పకోడీగాళ్లు సలహాలిస్తున్నారని,,,,మెగాస్టార్ చిరు వ్యాఖ్యలకు కొడాలి నాని కౌంటర్

ప్రభుత్వం ఎలా ఉండాలో సినిమా ఇండస్ట్రీలో చాలామంది పకోడీగాళ్లు సలహాలిస్తున్నారని ఘాటు వ్యాఖ్యలు చేశారు మాజీ మంత్రి కొడాలి నాని. వాళ్లు తనవాళ్లకు కూడా సలహాలిస్తే బాగుంటుందని.. 'మనకెందుకురా బాబు మన డ్యాన్సులు , ఫైట్లు మనం చూసుకుందామని వాళ్లకు కూడా సలహా ఇస్తే మంచిది' అన్నారు. కొడాలి నాని మెగాస్టార్ చిరంజీవి వాల్తేరు వీరయ్య సక్సెస్ మీట్‌లో చేసిన వ్యాఖ్యలకు పరోక్షంగా కౌంటరిచ్చారు. వాల్తేరు వీరయ్య సక్సెస్ మీట్‌లో చిరంజీవి ఏపీ ప్రభుత్వంపై పరోక్షంగా సెటైర్లు పేల్చారు. ఎంతసేపు సినిమా ఇండస్ట్రీ గురించి కాదు.. ప్రత్యేక హోదా, రోడ్ల నిర్మాణం, ప్రాజెక్టులు, పేదవారికి కడుపు నింపేలా, ఉద్యోగ , ఉపాధి అవకాశాలు కల్పించడం వంటి ఆలోచిస్తే మంచిదన్నారు. పిచ్చుక మీద బ్రహ్మాస్త్రంలా సినిమా ఇండస్ట్రీ మీద ఎందుకు పడతారన్నారు. కొడాలి నాని వ్యాఖ్యలపై చిరంజీవి, మెగా ఫ్యాన్స్ ఎలా స్పందిస్తారన్నది చూడాలి.

చంద్రబాబు, పవన్ కళ్యాణ్‌పైనా కొడాలి నాని ఘాటు వ్యాఖ్యలు చేశారు. ఈ రాష్ట్రాన్ని ఎక్కువ కాలం నడిపింది చంద్రబాబేనని.. ఆ రోజు ప్రాజెక్టులు ఎందుకు పూర్తిచేయలేకపోయారో చెప్పాలన్నారు. తెలంగాణలో మహబూబ్ నగర్‌ను దత్తత తీసుకుంటానని చెప్పి ఎందుకు గాలికొదిలేశారని ప్రశ్నించారు. చంద్రబాబు 27 ఏళ్లలో బాబు గుడ్డి గుర్రం పళ్లు తోమారా అంటూ సెటైర్లు పేల్చారు. ఈ రాష్ట్రంలో జలయజ్ఞం చేపట్టిన వ్యక్తి వైఎస్సార్.. గడచిన పదేళ్లలో కిరణ్ కుమార్ రెడ్డి, చంద్రబాబు ఏం చేశారో చెప్పాలన్నారు.

చంద్రబాబు వల్ల రాష్ట్రం రెండు ముక్కలైపోయిన భ్రష్టుపట్టిందన్నారు నాని. చంద్రబాబు ఒక 420.. మంత్రి పెద్దిరెడ్డి రామచంద్రారెడ్డి పేరు చెబితేనే చంద్రబాబుకు భయమన్నారు. పెద్దిరెడ్డిని ఎలాగైనా డ్యామేజ్ చేయాలనేదే చంద్రబాబు ప్రయత్నమని.. రాబోయే ఎన్నికల్లో పెద్దిరెడ్డి గెలడం ఖాయమన్నారు. చంద్రబాబు కుప్పంలో ఓడిపోతారని జోస్యం చెప్పారు.. బయటి జిల్లాల నుంచి జనాన్ని తీసుకొచ్చి పుంగనూరులో చంద్రబాబు గొడవ చేయించారని విమర్శించారు. చంద్రబాబు మాదిరి మాకు సెల్ఫీల అవసరం లేదన్నారు.

చంద్రబాబుకు 2024 ఎన్నికలే చివరి ఎన్నికలని.. ఆ తర్వాత ఆయనకు ప్రతిపక్ష హోదా కూడా ఉండదన్నారు. జనసేన ఒక కామెడీ పార్టీ.. అది జనసేన కాదు జనసున్నా పార్టీ అంటూ ఘాటు వ్యాఖ్యలు చేశారు. పవన్ కళ్యాణ్ రెండు చోట్ల పోటీచేసి నాలుగుచోట్ల ఓడిపోగలరని.. చంద్రబాబు సేవ చేయడానికే పవన్ జనసేన పెట్టారని ధ్వజమెత్తారు. జనసేనను భజనసేన చేశారని.. పవన్ మాటలు చూస్తే కోటలు దాటతాయన్నారు. వాడిని కొడతా.. వీడిని కొడతా.. బోడిగుండు కొట్టిస్తా అంటారని పవన్‌పై విరుచుకుపడ్డారు. ఈ రాష్ట్రంలో బోడిగుండుకొట్టించుకున్నది ఆయనేనని.. పవన్‌ను ఈ రాష్ట్ర ప్రజలు మోకాళ్ల మీద కూర్చోబెట్టారన్నారు. చంద్రబాబును సీఎం చేయడం పవన్ చేతుల్లో ఉంటుందా అన్నారు నాని.