జమ్ము కశ్మీర్‌లో రెచ్చిపోయిన ఉగ్రవాదులు,,,ఎన్‌కౌంటర్‌లో అమరులైన ముగ్గురు జవాన్లు

జమ్ము కశ్మీర్‌లో ఉగ్రవాదాన్ని ఏరివేసి.. శాంతియుత వాతావరణాన్ని ఏర్పరచేందుకు భారత సైన్యం అనుక్షణం ప్రయత్నాలు చేస్తూనే ఉంది. ఈ నేపథ్యంలోనే జమ్ము కశ్మీర్‌లో ఉగ్రమూకల కదలికలపై ఎక్కడికక్కడ దృష్టిసారించి వారిని ఎక్కడ ఉన్న బయటికి లాగి మట్టుబెడుతూనే ఉంది. ఉగ్రవాదులకు సంబంధించిన ఖచ్చితమైన సమాచారాన్ని సేకరించి.. వారిని హతమార్చుతోంది. అయితే ఈ క్రమంలోనే ఇలాంటి సెర్చ్ ఆపరేషన్‌లో భారత సైన్యానికి ఓ ఎదురుదెబ్బ తగిలింది. తాజాగా ఉగ్రవాదులను మట్టుబెట్టేందుకు వెళ్లిన సైనిక బృందంలోని ముగ్గురు సైనికులు అమరులయ్యారు. ఉగ్రవాదులకు, ఆర్మీకి జరిగిన ఎన్‌కౌంటర్‌లో ముగ్గురు జవాన్లు అసువులుబాసారు.

జమ్మ కశ్మీర్‌లోని కుల్గామ్ జిల్లాలో శుక్రవారం ఉగ్రవాదులకు భారత సైన్యానికి మధ్య భీకర ఎన్‌కౌంటర్‌ జరిగింది. ఈ ఎన్‌కౌంటర్‌లో ముగ్గురు భారత సైనికులు మరణించినట్లు సైనిక ఉన్నతాధికారులు వెల్లడించారు. దక్షిణ కశ్మీర్‌లోని కుల్గామ్ జిల్లా హలాన్ అటవీ ప్రాంతానికి దగ్గర్లో ఉగ్రవాదులు మాటు వేసి ఉన్నారని సైన్యానికి ఖచ్చితమైన సమాచారం అందింది. దీంతో భారత మిలటరీ వర్గాలు, జమ్ము కశ్మీర్ పోలీసులు సంయుక్తంగా ఆగస్టు 4 వ తేదీన ఆ ప్రాంతంలో భారీ సెర్చ్ ఆపరేషన్ చేపట్టాయి. ఉగ్రవాదుల ఉనికి కోసం తనిఖీలు చేపడుతుండగా.. ముష్కరులు ఎదురుపడ్డారు.

ఈ క్రమంలోనే ఆ ఉగ్రవాదులు సైన్యంపై కాల్పులు మొదలుపెట్టారు. వెంటనే రియాక్ట్ అయిన ఇండియన్ ఆర్మీ.. ఎదురుకాల్పులు జరిపింది. దీంతో ఒక్కసారిగా ఎన్‌కౌంటర్‌ ప్రారంభమైంది. ఈ ఎన్‌కౌంటర్‌లో ముగ్గురు భద్రతా దళానికి సిబ్బంది తీవ్రంగా గాయపడ్డారు. వారిని వెంటనే స్థానికంగా ఉన్న ఆస్పత్రికి తరలించారు. అయితే వారికి చికిత్స అందుతుండగానే.. చనిపోయినట్లు ఆర్మీ ఉన్నతాధికారులు వెల్లడించారు. దీంతో ఆ ప్రాంతంలో మరింత మంది ఉగ్రవాదులు ఉన్నారని.. గుర్తించిన సైన్యం.. ఆ ప్రాంతంలో భారీగా భద్రతా బలగాలను మోహరించింది. హాలాన్ అడవుల్లో ఎత్తైన ప్రాంతాల్లో ఉగ్రవాదుల కోసం భారీ సెర్చ్ ఆపరేషన్‌ను కొనసాగిస్తున్నట్లు వెల్లడించింది. జమ్ము కశ్మీర్‌కు స్వయం ప్రతిపత్తి కలిగించే ఆర్టికల్ 370ని 2019 లో రద్దు చేసిన తర్వాత ఉగ్రవాదులు ఏరివేత ప్రక్రియ ముమ్మరంగా సాగుతోంది. ఎక్కడెక్కడ ముష్కరులు నక్కి ఉన్నారన్న సమాచారాన్ని పక్కాగా సేకరించి.. భారత బలగాలు వారిని అత్యంత సమీపానికి వెళ్లి.. అక్కడి స్థానిక ప్రజలకు ఇబ్బంది కలగకుండా మట్టుబెడుతున్నారు. ఈ క్రమంలోనే దేశంలో, కశ్మీర్‌లో ఉగ్రవాద దాడులు జరగకుండా.. ఉగ్రవాదంలోకి యువకులను రిక్రూట్ చేసుకోకుండా పటిష్ఠ చర్యలు తీసుకుంటున్నారు. ఈ క్రమంలోనే తమ ఆటలు సాగడం లేదని భావిస్తున్న ఉగ్రవాదులు ఇలా ఇండియన్ ఆర్మీపై దాడులు చేస్తున్నాయి.