రాజకీయాల్లోకి రీ ఎంట్రీ ఇస్తారట,,ఆత్మీయులతో మనోహర్ భేటీ

టీడీపీ అధినేత చంద్రబాబుకు సొంత జిల్లాలో ఇప్పటికే కొన్ని నియోజకవర్గాలకు కొత్త ఇంఛార్జ్‌లను నియమించగా.. చిత్తూరు నియోజకవర్గం మాత్రం పెండింగ్‌లోనే ఉంది. అక్కడ ముందుండి నడిపించే నాయకుడు లేక కేడర్ గందరగోళంలో ఉంది. అధినేత చంద్రబాబు కూడా ఇప్పటి వరకు ఎవరికీ బాధ్యతలు అప్పగించలేదు. పార్టీ పిలుపునిచ్చిన కార్యక్రమాలను ద్వితీయశ్రేణి నాయకత్వమే నిర్వహిస్తోంది. ఈ క్రమంలో మాజీ ఎమ్మెల్యే మళ్లీ రాజకీయాల్లో యాక్టివ్ అయ్యేందుకు సిద్ధమయ్యారు. దీంతో ఆయన మళ్లీ టీడీపీ వైపు చూస్తున్నారనే టాక్ వినిపిస్తోంది.

చిత్తూరు నియోజకవర్గానికి చెందిన ఏఎస్ మనోహర్ కొంతకాలంగా రాజకీయాలకు దూరంగా ఉంటున్నారు. ఈ క్రమంలో ఆయన మళ్లీ రీ ఎంట్రీ ఇవ్వాలని భావిస్తున్నారు. ఈ మేరకు ఆయన చిత్తూరులో అభిమానులతో ఆత్మీయ సమావేశం ఏర్పాటు చేశారు. అభిమానుల నిర్ణయం మేరకు నడుచుకుంటానని.. వారి నిర్ణయమే అంతిమం అన్నారు. తన రాజకీయ జీవిత ప్రారంభం నుంచి ఎంతోమంది అభిమానులు, స్నేహితులు తనకు అండగా ఉంటూ వస్తున్నారని చెప్పుకొచ్చారు.

గత శాసనసభ ఎన్నికల్లో తన కోసం అభిమానులు, కార్యకర్తలు కష్టపడి పనిచేశారని.. అయినా కొన్ని కారణాలతో తాను ఓడిపోయానన్నారు. తన నిర్ణయాన్ని త్వరలోనే వెల్లడిస్తానని చెప్పారు. తన రాజకీయ ప్రస్థానానికి టీడీపీ ఎన్టీఆర్‌,చంద్రబాబు కారకులన్నారు. మున్సిపల్‌ చైర్మన్‌గా, ఎమ్మెల్యేగా చిత్తూరు నియోజకవర్గాన్ని తనవంతుగా అభివృద్ధి చేశానన్నారు. గత ఎన్నికల తర్వాత కొన్ని వ్యక్తిగత కారణాలవల్ల రాజకీయాలకు దూరంగా ఉంటున్నట్లు వివరణ ఇచ్చారు.

తన అభిమానులు, స్నేహితులు ఈ విషయాన్ని అర్థం చేసుకోవాలని కోరారు. రోజురోజుకు రాష్ట్ర రాజకీయ సమీకరణలు మారుతున్నాయని.. అందుకే తన నిర్ణయాన్ని ప్రకటిస్తానని చెప్పారు. ఏ నిర్ణయం తీసుకున్నా తన అభిమానులు, స్నేహితులతో చర్చించి వారి అభిమతం మేరకు ఉంటుందని తేల్చి చెప్పారు. ఈ సమావేశానికి కార్యక్రమంలో మాజీ మేయర్‌ కఠారి హేమలత, ముఖ్య నేతలు హాజరయ్యారు. దీంతో మనోహర్ మళ్లీ టీడీలోకి వస్తారా అనే చర్చ జరుగుతోంది.

ఆంధ్రప్రదేశ్ విభజన తర్వాత 2014 ఎన్నికల్లో డీకే సత్యప్రభ టీడీపీ నుంచి ఎమ్మెల్యేగా విజయం సాధించారు. 2019లో ఏఎస్ మనోహర్‌ పోటీ చేసినా ఓడిపోయారు. ఆ ఓటమి తర్వాత టీడీపీ నేతలు, కేడర్‌ కన్ఫ్యూజన్‌లో ఉన్నారు. ఆ తర్వాత మనోహర్‌ టీడీపీకి రాజీనామా చేశారు.. అప్పటి నుంచి చిత్తూరు నియోజకవర్గంలో టీడీపీకి ఇంఛార్జ్ లేరు. మాజీ మేయర్ కఠారి హేమలతకు బాధ్యతలు అప్పగిస్తారని భావించారు. కేడర్ కూడా అదే కోరుకున్నారు. మున్సిపల్‌ కార్పొరేషన్‌ ఎన్నికల్లో టీడీపీ నుంచి నామినేషన్‌ వేసిన మెజారిటీ అభ్యర్థులు ఆ తర్వాత విత్‌డ్రా చేసుకుంటే.. హేమలత మాత్రం తన డివిజన్‌లో గెలిచారు. అప్పటి నుంచి హేమలత పేరు ప్రముఖంగా వినిపించినా అటు వైపుగా ఆలోచన చేయలేదు.

ఏఎస్ మనోహర్ 2004లో టీడీపీ నుంచి ఎమ్మెల్యేగా విజయం సాధించారు. మళ్లీ 2019లో టీడీపీ తరఫున పోటీ చేసి అరణి శ్రీనివాసులు చేతిలో ఓడిపోయారు. ఆ తర్వాత మనోహర్ రాజకీయాలకు కాస్త దూరంగా ఉంటున్నారు. మళ్లీ ఇప్పుడు ఎన్నికలు దగ్గరపడుతండటంతో రాజకీయంగా యాక్టివ్ కావాలని భావిస్తున్నారట. ఆయనకు టీడీపీ ఆప్షన్ ఎక్కువగా కనబడుతోంది.. అయితే ఆత్మీయులు, అభిమానుల అభిప్రాయాలను తెలుసుకున్న తర్వాత ఏ పార్టీలో చేరతారనే క్లారిటీ వస్తుంది అంటున్నారు.