ఒకరిని ఒకరు ఆలింగనం చేసుకుని,,,ఆత్మీయతను పంచుకున్న యోగి, మోదీ సోదరీమణులు

ప్రధానమంత్రి నరేంద్ర మోదీ చెల్లెలు వాసంతిబెన్.. ఉత్తర్‌ప్రదేశ్ సీఎం యోగి ఆదిత్యనాథ్ అక్క శశి దేవిని కలిశారు. అయితే ఇప్పుడు ఈ విషయం దేశవ్యాప్తంగా సరికొత్త చర్చకు దారితీసింది. ఇక ఈ సంఘటనకు సంబంధించిన వీడియో అయితే సోషల్ మీడియాలో తెగ వైరల్‌గా మారింది. ప్రధాని, సీఎంల సోదరీ మణులైనా సామాన్య జీవనం గడుపుతూ ఉన్న వారిద్దరూ ఒకచోట కలవడం గమనార్హం. అయితే వారిద్దరికీ ఇంతకు ముందు ఎప్పుడూ పరిచయం లేకపోవడం.. కనీసం చూసుకోక పోవడం కొసమెరుపు. అయినా తమ సోదరుల మధ్య ఉన్న అనుబంధమే వారి మధ్య కూడా సరికొత్త స్నేహానికి బాటలు వేసింది.

ప్రధాని మోదీ సోదరి వాసంతిబెన్‌ తన భర్తతో కలిసి ఉత్తరాఖండ్‌లోని నీలకంఠ్‌ మహదేవ్‌ ఆలయాన్ని సందర్శించేందుకు వెళ్లారు. ఈ సందర్భంగా అక్కడే కొఠార్ గ్రామంలో నివాసం ఉంటున్న ఉత్తర్‌ప్రదేశ్ ముఖ్యమంత్రి యోగి ఆదిత్యనాథ్ సోదరి శశి దేవిని కలుసుకున్నారు. ఈ క్రమంలోనే వారిద్దరూ తొలిసారి కలిసి ఆప్యాయంగా పలకరించుకున్నారు. తర్వాత ఆత్మీయ ఆలింగనం చేసుకున్నారు. వారంతా కలిసి అమ్మవారిని దర్శించుకున్నారు. దర్శనం అనంతరం వాసంతిబెన్, శశి దేవి.. ఓ హోటల్‌లోకి వెళ్లి చాలా సేపు ముచ్చటించుకున్నారు. ఈ సంఘటనకు సంబంధించిన వీడియోను బీజేపీ నేత అజయ్ నందా షేర్ చేయడంతో ప్రస్తుతం సోషల్ మీడియాలో బాగా వైరల్‌గా మారింది. వీడియోను షేర్ చేస్తూ వారిద్దరి బంధం రాజకీయాలకు అతీతమైందని అజయ్ నందా పేర్కొనడం గమనార్హం.

సీఎం యోగి ఆదిత్యనాథ్ అక్క శశి దేవి.. తన అన్న ముఖ్యమంత్రి అయినప్పటికీ ఆమె సాధారణ జీవితమే గడుపుతున్నారు. ఒక చిన్న గ్రామంలో చిన్న టీ కొట్టు నడుపుతూ జీవనం సాగిస్తున్నారు. శ్రావణ మాసం సందర్భంగా శివుని దర్శనం కోసం వాసంతీ బెన్ తన భర్తతో కలిసి ఉత్తరాఖండ్‌లోని నీలకంఠ్ ధామ్‌ను దర్శించుకున్నారు. ఆ తర్వాత అక్కడి నుంచి వాసంతీబెన్ దంపతులు కొఠారిలోని ఓ దేవాలయానికి చేరుకున్నారు. అక్కడే యోగి సోదరి శశి దేవిని కలిశారు. వాసంతీబెన్ దంపతులు కూడా చాలా సాధారణంగా జీవిస్తున్నారు. వీరిద్దరి సోదరులు.. దేశంలోనే అత్యున్నత పదవుల్లో ఉన్నా.. వారు మాత్రం నిరాడంబరమైన జీవితాన్ని గడుపుతున్నారు.

ఈ వీడియో కాస్త సోషల్ మీడియాల్లో తీవ్రంగా వైరల్ కావడంతో నెటిజన్లు స్పందిస్తున్నారు. వారిద్దరి ఆప్యాయత చూస్తే ముచ్చటేస్తోందని కామెంట్లు చేస్తున్నారు. వారి సోదరులు దేశంలోనే ఉన్నత స్థానంలో ఉన్నా వీరు మాత్రం.. మధ్య తరగతి జీవితాన్ని గడుపుతున్నారని ప్రశంసలు కురిపించారు.