దేశంలో అంతకంతకూ పెరుగుతున్నవేళ.... రూ.80 కే కిలో టమోటా అందిస్తున్న సోదరులు

వంటింట్లో ఉండే టమాటాలు ఇప్పుడు చాలా ఖరీదుగా మారాయి. కిలో టమాటాలు డబుల్ సెంచరీని దాటి ట్రిపుల్ సెంచరీ వైపు దూసుకెళ్తున్నాయి. దీంతో సామాన్యులు ఈ టమాటాలను కొనాలంటేనే భయపడుతున్నారు. చికెన్ ధరలను మించి టమాటాలు ధర పలుకుతుండటంతో టమాటాల కంటే చికెన్ ముక్కే బెటర్ అని చాలా మంది భావిస్తున్నారు. అయితే చుక్కలనంటిన టమాటా ధరలతో.. వాటిని పండించిన రైతులు మాత్రం ఆనందం వ్యక్తం చేస్తున్నారు. ఏటా టమాటాలను పండించి.. ధర రాకపోవడంతో పారబోయడం, చేనులోనే కోయకుండా చెట్లకే వదిలేసే రైతులు.. ఈసారి కోటీశ్వరులు అవుతున్నారు. అయితే ఇలా వచ్చిన సదవకాశాన్ని మాత్రం ఇద్దరు సోదరులు వద్దు అని భావించారు. మంచి మనసుతో కేవలం రూ. 80 కే కిలో టమాటాలు విక్రయిస్తున్నారు. తమకు అధిక ధరలపై ఆశలేదని.. చెబుతున్నారు తమిళనాడుకు చెందిన రామన్, పుట్టుస్వామి అనే ఇద్దరు సోదరులు.

ఊటీకి 30 కిలోమీటర్ల దూరంలో ఉన్న నీలగిరి జిల్లాలోని కుందా గ్రామానికి చెందిన రామన్, పుట్టుస్వామి ఏళ్లుగా కూరగాయలను పండిస్తూ ఉంటారు. అయితే గతంలో తమ ఇంటి అవసరాల కోసం టమాటాలను పండించేవారు. ఎక్కువగా బంగాళదుంప, క్యారెట్, బీట్‌రూట్, క్యాబేజీ, వెల్లుల్లి పంటలను సాగు చేస్తున్నారు. అయితే ఈ ఏడాది టమాటా పంటను సాగు చేశారు. అయితే టమాటా పంట వేయడంతో మొదట్లో స్థానికులు వారిని హేళన చేశారు. టమాటాకు ధర ఉండదు.. ఎందుకు సాగుచేస్తున్నారని ఎద్దేవా చేశారు. అయినప్పటికీ వారి మాటలు పట్టించుకోకుండా రామన్, పుట్టుస్వామి టమాటా పంట వేశారు. అయితే ఇటీవల టమాటా ధరలు భారీగా పెరగడంతో టమాటా రైతులకు భారీగా కాసుల వర్షం కురుస్తోంది. అయితే రామన్, పుట్టుస్వామి మాత్రం కిలో టమాటాలను కిలో రూ.80 కే అమ్ముతున్నారు. దీంతో స్థానికులంతా ఆ ఇద్దరు సోదరులను అభినందిస్తున్నారు. తాము పుట్టినప్పటి నుంచి వ్యవసాయమే ఆధారంగా జీవిస్తున్నామని.. భూమినే నమ్ముకుని బతుకుతున్నామని చెబుతున్నారు. గతంలో పురుగులు, చీడపీడల భయంతో టమాటా పంట వేయడాన్ని ఆపేశామని ఈసారి మాత్రం ఎలాగైనా టమాటా పండించాలని నిర్ణయించుకుని పంట వేసినట్లు చెప్పారు.

ఏప్రిల్‌ నెలలో మైసూరు నుంచి 1,000 టమాటా మొక్కలు కొనుగోలు చేసి తీసుకువచ్చి.. ఇక్కడ నాటినట్లు తెలిపారు. తాము టామాటా పంట వేసినపుడు కిలో రూ. 10 మాత్రమే ఉండేదని గుర్తు చేసుకున్నారు. అనుకూల వాతావరణం లేక నాటిన వెయ్యి టమాటా మొక్కల్లో 400 మొక్కలు దెబ్బతినగా 600 మొక్కలు మాత్రమే బతికి పంట వచ్చిందని వెల్లడించారు. రూ.80 కే విక్రయించడం వల్ల స్థానికంగా ఉండే గ్రామస్థులకు తక్కువ ధరలో టమాటాలను ఇస్తున్నామని పేర్కొన్నారు. టమాటాలను కోస్తున్న పుట్టుస్వామి, రామన్.. ఎలాంటి పురుగుమందులు లేకుండా సేంద్రీయ ఎరువులు వేసినట్లు చెప్పారు. ప్రస్తుతం కిలో టమాటా మార్కెట్లో రూ. 200 నుంచి రూ. 250 పలుకుతోందని.. కానీ తమకు రూ. 80 మాత్రమే చాలని తెలిపారు. తమకు అయిన ఖర్చులు ఇస్తే సరిపోతుందని పేర్కొన్నారు. తాము ఇప్పటివరకు 1,000 కిలోల కంటే ఎక్కువ టమాటాలను స్థానికంగా విక్రయించామని.. ఇంకా వచ్చిన టమాటా పంటను కూడా తక్కువ ధరకే అమ్ముతామని స్పష్టం చేశారు.

అయితే రామన్, పుట్టుస్వామి సోదరులు.. తక్కువ ధరకే టమాటాలను విక్రయిస్తుండటంతో స్థానికులు సంతోషం వ్యక్తం చేస్తున్నారు. ఆకాశాన్నంటిన టమాటా ధరలతో కొనలేకపోతున్నామని.. అదే సమయంలో వారిద్దరూ ఇలా తక్కువ ధరకు విక్రయించడం పట్ల వారికి కృతజ్ఞతలు తెలిపారు. మార్కెట్లో భారీ ధర వస్తున్నా రామన్, పుట్టుస్వామి సోదరులు.. లాభాలను ఆశించకుండా ఇవ్వడం చాలా గ్రేట్ అని కొనియాడారు.