భారత్‌తో శాంతి చర్చలకు సిద్దమన్న పాక్,,,,పాక్ వ్యాఖ్యలకు స్పందించిన భారత్

ఉగ్రవాదాన్ని పెంచి పోషిస్తూ.. భారత్‌పై ప్రతీ సారి అంతర్జాతీయ వేదికలపై అక్కసు వెళ్లగక్కే పాకిస్థాన్ కాస్త చల్లబడింది. ఆ దేశంలో రాజకీయ అస్థిరత, సైన్యంతో ఆధిపత్య పోరు, పెరిగిపోతున్న నిత్యావసరాల ధరలు, వరదలతో భారీగా ఆస్తి నష్టం, ప్రాణ నష్టం, పంట నష్టం జరిగింది. దీంతో పాక్ విదేశీ మారక నిల్వలు ఎప్పుడూ లేని స్థాయిలో పాతాళానికి పడిపోయాయి. ఈ నేపథ్యంలోనే భారత్‌తో శత్రుత్వం వద్దని భావిస్తోంది. అందులో భాగంగానే భారత్‌తో చర్చలకు సిద్ధమేనని ఇటీవల ఆ దేశ ప్రధాని షెహబాజ్ షరీఫ్ ప్రకటించారు. దీనిపై భారత్ కూడా స్పందించింది.

పాకిస్థాన్‌ ప్రధాని షెహబాజ్ షరీఫ్ చేసిన వ్యాఖ్యలపై భారత విదేశాంగ శాఖ అధికార ప్రతినిధి అరిందమ్ బాగ్చి స్పందించారు. పాక్‌తో భారత్ పొరుగుదేశాలతో ఉండే సంబంధాలను కోరుకుంటున్నట్లు స్పష్టం చేశారు. అయితే అందుకు కొన్ని షరతులు కూడా పెట్టారు. అందులో ముఖ్యంగా ఉగ్రవాద రహిత వాతావరణం ఉండాలని పాక్‌కు సూచించారు. ఓ వైపు ఉగ్రవాదాన్ని పెంచి పోషిస్తూ వారిని భారత్‌పైకి ఉసిగొల్పుతూనే.. మరోవైపు.. భారత్‌తో చర్చలకు సిద్ధం అని ప్రకటించడం హాస్యాస్పదంగా ఉంటుందని పేర్కొన్నారు. ఇరు దేశాల మధ్య సఖ్యత ఉన్నప్పుడే మంచి సంబంధాలు నెలకొంటాయని తెలిపారు. భారత్, పాక్ దేశాల సంబంధాల విషయంలో పాక్ ప్రధానమంత్రి షెహబాజ్ షరీఫ్ చేసిన వ్యాఖ్యలు చేసినట్లు తమ దృష్టికి వచ్చినట్లు వెల్లడించారు. ఈ విషయంలో భారత్ స్పష్టమైన నిర్ణయంతో ఉందని.. పాకిస్థాన్‌తో సహా అన్ని పొరుగుదేశాలతో మంచి సంబంధాలను కోరుకుంటున్నట్లు చెప్పారు. దీనికి ఉగ్రవాదం, విరోధంలేని వాతావరణం తప్పనిసరి అని అరిందమ్‌ బాగ్చి పేర్కొన్నారు.

ఆగస్టు 2వ తేదీన జరిగిన ఇస్లామాబాద్‌లో పాకిస్థాన్‌ మినరల్స్‌ సదస్సు ప్రారంభ కార్యక్రమంలో ప్రధాని షెహబాజ్‌ షరీఫ్‌ మాట్లాడారు. ప్రసంగించారు. ఈ సందర్భంగా భారత్‌తో చర్చల గురించి స్పందించారు. పొరుగు దేశంతో సహా అందరితో చర్చలు నిర్వహించేందుకు తాము సిద్ధంగా ఉన్నామని వెల్లడించారు. ఇలాంటి క్లిష్టమైన, తీవ్రమైన సంబంధాలు ఇరుగుపొరుగువారు చర్చల ద్వారానే పరిష్కరించుకోవాలని తెలిపారు. ఎందుకంటే యుద్ధమనేది ఎప్పటికీ పరిష్కారం కాదని భారత్‌ను ఉద్దేశిస్తూ పాక్‌ పీఎం షెహబాజ్‌ వ్యాఖ్యానించారు.