అక్టోబర్ 24 నుంచి విశాఖలోనే జగన్ నివాసం,,,,విశాఖ నుంచే ఇక పరిపాలన

ఎన్నికలకు సమయం దగ్గర పడుతున్న వేళ సీఎం జగన్ కీలక నిర్ణయాలు తీసుకుంటున్నారు. ఈ క్రమంలో విశాఖకు మకాం మార్చడానికి ముహూర్తం ఫిక్స్ చేసుకున్నట్లు తెలుస్తోంది. విశాఖను పరిపాలన రాజధానిగా మార్చుతామని, త్వరలో తాను కూడా అక్కడే నివాసం ఉంటానని గతంలో పలు వేదికలపై అనేకసార్లు జగన్ స్పష్టం చేశారు. కానీ ఆ దిశగా జగన్ అడుగులు వేయలేదు. అయితే ఇప్పుడు విశాఖలో నివాసం ఉండటంపై జగన్ తుది నిర్ణయం తీసుకున్నట్లు సమాచారం.

అక్టోబర్ 24 నుంచి విశాఖలోనే జగన్ నివాసం ఉండనున్నారని తెలుస్తోంది. రుషికొండ సమీపంలో జగన్ ఉండనుంగా.. నివాస ప్రాంతాన్ని ఇవాళ భద్రతా సిబ్బంది పరిశీలిస్తున్నారు. ఇంటిని గత కొద్ది నెలలుగా నిర్మిస్తుండగా.. ఇప్పటికే సివిల్ వర్క్ కూడా పూర్తి అయింది. ఇంటీరియల్ వర్క్స్ చేసే కాంట్రాక్టర్‌తో కలిసి ఇవాళ నిర్మాణాన్ని సీఎంవో స్టాఫ్ పరిశీలించనున్నారు. రుషికొండలోని నిర్మాణాలపై ఇటీవల హైకోర్టు స్టే ఇచ్చింది. పరిమితికి మంచి నిర్మాణాలు జరిగాయని, చర్యలు తీసుకోవాలని కేంద్ర పర్యావరణ, అటవీశాఖను ఆదేశించింది.

హైకోర్టు తీర్పు నేపథ్యంలో జగన్ ఉండబోయే నివాసంపై అధికారులు నేడు రివ్యూ చేపట్టనున్నారు. జగన్ ఉండే నివాస ప్రాంతం అనుమతి పొందిన నిర్మాణమేనని నిర్ధారించుకున్నారు. ఇక్కడే జగన్ క్యాంప్ ఆఫీస్‌తో పాటు నివాసం ఉండటానికి ఇంటిని నిర్మిస్తున్నారు. ఇప్పటికే దాదాపుగా నిర్మాణాలు పూర్తయ్యాయి. ఇక నుంచి నిర్మాణాల దగ్గర ఏపీఎస్పీ బెటాలియన్ పోలీస్ ఔట్‌పోస్ట్ ఏర్పాటు చేయనున్నారు. దీంతో ఇక్కడ భద్రతా ఏర్పాట్లపై సిబ్బంది సమీక్షించనున్నారు.

అయితే జగన్ ప్రభుత్వం అధికారంలోకి వచ్చిన తర్వాత మూడు రాజధానుల బిల్లును అసెంబ్లీలో ప్రవేశపెట్టింది. అయితే ఈ బిల్లుకు న్యాయపరమైన చిక్కులు ఎదురయ్యాయి. మూడు రాజధానులను వ్యతిరేకిస్తూ హైకోర్టు, సుప్రీంకోర్టులో అనేక పిటిషన్లు దాఖలయ్యాయి. దీంతో రాజధానిపై బిల్లులు చేసే అధికారం అసెంబ్లీకి లేదని, అమరావతిని అభివృద్ది చేయాలని హైకోర్టు సూచించింది. దీంతో మూడు రాజధానుల బిల్లును జగన్ సర్కార్ వెనక్కి తీసుకుంది. దీంతో విశాఖకు జగన్ షిఫ్ట్ అవ్వడంపై డైలమా ఏర్పడింది. కానీ సీఎం ఏ ప్రదేశంలో ఉండైనా పనిచేయవచ్చని, ఇప్పుడు విశాఖకు మారినా ఎలాంటి ఇబ్బందులు ఉండవని ప్రభుత్వ వర్గాలు భావిస్తున్నారు.