గుడిలోకి వితంతువును రాకుండా ఆలయ కమిటీ ఆంక్షలు,, మద్రాస్ హైకోర్టు సీరియస్

వితంతువు అనే కారణంతో మహిళలను దేవాలయాల్లోకి అనుమతి నిరాకరించడాన్ని మద్రాస్ హైకోర్టు తీవ్రంగా తప్పుపట్టింది. ఇలాంటి ఘటనపై తీవ్ర ఆగ్రహం వ్యక్తం చేసింది. భర్త చనిపోయాడనే కారణంతో దేవాలయాల్లోకి మహిళలను అనుమతించకపోవడం వంటి ఘటనలకు ప్రస్తుత నాగరిక సమాజంలో చోటు లేదని స్పష్టం చేసింది. దేశంలో నివసిస్తున్న ప్రతి మహిళకు భారత రాజ్యాంగం ప్రకారం ఒక గుర్తింపు ఉందని వెల్లడించింది. ఎన్నో ఏళ్ల కిందటి అనాగరికమైన సిద్ధాంతాలను ఇప్పటికీ పాటిస్తూ మహిళలను అంటరాని వారిగా చూడటం.. చిన్న చూపుతో వివక్ష చూడటం.. సహించేది లేదని తీవ్ర స్థాయిలో హెచ్చరికలు జారీ చేసింది. తమిళనాడులోని ఓ దేవాలయంలో జరిగే కార్యక్రమానికి ఆలయ కమిటీ.. ఓ వితంతు మహిళకు అనుమతి నిరాకరించింది. ఈ ఘటనతో ఆమె మద్రాస్ హైకోర్టును ఆశ్రయించగా.. ధర్మాసనం ఈ వ్యాఖ్యలు చేసింది.

తమిళనాడులోని నంబియూర్‌లో ఉన్న ఓ ఆలయ పూజారి కొన్ని రోజుల క్రితం చనిపోయారు. అయితే ఆ ఆలయంలో పూజలు, ఇతర కార్యక్రమాలు నిర్వహించేందుకు సదరు పూజారి భార్య తంగమణి, ఆమె కుమారుడు ముందుకువచ్చారు. అయితే వితంతువు అయిన తంగమణి పూజలు ఎలా చేస్తుందని.. దేవాలయ కమిటీ అభ్యంతరం చెప్పింది. వితంతువులు పూజా క్రతువులు చేయడం అపచారమని అడ్డుకుంది. తమిళనాడులో ప్రస్తుతం ఆది మాసం నడుస్తోంది. ఈ క్రమంలోనే ఆగస్టు 9, 10 తేదీల్లో దేవాలయంలో ప్రత్యేక పూజలు నిర్వహించాలని కమిటీ నిర్ణయించింది. అయితే ఆ పూజా కార్యక్రమాలు చేసేందుకు తనకు, తన కుమారుడికి అవకాశం కల్పించాలని ఆలయ కమిటీ సభ్యులకు తంగమణి విజ్ఞప్తి చేశారు. దీంతో తీవ్ర ఆగ్రహం చెందిన ఇద్దరు కమిటీ సభ్యులు.. ఆమెను ఆలయ పరిసరాల్లోకే రాకూడదని ఆంక్షలు విధించారు.

తనపై విధించిన ఆంక్షలపై తంగమణి స్థానిక పోలీసులకు ఫిర్యాదు చేసి భద్రత కల్పించాలని కోరింది. అప్పటికీ పోలీసులు పట్టించుకోకపోవడంతో చివరికి మద్రాస్ హైకోర్టును ఆశ్రయించి పిటిషన్ వేసింది. తంగమణి వేసిన పిటిషన్‌పై తాజాగా మద్రాస్ హైకోర్టు విచారణ జరిపింది. ఈ సందర్భంగా ఒక వితంతు మహిళను.. గుడి పరిసరాల్లోకి రాకుండా ఆంక్షలు విధిస్తూ.. కమిటీ సభ్యులు తీసుకున్న నిర్ణయంపై జస్టిస్‌ ఆనంద్‌ వెంకటేశ్‌ తీవ్ర ఆగ్రహం వ్యక్తం చేశారు. ఆలయంలోకి తంగమణిని రాకుండా అడ్డుకునే అధికారం ఎవరికీ లేదని తేల్చి చెప్పారు. ఈ క్రమంలోనే తంగమణి, ఆమె కుమారుడికి పూజా కార్యక్రమాలు చేసేందుకు అనుమతి ఇవ్వాలని ఆదేశాలు జారీ చేశారు. అలా కాకుండా ఎవరైనా వారిని అడ్డగిస్తే చట్ట ప్రకారం కఠిన చర్యలు తీసుకోవాల్సి ఉంటుందని హెచ్చరించారు. ఈ తీర్పు సందర్భంగా తంగమణి, ఆమె కుమారుడికి భద్రత కల్పించాలని పోలీసులకు జస్టిస్‌ ఆనంద్‌ వెంకటేశ్‌ ఆదేశాలు జారీ చేసింది.