మాజీ మంత్రి నారాయణకు షాక్..?,,,పోలీసులకు ఫిర్యాదు చేసిన తమ్ముడి భార్య ప్రియ

నారాయణ తనను వేధింపులకు గురి చేస్తున్నారంటూ వీడియో విడుదల చేసిన ఆయన తమ్ముడి భార్య పొంగూరి ప్రియ.. ఇప్పుడు ఏకంగా పోలీస్ స్టేషన్‌ మెట్లెక్కినట్లు తెలుస్తోంది. నారాయణపై ఇవాళ ఉదయం ఆమె పోలీసులకు ఫిర్యాదు చేసినట్లు కొంతమంది చెబుతుండగా.. ఫిర్యాదు చేయకముందే పోలీస్ స్టేషన్ నుంచి ఆమెను కుటుంబసభ్యులు తీసుకెళ్లిపోయినట్లు మరికొందరు చెబుతున్నారు. ఆమె పోలీస్ స్టేషన్‌కు ఫిర్యాదు చేసిన ఫొటోలు కూడా సోషల్ మీడియాలో వైరల్‌గా మారాయి. దీంతో ఫిర్యాదు చేసిందా? లేదా? అనేది కాస్త సస్పెన్స్‌గా మారింది.

ఆదివారం ఉదయం హైదరాబాద్‌లోని రాయదుర్గం పోలీసు స్టేషన్‌కు ప్రియా చేరుకున్నట్లు చెబుతున్నారు. అనంతరం నారాయణపై కంప్లైంట్ ఇచ్చిందని ప్రచారం సాగుతోంది. కానీ పోలీసులు మాత్రం దీనిపై భిన్నంగా స్పందిస్తున్నారు. ఒకరేమో ఫిర్యాదు చేసిందని అంటుంటే.. తమకేం తెలియదని మరికొంతమంది పోలీసులు చెబుతున్నారు. ఫిర్యాదు ఇవ్వకముందే ఫ్యామిలీ మెంబర్స్ వచ్చి ఆమెను బలవంతంగా తీసుకెళ్లినట్లు కొందరు పోలీసులు అంటున్నారు. దీంతో నారాయణపై ఫిర్యాదు చేసిందా? లేదా? అనే దానిపై మరింత స్పష్టత రావాల్సి ఉంది. పోలీసులు క్లారిటీ ఇస్తేనే మరిన్ని వివరాలు తెలిసే అవకాశముంటుంది.

నారాయణ తనను వేధించారంటూ ఇన్‌స్టాగ్రామ్ వేదికగా ప్రియ విడుదల చేసిన వీడియో ఇప్పుడు దుమారం రేపుతోంది. ఒక డేగలా తనపై కన్నేశారని, ఒక డేగలా ఒక పిట్టను ఎత్తుకెళ్లినట్లు తమ పరిస్థితి మారిందని ఆరోపించింది. ఇంట్లో భార్య ఉండగానే ఆయనకు అన్నం పట్టలేదని తనను కొట్టారని ఆరోపించింది. తనను టార్చర్‌ చేసేవారని, అర్ధరాత్రి సమయంలో కూడా తనను టార్చర్‌ పెడుతూ తీవ్రంగా హింసిస్తున్నారని సంచలన వ్యాఖ్యలు చేసింది. అయితే ప్రియ ఆరోపణలపై ఆమె భర్త సుబ్రహ్మణ్యం మాత్రం మరోలా స్పందిస్తున్నారు. తన భార్యకు మానసిక సమస్యలు ఉన్నాయని, అందుకే ఏవోవో మాట్లాడుతుందని ఓ వీడియో విడుదల చేశారు. దీంతో ఇప్పుడు నారాయణ కుటుంబ పంచాయతీ నెల్లూరు జిల్లా రాజకీయాల్లో హాట్‌టాపిక్‌గా మారింది.