ఆ రోజు బస్సు ప్రమాదానికి గురవుతుందని.. లేదా ప్రయాణికులు సరిగా ఎక్కరని కొంతమంది మూఢనమ్మకమని గుర్తించారు. ఇందులో నుంచి ఈ మహిళలను వివక్షగా చూడటం ప్రారంభించినట్లు తేల్చారు. ఈ నేపథ్యంలోనే ఈ ఘటనను ఒడిశా మహిళా కమిషన్ చాలా సీరియస్‌గా తీసుకుంది. ఇందులో భాగంగానే ఒడిశా రవాణాశాఖకు కీలక సూచనలు చేసింది. ఇప్పటి నుంచి బస్సుల్లో మొదటగా మహిళలను ఎక్కేందుకు అనుమతించాలని ఆదేశాలు జారీ చేయాలని పేర్కొంది. ఇంతకు ముందు కూడా ఇలాంటి ఘటనలు తమ దృష్టికి వచ్చాయని ఒడిశా మహిళా కమిషన్ తెలిపింది. ఇప్పటి నుంచి మహిళలకు ప్రయాణంలో ఎలాంటి అసౌకర్యం కలగకుండా.. వారి భద్రత, గౌరవాలను కాపాడాలని కమిషన్ సూచనలు చేసింది. ప్రభుత్వ, ప్రైవేటు బస్సుల్లో మొదటి ప్యాసింజర్‌గా మహిళలను అనుమతించేలా చర్యలు తీసుకోవాలని సూచించారు. అందుకోసం సిబ్బందికి అవగాహన కల్పించాలని.. బస్సుల్లో మహిళల రిజర్వేషన్‌ను 50 శాతానికి పెంచాలని మహిళా కమిషన్ పేర్కొంది.