కోడి కత్తి శ్రీను గ్రామంలో పర్యటించనున్న సీఎం జగన్

ఇటీవల కురిసిన భారీ వర్షాలకు వరద ప్రభావానికి గురైన ప్రాంతాల్లో సీఎం జగన్ పర్యటిస్తున్నారు. ఇవాళ అల్లూరి సీతారామరాజు, ఏలూరు జిల్లాలో పర్యటించగా.. రేపు రెండో రోజు జగన్ పర్యటన ఉండనుంది. మంగళవారం డాక్టర్ అంబేద్కర్ కోనసీమ జిల్లాలోని ముమ్మడివరం లంక గ్రామాల్లో పర్యటించనున్న జగన్.. వరద బాధితుల కుటుంబాలను పరామర్శించి వారితో మాట్లాడనున్నారు. ముమ్మడివరం మండలంలోని గురజాపులంక, థానేలంక గ్రామాల్లో వరద బాధితులను జగన్ కలవనున్నారు.

జగన్ ముమ్మడివరం పర్యటన నేపథ్యంలో కోడి కత్తి శ్రీనివాసరావు వ్యవహారం చర్చనీయాంశంగా మారింది. ఎందుకంటే కోడి కత్తి శ్రీను సొంత గ్రామం ఠాణేలంక కావడం గమనార్హం. రేపు ఉదయం 9 గంటలకు 10.25 గంటలకు ఆ గ్రామంలో జగన్ పర్యటన ఉంది. దీంతో రేపటి సీఎం పర్యటన రాష్ట్ర రాజకీయాల్లో ఆసక్తికరంగా మారింది. కోడి కత్తి శ్రీను గత నాలుగేళ్లుగా రాజమండ్రి సెంట్రల్ జైల్లోనే మగ్గుతున్నాడు. అతడికి బెయిల్ వచ్చేలా ఎన్‌వోసీ ఇవ్వాలని రాష్ట్ర ప్రభుత్వాన్ని పలుమార్లు శ్రీను కుటుంబసభ్యులు కోరారు. జనవాణి సందర్భంగా జగన్‌ను కలిసేందుకు అనేకసార్లు ప్రయత్నించారు. కానీ జగన్ కలకపోవడంతో అధికారులకు వినతిపత్రం ఇచ్చి వెళ్లారు. ఆ తర్వాత స్థానిక వైసీపీ నేతల సహకారంతో జగన్‌ను కలిసేందుకు ప్రయత్నించినా అపాయింట్‌మెంట్ రాలేదు.

ఇప్పటికీ కోడి కత్తి కేసులో ఎన్‌ఐఏ విచారణ చేపడుతోంది. ప్రభుత్వం నుంచి ఎన్‌వోసీ వస్తే శ్రీనుకు బెయిల్ వచ్చే అవకాశం ఉంటుంది. కానీ జగన్ ప్రభుత్వం వచ్చిన తర్వాత పేరెంట్స్ ఎన్నిసార్లు విజ్ఞప్తి చేసినా వారి ప్రయత్నాలు ఫలించలేదు. దీంతో ఎన్వీరమణ సీజేఐగా ఉన్న సమయంలో ఆయనను శ్రీను తల్లి సావిత్రి లేఖ ద్వారా తమ సమస్యను చెప్పుకున్నారు. శ్రీనుకు ఎప్పుడో బెయిల్ రావాలి ఉన్నా.. ఇప్పటివరకు ఇంకా రాలేదు. ఇాలంటి తరుణంలో అతడి సొంత గ్రామంలో జగన్ పర్యటించనుండటం చర్చనీయాంశగా మారింది.

చంద్రబాబు ప్రభుత్వంలో విశాఖ ఎయిర్‌పోర్ట్‌లో జగన్‌పై శ్రీను కోడి కత్తితో దాడి చేయడం అప్పట్లో సంచలనం రేపింది. దీనిపై అప్పుడు పోలీసులు కేసు నమోదు చేసుకుని దర్యాప్తు చేపట్టగా.. శ్రీను జగన్‌కు వీరాభిమాని అని తేలింది. అంతేకాకుండా జగన్‌ మీద ఉన్న అభిమానంతో అతడు ఫ్లెక్సీలు కూడా వేయించాడు. తాను జగన్‌కు అభిమానినని స్వయంగా శ్రీను పోలీసులకు విచారణలో బయటపెట్టాడు. ఆ తర్వాత ఈ ఘటనపై ఎన్ఐఏ కేసు నమోదు చేసి శ్రీను అరెస్ట్ చేయగా.. బెయిల్‌పై బయటకొచ్చాడు. కొద్దిరోజులకే శ్రీను బెయిల్‌ను రద్దు చేసి ఎన్‌ఐఏ అధికారులు జైల్లో ఉంచారు.