ఆటోలోనే ప్రసవించిన గర్బిణీ,,,చికిత్స అందిస్తున్న వైద్యులు
Andhra Pradesh Telugu | Suryaa Desk | Published : Sun, Jul 30, 2023, 06:16 PM
గర్భిణులు ఆర్టీసీ బస్సులు, ట్రైన్లు, అంబులెన్సులలో ప్రసవించడం గురించి మనం వింటూ ఉంటాం. తాజాగా ఓ గర్భిణీ మహిళ ఆటోలోనే ప్రవవించింది. పురిటి నొప్పులు రావడంతో ఆటోలో ఆస్పత్రికి తరలిస్తుండగా అందులోనే బిడ్డకు జన్మనిచ్చింది. తల్లి, బిడ్డ సురక్షితంగా ఉండటంతో కుటుంబసభ్యులు ఊపిరిపీల్చుకున్నారు. నంద్యాలలో ఈ ఘటన చోటుచేసుకుంది. నంద్యాలలోని విశ్వనగర్కి చెందిన మల్లిక అనే గర్భిణీకి ఒక్కసారిగా పురిటి నొప్పులు వచ్చాయి. దీంతో భర్త ఆమెను ఆటోలో ఆస్పత్రికి తరలిస్తుండగా.. ఆటోలోనే మహిళ ప్రసవించి పండటి మగ బిడ్డకు జన్మనిచ్చింది. ఆటోలో ప్రభుత్వ ఆసుపత్రికి తీసుకెళ్లగా.. నొప్పులు ఎక్కువ కావడంతో ఆస్పత్రి ముఖద్వారం వద్దనే మహిళ గట్టిగా కేకలు వేసింది. దీంతో మాతా శిశు సంరక్షణ శాఖ విభాగానికి చెందిన వైద్యులు వెంటనే చేరుకున్నారు. ఆటోకి చుట్టుపక్కల చీరలు కట్టి ఆటోలోనే మహిళకు ప్రసవం చేశారు. అనంతరం మహిళను ఆస్పత్రి లోపలికి తరలించి చికిత్స అందించారు.
తల్లి, బిడ్డ ప్రస్తుతం సురక్షితంగా ఉన్నారని, ఎలాంటి ఇబ్బంది లేదని డాక్టర్లు తెలిపారు. అయితే ఆటోలో గర్భిణీలు ప్రసవించిన ఘటనలు గతంలో పలుచోట్ల అనేకం చోటుచేసుకున్నాయి. ఆటోలో ప్రయాణిస్తుండగా పురిటినొప్పులు రావడంతో చెట్ల చాటున ప్రసవం చేసిన ఘటనలు కూడా జరిగాయి. ఇప్పుడు మరోసారి అలాంటి ఘటన చోటుచేసుకోవడం చర్చనీయాంశంగా మారింది.
|
|