అనారోగ్యం నుంచి కోలుకున్న లాలూ,,,బ్యాడ్మింటన్ ఆడుతున్న వీడియో విడుదల

ఆర్జేడీ అధ్యక్షుడు, బిహార్‌ మాజీ ముఖ్యమంత్రి లాలూ ప్రసాద్‌ యాదవ్‌ అనారోగ్యం నుంచి పూర్తిగా కోలుకున్నట్లే కనిపిస్తోంది. తాజాగా లాలూకు సంబంధించిన వీడియోను ఆయన కుమారుడు తేజస్వీ యాదవ్ ఇన్‌స్టాగ్రామ్‌లో పోస్ట్ చేశారు. ఈ వీడియోలో లాలూ ప్రసాద్ యాదవ్ నవ్వుతూ బ్యాడ్మింటన్ ఆడుతున్నారు. ఇటీవల బెంగళూరులో జరిగిన ఇండియా కూటమి సమావేశంలో లాలూ ప్రసాద్ యాదవ్ పాల్గొన్నారు. అంతకుముందు కొన్ని నెలల కింద అనారోగ్యంతో పరిస్థితి తీవ్రంగా మారడంతో ఢిల్లీలోని ఎయిమ్స్‌లో లాలూ ప్రసాద్ చికిత్స పొందారు. అనంతరం కిడ్నీ పాడైపోవడంతో సింగపూర్ వెళ్లి కిడ్నీ మార్పిడి కూడా చేసుకున్నారు. లాలూకు ఆయన కుమార్తె రోహిణి కిడ్నీ దానం చేశారు.

ఈ వీడియోను పంచుకున్న తేజస్వీ యాదవ్.. కేంద్రంలోని నరేంద్ర మోదీ సర్కార్‌పై తీవ్ర విమర్శలు గుప్పించారు. మోదీ సర్కారు అనుసరిస్తున్న ప్రజా వ్యతిరేక విధానాలను ప్రశ్నించినందుకే తన తండ్రిపై.. తన కుటుంబంపై కేంద్ర ప్రభుత్వం.. కేంద్ర దర్యాప్తు సంస్థలను ఉసిగొల్పిందని తేజస్వీ యాదవ్ వెల్లడించారు. లాలూ ప్రసాద్ యాదవ్‌కు భయం అంటే ఏంటో తెలియదని.. జైలుకు ఏ మాత్రం భయపడరని తెలిపారు. కేంద్ర ప్రభుత్వ విధానాలపై నిరంతరం పోరాటం చేస్తూనే ఉంటారని.. ఈ పోరాటంలో చివరికి విజయం సాధిస్తారని ఇన్‌స్టాగ్రామ్‌లో తేజస్వీ యాదవ్ పోస్టు చేశారు.

దాణా కుంభకోణం కేసులో దోషిగా తేలిన లాలూ ప్రసాద్ యాదవ్ జైలు శిక్ష అనుభవిస్తున్నారు. అయితే ఆయనకు తీవ్ర అనారోగ్య సమస్య రావడంతో బెయిల్‌పై కొన్ని నెలల కిందట బయటికి వచ్చారు. కిడ్నీ సంబంధిత వ్యాధితో బాధపడుతున్న లాలూ ప్రసాద్ యాదవ్ ఢిల్లీ ఎయిమ్స్‌లో చికిత్స పొందారు. చివరికి సింగపూర్‌లో ఉండే ఆయన కుమార్తె రోహిణీ.. లాలూకు కిడ్నీ ఇవ్వడంతో గతేడాది డిసెంబరులో శస్ర్త చికిత్స నిర్వహించారు. ఈ ఆపరేషన్ తర్వాత లాలూ ప్రసాద్ యాదవ్ తిరిగి ఢిల్లీకి చేరుకున్నారు. ఇటీవల ఆరోగ్యం మెరుగుపడటంతో ఆయన బయటికి వస్తున్నారు.

లాలూపై ఇటీవల సీబీఐ మరో కేసు నమోదు చేసింది. కేంద్రమంత్రిగా ఉన్న సమయంలో రైల్వేలో ఉద్యోగాలు ఇప్పించేందుకు కొందరు అభ్యర్థుల నుంచి భూములు తీసుకున్నారని ఎఫ్ఐఆర్ నమోదు చేసింది. ఈ కేసులో లాలూతో పాటు ఆయన భార్య రబ్రీ దేవి, కుమార్తెలు మీసా భారతి, హేమలతో పాటు పలువురు అభ్యర్థులపైనా కేసులు పెట్టారు. ఇందులో భాగంగా ఢిల్లీ, పాట్నా, గోపాల్‌గంజ్‌లోని లాలూ ఇళ్లు కార్యాలయాల్లో తనిఖీలు నిర్వహించింది. 2004 నుంచి 2009 వరకు రైల్వే మంత్రిగా ఉన్న లాలూ.. 2008 - 2009 మధ్య జరిగిన రైల్వే ఉద్యోగాలకు నియామక ప్రక్రియలో అవకతవకలు జరిగినట్లు ఆరోపణలు వచ్చాయి.