మత ఘర్షణల నిందితుల అక్రమ కట్టడాలు కూల్చివేత,,,హర్యానాలో కొనసాగుతున్న బుల్డోజర్ కూల్చివేతలు

హర్యానాలోని నూహ్ జిల్లాలో విశ్వ హిందూ పరిషత్ చేపట్టిన బ్రిజ్ మండల్ యాత్రపై ముస్లిం వర్గానికి చెందిన కొంతమంది రాళ్ల దాడికి పాల్పడటంతో ఒక్కసారిగా మత ఘర్షణలు చెలరేగాయి. నూహ్ జిల్లాలో ప్రారంభమైన ఈ మత అల్లర్లు క్రమంగా ఇతర ప్రాంతాలు.. ఆఖరికి ఢిల్లీకి పక్కనే ఉన్న గురుగ్రామ్‌కు కూడా వ్యాపించాయి. ఈ నేపథ్యంలోనే అధికారులు, ప్రభుత్వం అప్రమత్తమై భారీగా పోలీసు, భద్రతా బలగాలను మోహరించాయి. అయితే గత 3 రోజులుగా నూహ్‌లో నిరంతరం బుల్డోజర్లు తమ పని నిర్వర్తిస్తున్నాయి. అక్రమ కట్టడాలను ఆలస్యం లేకుండా శరవేగంగా కూల్చివేస్తున్నారు. అయితే ప్రస్తుతం కూల్చివేస్తున్న భవనాలు.. ఇటీవలి అల్లర్లకు కారణమైన నిందితులవేనని ప్రభుత్వ వర్గాలు వెల్లడించాయి.

నూహ్‌ జిల్లాలో వరుసగా మూడో రోజు బుల్డోజర్లు నడుస్తూనే ఉన్నాయి. తావ్‌డూ పట్టణంలో అక్రమంగా ఏర్పాటు చేసుకున్న 250 గుడిసెలను అధికారులు శుక్రవారం తొలగించారు. తాజాగా శనివారం ఉదయం నల్హార్‌ ప్రాంతంలోని ప్రభుత్వ మెడికల్‌ కాలేజీ, ఆస్పత్రి వద్ద ఉన్న అక్రమ కట్టడాలను బుల్డోజర్లతో పడగొట్టారు. అక్కడ ఉన్న దుకాణాలను కూల్చి వేశారు. ఈ దుకాణాల్లో ఎక్కువ భాగం మెడికల్‌ షాపులే ఉన్నట్లు అధికారులు వెల్లడించారు. ఈ తావ్‌డూతోపాటు నూహ్‌ జిల్లాలోని ఇతర ప్రాంతాలు, మత ఘర్షణలకు కారణమైన వారి అక్రమ కట్టడాలను బుల్డోజర్ల సాయంతో తొలగిస్తున్నారు. శనివారం ఒక్కరోజే 50 నుంచి 60 భవనాలను కూల్చి వేసినట్లు నూహ్ జిల్లా అధికారులు వెల్లడించారు. మరోవైపు.. అరెస్టులు, కూల్చివేతలకు భయపడి చాలా మంది దుకాణాదారులు, నిందితులు పరారీలో ఉన్నట్లు పేర్కొన్నారు.

నూహ్‌ జిల్లాలో ఇటీవల చెలరేగిన మత ఘర్షణలు తీవ్ర చర్చనీయాంశంగా మారాయి. ఈ క్రమంలోనే తాజాగా అక్రమ కట్టడాలను బుల్డోజర్లతో కూల్చివేసే ప్రక్రియను అధికారులు యుద్ధ ప్రాతిపదికన చేపట్టడం సంచలనంగా మారింది. అయితే.. మత ఘర్షణల్లో పాల్పడిన వారిని సీసీటీవీ ఫుటేజీ ద్వారా పోలీసులు గుర్తించారని వార్తలు వచ్చాయి. దీంతో వారు అక్రమంగా నిర్మించుకున్న ఇళ్లనే ప్రస్తుతం బుల్డోజర్లతో నేలమట్టం చేస్తున్నారని స్థానికులు చర్చించుకుంటున్నారు. ఈ నేపథ్యంలోనే ఇలాంటి వార్తలను పోలీసులు ఖండించారు. ఇప్పుడు కూల్చివేస్తున్న నిర్మాణాలన్నీ అక్రమంగా నిర్మించుకున్న కట్టడాలనేనని తెలిపారు. వాటిని తొలగించాలని ఇప్పటికే నోటీసులు ఇచ్చినా స్పందించడం లేదని చెబుతున్నారు. ఇటీవల నూహ్‌లో చోటు చేసుకున్న మత అల్లర్లకు ఈ కూల్చివేతలకు ఎలాంటి సంబంధం లేదని స్పష్టం చేశారు.

ఈ కూల్చివేతలు.. హర్యానా సీఎం మనోహర్‌ లాల్‌ ఖట్టర్‌ ఆదేశాలతోనే జరుగుతున్నట్లు తెలుస్తోంది. మత ఘర్షణల్లో పాల్గొన్న వారిని గుర్తించామని.. వారికి చెందిన అక్రమ కట్టడాలనే కూల్చివేస్తున్నామని అధికారులు చెప్పినట్లు కొన్ని వార్తలు వెలువడ్డాయి. మరోవైపు.. నూహ్‌ అల్లర్లు ముందస్తు కుట్రలో భాగమేనని హర్యానా హోంశాఖ మంత్రి అనిల్‌ విజ్‌ ఆరోపించారు. ఈ మత ఘర్షణల్లో పాల్గొన్న వారంతా కొండలపై నుంచి కాల్పులు చేసినట్లు వెల్లడించారు. కొన్ని భవనాల పై కప్పులపై రాళ్లను గుర్తించినట్లు చెప్పారు. ముందస్తు ప్రణాళికలో భాగంగానే ఇళ్లపై రాళ్లు ఉంచుకుని.. దాడికి పాల్పడ్డారని అనుమానం వ్యక్తం చేశారు. ఇదంతా చూస్తుంటే ‘ఓ భారీ గేమ్‌ ప్లాన్‌’గా అనిపిస్తోందని ఆరోపించారు. వీటికితోడు అల్లర్లు చెలరేగిన కొన్ని గంటల తర్వాత విషయం తనకు తెలిసిందని మంత్రి చెప్పడం తీవ్ర చర్చనీయాంశంగా మారింది. పోలీసులు, ప్రభుత్వ అధికారులు ఎవరూ తనకు అల్లర్లపై సమాచారం ఇవ్వలేదని.. ఓ వ్యక్తి తనకు ఫోన్‌ చేసి జరిగింది చెప్పారని పేర్కొన్నారు. ఈ ఘటనలపై ఇప్పటివరకు పోలీసులు 102 ఎఫ్‌ఐఆర్‌లను నమోదు చేశామని.. దాదాపు 200 మందిని అరెస్టు చేసినట్లు వివరించారు. మరో 80 మందిని అదుపులోకి తీసుకుని విచారిస్తున్నట్లు అనిల్ విజ్ చెప్పారు.