కోస్తా, ఉత్తరాంధ్ర జిల్లాల్లో తేలికపాటి నుంచి మోస్తరు వర్షాలు

బంగాళాఖాతంలో ఏర్పడిన అల్పపీడనం వేగంగా కదులుతోంది. ఏపీవైపు వస్తున్నట్లు కనిపించినా.. ఆ తర్వాత మయన్మార్ వైపు కదిలింది. ఇప్పుడు ఒడిశాకు దగ్గర్లో ఉన్నా విస్తరిస్తోంది.. ఇది ఉత్తర ఆంధ్రప్రదేశ్, ఉత్తర తెలంగాణ వరకూ ఉంది. ఈ అల్పపీడనం తుఫాన్‌గా మారి.. కోల్‌కతా వైపు వెళ్లొచ్చని వాతావరణశాఖ అంచనా వేస్తోంది. ఏపీలో ఇవాళ తేలికపాటి నుంచి ఓ మోస్తరు వర్షాలు కురిసే అవకాశాలు ఉన్నాయంటున్నారు. ఉత్తరాంధ్ర, కోస్తా ప్రాంతంలో వర్షాలకు అవకాశాలు కనిపిస్తున్నాయి. రాయలసీమలో అంతగా ప్రభావం కనిపించదు అంటున్నారు.

ఇటు తెలంగాణలో మరో రెండు రోజుల పాటూ తేలిక పాటి నుంచి భారీ వర్షాలు పడతాయని అంచనా వేస్తున్నారు. నేడు అక్కడక్కడా భారీ వానలు కురుస్తాయంటున్నారు. జయశంకర్ భూపాలపల్లి, ములుగు, భద్రాద్రి కొత్తగూడెం, మహబూబాబాద్, ఆదిలాబాద్, నిర్మల్, కుమురం భీం ఆసిఫాబాద్, మంచిర్యాల జిల్లాల్లోని కొన్ని చోట్ల మోస్తరు నుంచి భారీ వర్షాలకు అవకాశం ఉందంటున్నారు. హైదరాబాద్‌లో సోమవారం రాత్రి భారీ వర్షం కురిసింది.. మంగళవారం ఆకాశం మేఘావృతంగా కనిపిస్తుందని.. తేలికపాటి నుంచి మోస్తరుగా ఉరుములతో కూడిన వాన పడతుందంటున్నారు.

మరోవైపు అల్పపీడనం ప్రభావంతో విస్తారంగా వర్షాలు కురవడంతో రాష్ట్రంలో వర్షపాతం పెరిగింది. జులై నెలాఖరు నాటికి 131.1 మిమీ కురవాల్సి ఉండగా ఇప్పటి వరకు 151.5 మి.మీ వర్షపాతం నమోదైంది. శ్రీకాకుళం, అల్లూరి సీతారామరాజు, విజయనగరం, విశాఖపట్నం, కృష్ణా జిల్లాల్లో అత్యధికంగా వర్షాలు కురిశాయి. పార్వతీపురం మన్యం, అనకాపల్లి, తూర్పు గోదావరి, కాకినాడ, ఏలూరు, ఎన్టీఆర్‌, బాపట్ల , గుంటూరు, చిత్తూరు జిల్లాల్లో అధికంగా.. డాక్టర్ బీఆర్‌ అంబేద్కర్‌ కోనసీమ, పశ్చిమగోదావరి, పల్నాడు, ప్రకాశం, నెల్లూరు, అనంతపురం, కర్నూలు, తిరుపతి, కడప జిల్లాల్లో సాధారణంగా ఉంది. శ్రీసత్యసాయి, నంద్యాల, అన్నమయ్య జిల్లాల్లో సాధారణం కంటే తక్కువ వర్షపాతం నమోదైంది.

జూన్‌ నుంచి సెప్టెంబర్‌ వరకు వర్షాకాలం ఉంటుంది. ఇప్పటి వరకు జూన్‌లో ఆశించిన మేర వానలు కురవనప్పటికీ.. జులైలో మాత్రం వర్షపాతం లోటు తీరింది. భారీ వర్షాలతో గ్రామాల్లో చెరువులు జలకళతో కనిపిస్తున్నాయి.. అంతేకాదు భూగర్భ జలాల్లో పెరుగుదల కనిపిస్తోంది. ఆగస్ట్‌, సెప్టెంబర్‌ నెలల్లోకూడా ఆశించిన స్థాయిలో వర్షాలు కురిస్తే ఎలాంటి ఇబ్బంది ఉండదు.

మరోవైపు గోదావరి వరద ప్రవాహం తగ్గుతోంది. భద్రాచలం దగ్గర నీటిమట్టం 46 అడుగులు ఉండగా.. 2వ ప్రమాద హెచ్చరిక ఉపసంహరించారు. ధవళేశ్వరం దగ్గర వరద ఇన్ & ఔట్ ఫ్లో 15.87లక్షల క్యూసెక్కులు ఉంది. 2వ ప్రమాద హెచ్చరిక కొనసాగుతోంది.. పూర్తి స్థాయిలో వరద తగ్గే వరకు ప్రజలు అప్రమత్తంగా ఉండాలని విపత్తుల నిర్వహణశాఖ అప్రమత్తం చేసింది.