పవన్ శునకానందం పొందుతున్నారంటూ అంబటి రాంబాబు ఫైర్

పవర్ స్టార్ పవన్ కళ్యాణ్, సాయిధరమ్ తేజ్ ప్రధాన పాత్రల్లో తెరకెక్కిన ‘బ్రో’ సినిమా శుక్రవారం విడుదలై బాక్సాఫీసు వద్ద దూసుకుపోతోంది. తొలిరోజు ప్రపంచ వ్యాప్తంగా రూ.49 కోట్ల మేర గ్రాస్ వసూలు చేసి మరోసారి పవర్ స్టార్ స్టామినాను నిరూపించింది. అయితే, ఈ సినిమా సాధారణ ప్రేక్షకుల కంటే పవన్ కళ్యాణ్ అభిమానులకు విపరీతంగా నచ్చేసింది. దానికి కారణం ఈ సినిమాలో వింటేజ్ పవన్ కళ్యాణ్‌ను చూపించడమే. అంతేకాదు, పరోక్షంగా ఏపీ సీఎం వై.ఎస్.జగన్, నీటిపారుదల శాఖ మంత్రి అంబటి రాంబాబుపై వేసిన పంచులు, డైలాగులు కూడా పవర్ ఫ్యాన్స్‌ను విపరీతంగా ఆకట్టుకుంటున్నాయి.

అయితే, అంబటి రాంబాబు డాన్స్‌ను ఉద్దేశించి సినిమాలో క్రియేట్ చేసిన ఒక సీన్ నిన్న సోషల్ మీడియాలో బాగా వైరల్ అయ్యింది. గతంలో బోగి పండుగ సందర్భంగా సత్తెనపల్లిలో లంబాడి మహిళలతో కలిసి అంబటి రాంబాబు రోడ్డుపై డాన్స్ చేశారు. ఆ డాన్స్‌ను ఎగతాళి చేస్తూ ‘బ్రో’ సినిమాలో ఒక పాటలో చిన్న సీన్ పెట్టారు. రాంబాబు పాత్రను పోలి ఉన్న శ్యాంబాబు పాత్రను కమెడియన్ పృథ్వీ పోషించారు.

శ్యాంబాబు వేస్తున్న స్టెప్పులకు టైటన్(పవన్ కళ్యాణ్)కు చిర్రెత్తుకొస్తుంది. వెంటనే మ్యూజిక్ ఆపమని శ్యాంబాబుకు టైటన్ క్లాసు పీకుతాడు. అయితే, ఇది రాంబాబును పోలిన పాత్రేనని గుర్తుపట్టిన పవన్ కళ్యాణ్ అభిమానులు నిన్న సోషల్ మీడియాలో ట్రోల్ చేశారు. గతంలో అంబటి రాంబాబు డాన్స్ చేసినప్పుడు వేసుకున్న టీషర్ట్‌ను పోలి ఉన్న టీషర్ట్‌నే సినిమాలో పృథ్వీకి వేయడం గమనార్హం. దీంతో ట్రోలింగ్ మరింత ఎక్కువైంది. అంబటి రాంబాబుకు పవర్ స్టార్ భలే పంచ్ ఇచ్చాడని ఫ్యాన్స్ మురిసిపోయారు.

అయితే, ఈ అంశంపై మంత్రి అంబటి రాంబాబు స్పందించారు. శనివారం పోలవరం డ్యామ్‌కు సంబంధించి విజయవాడలో రాంబాబు ప్రెస్ మీట్ నిర్వహించారు. ఈ ప్రెస్ మీట్‌లో మీడియా ప్రతినిధులు ‘బ్రో’లో సీన్ గురించి రాంబాబును అడిగారు. ఆయన కూడా స్పందించి పవన్ కళ్యాణ్‌‌కు కౌంటర్ ఇచ్చారు. పవన్ కళ్యాణ్‌ రాజకీయంగా తనను ఎదుర్కోలేక.. సినిమాల్లో తనను పోలిన పాత్రను పెట్టి, దూషించి శునకానందం పొందుతున్నారని విమర్శించారు.

‘నా మీద కోపం ఉంటే రాజకీయంగా మాట్లాడవయ్యా. రాజకీయంగా ఏమైనా చెయ్యి. రాజకీయంగా ఏమీ చేయలేని అసమర్థుడవి. నన్ను ఎదర్కోలేకపోతున్నావు. అందువల్ల ఆయనెవరో డబ్బులు ఖర్చుపెడితే, ఆ సినిమాలో నువ్వు యాక్ట్ చేస్తూ, నా క్యారెక్టర్ ఒకటి క్రియేట్ చేసి, దానికి శ్యాంబాబు అని పేరు పెట్టి, దాన్ని పట్టుకుని నువ్వు తిట్టి ఆనంద పడుతున్నావు. దీన్ని ఏం ఆనందం అంటారో తెలుసా.. శునకానందం. ఆ శునకానందం పడే పరిస్థితిని పవన్ కళ్యాణ్ దిగజారిపోయాడు. సంతోషం.. ఇలా శునకానందం పడుతూ ఉండడమే తప్ప నీకు వేరే మార్గంలేదు’ అని అంబటి రాంబాబు చురకలు అంటించారు.

‘నేను డాన్స్ చేశాను. ఏ సందర్భంలో వేశాను? రోజూ ఎవడో నాకు డబ్బులిస్తే డాన్స్ చేయను. ఎవడి దగ్గరో ప్యాకేజ్ తీసుకుని డాన్స్ చేయను. రోజూ అసెంబ్లీకి వస్తా డాన్స్ చేయను. అది నా వృత్తి కాదు. దాన్ని డాన్స్ అనడం కంటే.. ఆనంద తాండవం అనాలి. సంక్రాంతి బోగి మంటల్లో నేను ముగ్గుల పోటీలు పెట్టి అద్భుతంగా వేడుక చేసి ఆరోజున ఆనంద తాండవం చేస్తా. అది నాకు అలవాటు. ఈ సంవత్సరం చేశాను.. అంతకు ముందు సంవత్సరం చేశాను. అది పట్టుకుని సినిమాల్లో పెట్టి శునకానందం పడిపోతున్నావే! చంద్రబాబు దగ్గర ప్యాకేజ్ తీసుకుని డాన్స్ వేసే నువ్వు నా డాన్స్‌ని కామెంట్ చేసే పరిస్థితికి దిగజారిపోయావు పాపం. సంక్రాంతికి నేను వేసే డాన్స్.. గెలిచినోడు వేసే డాన్స్ అది. సత్తెనపల్లిలో గెలిచి మంత్రి అయ్యి సంక్రాంతి పండుగకు డాన్స్ వేశా. గెలిచినోడు డాన్స్ చేస్తే సంక్రాంతి.. ఓడినోడు డాన్స్ చేస్తే చీకటిరాత్రి’ అంటూ తనదైన శైలిలో మాటల తూటాలు వదిలారు అంబటి రాంబాబు.