మణిపూర్‌లో రెండు రోజులపాటు ప్రతిపక్ష ఎంపీల పర్యటన,,,, బీజేపీ తీవ్ర విమర్శలు

మణిపూర్‌లో కుకీ, మెయితీ తెగల ఘర్షణ.. అనంతరం హింసాత్మక ఘటనలు చోటు చేసుకోవడం దేశవ్యాప్తంగా తీవ్ర చర్చనీయాంశంగా మారిన విషయం తెలిసిందే. ఇద్దరు మహిళలను నగ్నంగా చేసి ఊరేగించి.. అనంతరం అందులోని ఓ మహిళపై అత్యంత క్రూరంగా సామూహిక అత్యాచారానికి పాల్పడిన ఘటన యావత్ దేశాన్ని కలిచివేసింది. దీనికి సంబంధించిన వీడియో పార్లమెంటు వర్షాకాల సమావేశాలకు ఒకరోజు ముందు వైరల్‌ కావడం తీవ్ర విమర్శలకు దారితీసింది. దీంతో అప్పటి నుంచి పార్లమెంటు ఉభయ సభలు.. రోజూ వాయిదాలతోనే కాలం వెళ్లదీస్తున్నాయి. ఈ నేపథ్యంలోనే దేశంలోని విపక్షాలకు సంబంధించిన ఇండియా కూటమికి చెందిన 21 మంది ఎంపీల బృందం మణిపూర్‌లో రెండు రోజుల పాటు పర్యటించనుంది. ఈ నేపథ్యంలో అధికార బీజేపీ తీవ్ర విమర్శలు చేసింది.

దాదాపు మూడు నెలలుగా జాతి హింస చెలరేగుతున్న ఈశాన్య రాష్ట్రంలోని పరిస్థితిని అంచనా వేయడానికి 21 మంది సభ్యుల ప్రతిపక్ష ప్రతినిధి బృందం నేడు మణిపూర్‌లో పర్యటించనుంది. అయితే వీరి పర్యటనపై బీజేపీ నేతలు తీవ్ర విమర్శలు గుప్పించారు. మణిపూర్‌లో పర్యటించే కాంగ్రెస్ పార్టీ నేత అధీర్ రంజన్ చౌదరీ.. ఆయన సొంత రాష్ట్రమైన పశ్చిమ బెంగా‌ల్‌లో మహిళలపై జరిగే నేరాలను సమర్థిస్తారా అని కేంద్రమంత్రి అనురాగ్ ఠాకూర్ ప్రశ్నించారు. మణిపూర్‌లో పర్యటించే విపక్ష ఎంపీలు పశ్చిమ బెంగాల్, రాజస్థాన్ రాష్ట్రాల్లో మహిళలపై జరిగే ఆకృత్యాలపై నివేదికలు ఇస్తారా అని అనురాగ్ ఠాకూర్ నిలదీశారు. వారికి అంత ధైర్యం ఉందా అని ప్రశ్నించారు. మణిపూర్‌లో పర్యటించి అక్కడ నిజానిజాలను తెలుసుకుని.. పార్లమెంటు ముందు ఉంచుతామని.. కాంగ్రెస్‌కు చెందిన గౌరవ్ గొగోయ్ వెల్లడించారు. సమస్యను పరిష్కారం చూపడంలో ప్రభుత్వం విఫలమైనందున.. తాము అక్కడకు వెళ్లి సమస్యకు పరిష్కారం ఏంటో కనుగొనాలనుకుంటున్నట్లు తృణమూల్ కాంగ్రెస్ ఎంపీ సుస్మితా దేవ్ చెప్పారు. మణిపూర్ పరిస్థితిని వినాల్సిన అవసరం ఉందని.. ఆర్జేడీ నేత మనోజ్ ఝా తెలిపారు.

ఈ 21 మంది ఎంపీల బృందంలో కాంగ్రెస్‌కు చెందిన అధిర్ రంజన్ చౌదరి, గౌరవ్ గొగోయ్, తృణమూల్‌ కాంగ్రెస్‌కు చెందిన సుస్మితా దేవ్.. డీఎంకే పార్టీ తరఫున కనిమొళి, ఆర్జేడీకి చెందిన మనోజ్ కుమార్ ఝా, జేడీయూ చీఫ్ రాజీవ్ రంజన్ సింగ్ ఉన్నారు. ప్రతిపక్ష పార్టీలన్నీ కలిసి ఇండియా కూటమిగా ఏర్పడిన తర్వాత ఇలా అన్ని పార్టీలకు చెందిన నేతల బృందం ఒక రాష్ట్రానికి వెళ్లడం ఇదే తొలిసారి కావడం గమనార్హం. రెండు రోజుల పర్యటనలో భాగంగా మొదట ఇంఫాల్‌లో దిగనున్నారు. అక్కడి నుంచి కుకీ, మెయితీల మధ్య తొలుత ఘర్షణలు చెలరేగిన చురాచంద్‌పూర్‌కు చేరుకుంటారు. అక్కడ అక్కడ కుకీ తెగ నాయకులు, ప్రజా సంఘాలు, మహిళా సంఘాలతో సమావేశం కానున్నారు. అనంతరం ప్రభుత్వం ఏర్పాటు చేసిన సహాయక శిబిరాల వద్దకు చేరుకుని బాధితులను కలిసి వారి సమస్యలను విననున్నారు. అనంతరం ఇంఫాల్‌కు తిరిగి వచ్చి అక్కడ మెయితీ తెగకు చెందిన ప్రజలతో మాట్లాడనున్నారు.

పార్లమెంటు వర్షాకాల సమావేశాలు ప్రారంభమైనప్పటి నుంచి మణిపూర్ సమస్యతో ఉభయసభల్లో తీవ్ర గందరగోళం తలెత్తింది. మణిపూర్ అంశంపై సుదీర్ఘ చర్చ చేపట్టాలని విపక్షాలు డిమాండ్ చేస్తున్నాయి. ఈ అంశంపై ప్రధాని మోదీ.. సమాధానం ఇవ్వాలని పట్టుబట్టడంతో సభలు సాగడం లేదు. అయితే కేంద్ర హోం శాఖ మంత్రి అమిత్‌ షా సమాధానం చెప్పేందుకు ముందుకు వచ్చినా ప్రతిపక్షాలు పట్టు వీడలేదు. ఈ నేపథ్యంలోనే కాంగ్రెస్ పార్టీ.. మోదీ సర్కార్‌పై అవిశ్వాస తీర్మానాన్ని తీసుకువచ్చింది. దీన్ని లోక్‌సభ స్పీకర్ ఆమోదించారు.

జూన్ 29, 30 వ తేదీల్లో కాంగ్రెస్ అగ్రనేత రాహుల్ గాంధీ మణిపూర్‌లో రెండు రోజులు పర్యటించారు. దానికి సరిగ్గా నెల రోజుల తర్వాత ఇండియా కూటమికి చెందిన ఎంపీల బృందం మణిపూర్‌లో పర్యటించనుంది. ఇప్పటికే మణిపూర్‌లోని పలువురు ఎమ్మెల్యేలు రాజీనామా చేయగా.. అవి తిరస్కరణకు గురయ్యాయి. ఈ నేపథ్యంలో ఆగస్టు మొదటి వారంలో అసెంబ్లీ సమావేశాన్ని నిర్వహించాలని ముఖ్యమంత్రి ఎన్ బీరెన్ సింగ్ ప్రభుత్వం నిర్ణయించింది. మణిపూర్‌లో మే 3 వ తేదీన హింస చెలరేగినప్పటి నుంచి ఇప్పటివరకు దాదాపు 200 మంది మరణించగా.. వేలాది మంది ఇళ్లు, ఊర్లు వదిలేసి నిరాశ్రయులయ్యారు.