నా భార్య మానసిక సమస్యతో బాధపడుతుంది..మాజీ మంత్రి నారాయణ తమ్ముడు సుబ్రహ్మణ్యం

మాజీ మంత్రి, టీడీపీ సీనియర్ నేత నారాయణ తనను వేధిస్తున్నాడంటూ ఆయన తమ్ముడు పొంగూరు సుబ్రహ్మణ్యం భార్య ప్రియా పొంగూరు ఇన్‌స్టాగ్రామ్‌లో విడుదల చేసిన వీడియో కలకలం రేపుతోంది. ఈ వీడియోలో నారాయణ తనను హింసించి టార్చర్ పెట్టారని ఆమె సంచలన ఆరోపణలు చేశారు. ఈ వీడియో సోషల్ మీడియాలో దుమారం రేపుతుండటంతో.. ఎట్టకేలకు నారాయణ తమ్ముడు పొంగూరు సుబ్రహ్మణ్యం సోషల్ మీడియాలో స్పందించారు.

తన భార్యకు సంబంధించి పొంగూరు సుబ్రహ్మణ్యం కీలక విషయాలు బయటపెట్టారు. తన భార్య పొంగూరు ప్రియా మానసిక ఆరోగ్యంతో బాధపడుతున్నారని, మానసిక ఒత్తిడితో ఏవోవో వీడియోలు తీస్తుందని వ్యాఖ్యానించారు. ఆమె తమ కుటుంబంపై మాట్లాడిన వీడియోలను ఎవ్వరూ పట్టించుకోవద్దని సూచించారు. నారాయణపై ఆమె చేసిన ఆరోపణల్లో ఎలాంటి నిజం లేదని, మానసిక సమస్య కారణంగానే ఆమె అలా మాట్లాడుతుందని క్లారిటీ ఇచ్చారు.

అయితే ఇన్‌స్టాగ్రామ్ వీడియోలో ప్రియ మాట్లాడుతూ.. నారాయణ వ్యక్తిగత విషయాల గురించి కొన్ని వివరాలు బయటపెట్టింది. ఆయనకు ఇద్దరు భార్యలు ఉన్నారని, అయినా తనను అన్నం తీసుకురావాలని కొట్టేవారని ఆరోపించింది. గత అసెంబ్లీ ఎన్నికల్లో ప్రచారం చేయాలని ఇబ్బంది పెట్టారని, తన కుటుంబాన్ని కూడా వేధించినట్లు చెప్పుకొచ్చింది. తనను తీవ్రంగా హింసిస్తున్నారని, అర్థరాత్రి సమయంలో కూడా టార్చర్ పెడుతున్నారని సంచలన ఆరోపణలు చేసింది. పెళ్లి జరిగినప్పటి నుంచి తనకు నరకం చూపించారని, కానీ కుటుంబ విషయాలు బయట పెట్టకూడదనే ఉద్దేశంతో ఇప్పటివరకు సైలెంట్‌గా ఉన్నట్లు చెప్పుకొచ్చింది.

29 ఏళ్లుగా నారాయణ వల్ల నరకం అనుభవిస్తున్నానని, ఆయన వల్ల తనకు జరిగిన అన్యాయాన్ని బయటపెట్టేందుకు ఇప్పుడు సిద్దంగా ఉన్నట్లు వీడియోలో ప్రియ తెలిపింది. తనను చంపేస్తారేమోనని భయంగా ఉందని, ఎన్ని రోజులు బతుకుతానో తెలియదంది. అన్నీ విషయాలు బయటపెట్టిన తర్వాత చనిపోతానంటూ చెప్పింది. ఈ సందర్భంగా నారాయణ విద్యాసంస్థల్లో జరుగుతున్న విద్యార్థులు ఆత్మహత్యలపై కూడా ఆమె మాట్లాడింది. విద్యార్థులు ఎందుకు ఆత్మహత్యలు చేసుకుంటున్నారో త్వరలో అనేక విషయాలు బయటపెడతానని ఆమె పేర్కొంది.

ప్రియా వీడియో వైరల్ కావడంతో వైసీపీ నేతలు కూడా స్పందిస్తున్నారు. సొంత తమ్ముడి భార్యను కూడా నారాయణ వేధిస్తున్నారని, మహిళలపై టీడీపీ నేతలు అఘాయిత్యాలను పాల్పడుతున్నారని వైసీపీ ట్వీట్ చేసింది. ప్రశ్నిస్తానని పార్టీ పెట్టిన పవన్ కల్యాణ్ టీడీపీ నేతల అఘాయిత్యాలపై స్పందిస్తారా? అంటూ నిలదీసింది. భార్య ప్రియ వ్యాఖ్యలను భర్త ఖండించడం, నారాయణపై ప్రియ సంచలన వ్యాఖ్యలు చేయడంతో.. వారి కుటుంబంలో విబేధాలు ఉన్నాయనే ప్రచారం జరుగుతోంది.