రాహుల్ గాంధీ పార్లమెంటు సమావేశాలకు హాజరవుతారా

మోదీ ఇంటి పేరుపై రాహుల్‌ గాంధీ చేసిన వ్యాఖ్యల కేసులో సూరత్ కోర్టు విధించిన శిక్షపై సుప్రీంకోర్టు స్టే విధించిన నేపథ్యంలో రాహుల్ ఎంపీ పదవిపై జోరుగా చర్చ జరుగుతోంది. రాహుల్ గాంధీకి లోక్‌సభ సభ్యత్వం కల్పించి.. ప్రస్తుతం జరుగుతున్న పార్లమెంటు సమావేశాలకు హాజరయ్యేలా చూస్తామని కాంగ్రెస్ పార్టీ వర్గాలు స్పష్టం చేస్తున్నాయి. మరోవైపు.. వచ్చే ఏడాది సార్వత్రిక ఎన్నికలు జరగనున్న నేపథ్యంలో ఆ ఎన్నికల్లో పోటీ చేసేందుకు అర్హత ఉంటుందా లేదా అనే దానిపై ఇంకా సందిగ్థత వీడటం లేదు. వీటిపై తలెత్తిన ప్రశ్నలు సర్వత్రా ఉత్కంఠ రేపుతున్నాయి. అయితే వీటన్నింటికీ లోక్‌సభ సెక్రటేరియట్ తీసుకునే నిర్ణయం ప్రామాణికం కానుంది. ఈ నేపథ్యంలోనే ఆగస్టు 11 వ తేదీ వరకు జరగనున్న ఈ పార్లమెంటు వర్షాకాల సమావేశాలకు రాహుల్ గాంధీ హాజరు కావాలంటే లోక్‌సభ సెక్రటేరియట్ అనుమతి ఇవ్వాల్సి ఉంటుంది.

మోదీ ఇంటి పేరుపై రాహుల్‌ గాంధీ చేసిన వ్యాఖ్యలపై ఆయనను దోషిగా తేల్చిన సూరత్‌ కోర్టు.. 2 ఏళ్ల శిక్ష విధించింది. ఈ తీర్పు వెలువడిన వెంటనే లోక్‌సభ సెక్రటేరియట్ రాహుల్ గాంధీపై అనర్హత వేటు వేసింది. దీంతో ఆయన ఎంపీ పదవి కోల్పోయారు. అయితే తాజాగా ఆ శిక్షపై సుప్రీం కోర్టు స్టే విధించిన నేపథ్యంలో రాహుల్‌ తిరిగి ఎంపీగా కొనసాగే అవకాశం లభించింది. అయితే దీనికోసం సుప్రీంకోర్టు ఇచ్చిన మధ్యంతర ఉత్తర్వులను.. లోక్‌సభ సచివాలయం పరిగణనలోకి తీసుకుంటున్నట్లు వెల్లడించాల్సి ఉంది. దీంతోపాటు రాహుల్‌ గాంధీపై విధించిన అనర్హత వేటును ఎత్తివేస్తున్నట్లు మరో నోటిఫికేషన్‌ జారీ చేయాల్సి ఉంటుంది. మరోవైపు సుప్రీం కోర్టు తుది తీర్పులో రాహుల్‌ నిర్దోషిగా విడుదల కావడం.. లేదంటే శిక్ష కాలాన్ని 2 ఏళ్ల కంటే తక్కువకు కుదించినా.. వచ్చే ఎన్నికల్లో పోటీ చేసేందుకు రాహుల్‌ గాంధీకి అవకాశం కలుగుతుంది. అయితే ఆగస్టు 11 వ తేదీ వరకు పార్లమెంట్‌ వర్షాకాల సమావేశాలు జరగనున్న నేపథ్యంలో లోక్‌సభ సచివాలయం ఎలాంటి నిర్ణయం తీసుకుంటుందో అన్నదానిపై సర్వత్రా ఉత్కంఠ నెలకొంది.

ప్రజాప్రాతినిధ్య చట్టం ప్రకారం రెండు సంవత్సరాలు లేదా అంతకంటే ఎక్కువ జైలు శిక్ష పడిన వారు తీర్పు వెలువడిన తేదీ నుంచి రాజ్యాంగ పదవుల్లో ఉండటానికి అనర్హులు అవుతారు. దీంతో విధించిన జైలు శిక్ష కాలంతోపాటు మరో ఆరేళ్లపాటు ఎలాంటి ఎన్నికల్లో పోటీ చేసేందుకు అవకాశం ఉండదు. ఈ నేపథ్యంలోనే సూరత్ కోర్టు విధించిన రెండేళ్ల శిక్షను రద్దు చేయాలని.. రాహుల్ గుజరాత్ హైకోర్టును ఆశ్రయించగా.. అక్కడా ఎదురుదెబ్బ తగిలింది. దీంతో చివరి ప్రయత్నంగా సుప్రీం కోర్టును ఆశ్రయించగా.. భారీ ఊరట లభించింది. అయితే విచారణ సందర్భంగా సుప్రీంకోర్టు కీలక వ్యాఖ్యలు చేసింది. రాహుల్‌ గాంధీ చేసిన వ్యాఖ్యలు అంతగా రుచించవని.. ప్రజాజీవితంలో ఉండేవారు మరింత జాగ్రత్తగా మాట్లాడాలని హితవు పలికింది. అయితే సూరత్‌ కోర్టు కచ్చితంగా 2 ఏళ్లపాటు శిక్ష విధించడానికి కారణాలేంటో తెలియదని.. దాని మూలంగానే రాహుల్‌పై అనర్హత వేటు పడిందని తెలిపింది. ఒక్క రోజు శిక్ష తక్కువ వేసినా..అనర్హత వేటు పడకుండా ఉండేది కదా అని.. తక్కువగా జస్టిస్‌ బీఆర్‌ గవాయ్‌, జస్టిస్‌ పీఎస్‌ నరసింహ, జస్టిస్‌ సంజయ్‌ కుమార్‌లతో కూడిన ధర్మాసనం అభిప్రాయపడింది.