విమానంలో తప్పతాగి తల్లీకూతుళ్లకు నరకం చూపించిన కామాంధుడు

విమానాల్లో వికృత చేష్టలకు పాల్పడటం, తోటి ప్రయాణికుల పట్ల అమర్యాదగా ప్రవర్తించిన ఘటనలు ఇటీవల కాలంలో తరుచూ చోటుచేసుకుంటున్నాయి. తాజాగా, విమానం ఎక్కిన తర్వాత ఓ వ్యక్తి అదేపనిగా తాగుతూ.. మద్యం మత్తులో తల్లీకుమార్తెలపై లైంగిక వేధింపులకు పాల్పడ్డాడు. అతడు వేధింపులను విమాన సిబ్బంది అడ్డుకోలేదు సరికదా.. బాటిళ్లకు బాటిళ్లు మద్యం అందిస్తూనే ఉన్నారు. ఈ భయానక ఘటన న్యూయార్క్ నుంచి ఏథెన్స్ వెళ్తోన్న డెల్టా ఎయిర్‌లైన్స్ విమానంలో జులై 26న చోటుచేసుకుంది. 9 గంటల పాటు అతడి వేధింపులను బాధితులు భరించాల్సి వచ్చింది.

ఈ ఘటనపై బాధితులు న్యాయస్థానాన్ని ఆశ్రయించారు. సదరు ఎయిర్‌లైన్స్‌పై 2 మిలియన్ డాలర్ల (దాదాపు రూ.16 కోట్లు)కు దావా వేశారు. న్యూయార్క్‌లోని ఈస్టర్న్ డిస్ట్రిక్ట్‌లో మంగళవారం వ్యాజ్యం దాఖలైనట్టు ఫాక్స్ న్యూస్ వెల్లడించింది. నిందితుడు తమ పట్ల దారుణంగా ప్రవర్తించాడని, చెప్పుకోలేని విధంగా తాకుతూ దాదాపు తొమ్మిది గంటల విమాన ప్రయాణంలో నరకం చూపించాడని ఆరోపించారు. లైంగిక వేధింపుల గురించి కనీసం సిబ్బంది పట్టించుకోలేదని, ఎటువంటి హెచ్చరికలు చేయకుండానే నిందితుడ్ని బయటకు వెళ్లిపోడానికి అనుమతించారని పేర్కొన్నారు.

ఫ్లైట్ అటెండెంట్‌లు అతడికి మద్యం బాటిళ్లను అదే పనిగా సరఫరా చేయడంతో ఒంటిపై సోయలేకుండా తాగాడని ఫిర్యాదులో తెలిపారు. మద్యం మత్తులో ఉన్న ప్రయాణికుడు బాధితుల పక్క సీటులో కూర్చున్నట్లు కోర్టు పత్రాలు పేర్కొన్నాయి. మద్యం తాగుతూ తొలుత బాలికతో మాట్లాడటానికి ప్రయత్నించాడు. బాలిక పట్టించుకోకపోవడంతో దూకుడు పెంచి ఆమెపై అరవడం ప్రారంభించాడు.

‘అసభ్యమైన సంజ్ఞలు చేస్తూ.. అడ్రస్ సహా మా గురించి ఇతర సమాచారాన్ని తెలుసుకోడానికి ప్రయత్నించాడు.. తన వీపుపై చేతులు వేసి భయపెట్టాడు’ అని వ్యాజ్యం పేర్కొంది. దీంతో బాలిక తల్లి జోక్యం చేసుకుని అతడ్ని వారించింది. అయినా సరే ఆ వ్యక్తి పట్టించుకోలేదు సరికదా ఆ మహిళ చేయి లాగాడు. తమపై గట్టిగా కేకలు వేయడంతో ఇతర ప్రయాణికులు విస్తుపోయారు. ఈ సమయంలో క్యాబిన్ సిబ్బందికి బాధితులు ఫిర్యాదు చేస్తే ఓపికగా ఉండమని సలహా ఇచ్చి వెళ్లిపోయారు. తాను కనెక్టికట్ నుంచి వచ్చానని గొణుగుతూ.. మైనర్‌ను మళ్లీ తాకడం ప్రారంభించాడు. వాళ్ల ముందున్న సీట్లను తన్ని దారుణంగా ప్రవర్తించాడు.

ది న్యూయార్క్ పోస్ట్ ప్రకారం.. ‘విమానంలో వారికి ఏమి జరిగింది అనేది కేవలం ఒక పీడకల కాదు.. ఇది పూర్తిగా నిరోధించదగింది’ అని వాది తరపు న్యాయవాది ఇవాన్ బ్రస్టీన్ చెప్పారు. ఫ్లైట్ అటెండెంట్ జోక్యం చేసుకుని వారితో మాట్లాడటం మానేయాలని నిందితుడికి చెప్పారు.. కానీ, అతడు తల్లి, టీనేజ్ బాలికను‘f---ing’ ‘బిచెస్’ అని అరిచాడు’ దావా ఆరోపించింది. తాము సీటు మార్చమని కోరితే.. పట్టించుకోలేదని బాధితులు ఆరోపించారు.