వసతి గదుల సమస్యకు చెక్‌పెట్టే దిశగా,,,టీటీడీ మరో కీలక నిర్ణయం

రుమలలో కలియుగ ప్రత్యక్ష దైవం వెంకటేశ్వరస్వామి దర్శనం కోసం ప్రతి రోజూ వేలాది మంది భక్తులు వస్తుంటారు. ప్రతి రోజు దాదాపుగా లక్ష నుంచి 70 వేల వరకు భక్తులు కొండపైకి వస్తారన్నది టీటీడీ అంచనా. కొండపైకి చేరుకోగానే భక్తులు ముందు వసతి గది తీసుకుని.. ఆ తర్వాత శ్రీవారి దర్శనంకు వెళ్తుంటారు. ఈ క్రమంలో భక్తులందరికి తిరుమలలో వసతి కల్పించడం ఇబ్బందనే చెప్పాలి.. తిరుమలలో 30 వేల నుంచి 40వేల మంది భక్తులకు మాత్రమే వసతికి అవకాశం ఉంది. తిరుమలలో వసతి గదుల విషయంలో భక్తుల ఇబ్బందులకు చెక్ పెట్టాలని టీటీడీ భావిస్తోంది.

భక్తుల సమస్యకు పరిష్కారంగా టీటీడీ ఇప్పటికే ప్రయోగాత్మకంగా మొబైల్ కంటైనర్స్‌ని అందుబాటులోకి తెచ్చిన సంగతి తెలిసిందే. టీటీడీ ట్రాన్స్‌పోర్టు విభాగం డిపోలో మొబైల్ కంటైనర్‌‌‌లను ప్రారంభించారు. అయితే త్వరలోనే వీలైనన్ని ఎక్కువ కంటైనర్లను భక్తులకు అందుబాటులో తీసుకొచ్చేందుకు సన్నాహాలు చేస్తోంది. అత్యాధునిక టెక్నాలజీతో అతి తక్కువ ప్రదేశంలో ఎక్కువ మంది భక్తులు బస చేసే విధంగా మొబైల్ కంటైనర్స్‌ను అందుబాటులోకి తేవాలని నిర్ణయించింది.

ఈ మొబైల్ కంటైనర్స్ విశాఖకు చెందిన విశాఖ ట్రేడ్స్ సంస్థలు అధినేత మూర్తి టీటీడీ అందజేశారు. అత్యాధునిక సౌకర్యాలతో రూపొందిన ఈ మొబైల్ కంటైనర్స్‌లో నాన్ ఏసీ రూమ్‌లలో‌ మొత్తం 12 మంది ఉండేందుకు వీలుంగా రూపొందించారు. బయట మరొక మొబైల్ కంటైనర్‌లో బాత్రూమ్‌ను ఏర్పాటు చేశారు. అలాగే ఈ మొబైల్ కంటైనర్స్‌ను ఎక్కడికైనా ఈజీగా తీసుకెళ్లే విధంగా తయారు చేశారు.. అలాగే ఈ మొబైల్ కంటైనర్స్‌ను పూర్తిగా "రాకూల్ ఇన్సులేషన్‌''తో నింపారు. ఇలా చేయడం ద్వారా బయట వాతావరణం చల్లగా ఉండే కంటైనర్స్‌లో బస చేసే వారికి వేడి వాతావరణాన్ని అందిస్తుంది. బయటి వాతావరణం వేడిగా ఉంటే లోపల ఉన్న భక్తులకు చల్లదనంను అందించే విధంగా పూర్తి స్ధాయిలో ఇన్సులేటెడ్ తో కూడిన గదులను ఏర్పాటు చేశారు.

ఈ మొబైల్ కంటైనర్స్‌ను ఇప్పటికే విదేశాల్లో ఉపయోగిస్తుంటారు. బయట దేశాల్లో ఉండే ఈ కంటైనర్స్ అత్యాధునిక సాంకేతికతతో ఏసీలతో పాటుగా, టీవి, టేబుల్, కుర్చీ, వెస్ట్రన్ టాయిలెట్స్, గ్లీజర్ వంటి సౌకర్యాలతో మొత్తం నాలుగు బెడ్ లు కలిగి ఉండే విధంగా రూపొందించారు. టీటీడీ ట్రాన్స్‌పోర్ట్ విభాగం మూడు చోట్ల ఏర్పాటు చేసింది. మొత్తం రూ.25 లక్షలు ఖర్చు కాగా.. ప్రస్తుతం ఈ మొబైల్ కంటైనర్స్‌ను ప్రయోగాత్మకంగా టీటీడీ ఉద్యోగులను ఉపయోగించి ఆ తర్వాత పూర్తి స్ధాయిలో భక్తులకు అందుబాటులోకి తీసుకుని రావాలని భావిస్తున్నారు. శ్రీవారి బ్రహ్మోత్సవాల్లో ఈ‌ మొబైల్ కంటైనర్స్, బాత్రూమ్‌లను భక్తులకు అందుబాటులోకి తేవాలనుకుంటోంది.

తిరుమలలో రద్దీ ఎక్కువగా ఉండే సమయంలో కొండకి వచ్చే భక్తులకు వసతి విషయంలో అసౌకర్యానికి గురవుతున్నారు. అలాగే తిరుమలలో వసతి గదులు నిర్మించేందుకు వీలులేదంటున్నారు. అందుకే మొబైల్ కంటైనర్స్ ద్వారా కొంతమంది భక్తులకు వసతి కల్పించే విధంగా ఏర్పాట్లు చేస్తున్నారు.. భక్తుల నుంచి వచ్చే ఫీడ్ బ్యాక్ ప్రకారం భవిష్యత్తులో మరికొన్ని మొబైల్ కంటైనర్స్‌ను ఏర్పాటు చేస్తామంటున్నారు.