లేహ్‌లో కార్డియాక్ అరెస్ట్‌కు గురైన అంబరీష్ మూర్తి

పెప్పర్‌ ఫ్రై సహ వ్యవస్థాపకుడు, సీఈవో 51 ఏళ్ల అంబరీష్‌ మూర్తి గుండెపోటుతో హఠాన్మరణం చెందారు. సోమవారం రాత్రి ఆయన కార్డియాక్ అరెస్ట్ తో ప్రాణాలు కోల్పోయినట్టు పెప్పర్ ఫ్రై మరో సహ వ్యవస్థాపకుడు ఆశిష్‌ షా ట్విట్టర్‌‌లో తెలియజేశారు. ‘నా మిత్రుడు, గురువు, సోదరుడు, ఆత్మ సహచరుడు అంబరీష్‌ మూర్తి ఇక లేరన్న విషయాన్ని తెలియజేయడానికి చాలా బాధపడుతున్నాను.. నిన్న రాత్రి లెహ్‌ లో గుండెపోటుకు గురై ప్రాణాలు కోల్పోయారు. దయచేసి అంబరీష్‌ కోసం, ఆయన కుటుంబానికి బలం చేకూర్చాలని ఆ భగవంతుడ్ని ప్రార్థించండి’ అంటూ ఆశిష్‌ షా ట్వీట్ చేశారు.

అంబరీష్‌ మరణ వార్త తెలుసుకున్న పలువురు ప్రముఖులు, పారిశ్రామిక వేత్తలు స్పందిస్తున్నారు. సోషల్‌ మీడియా ద్వారా ఆయనకు శ్రద్ధాంజలి ఘటిస్తూ ఆత్మకు శాంతి చేకూరాలని ప్రార్థిస్తున్నారు. ఈ మేరకు ఆయన కుటుంబ సభ్యులకు ప్రగాఢ సానుభూతి తెలియజేస్తున్నారు. అంబరీష్ మూర్తికి ట్రెక్కింగ్ అంటే చాలా ఇష్టం. వీలు దొరికనప్పుడల్లా తనకు ఇష్టమైన ప్రదేశం లడఖ్‌కి ముంబయి నుంచి బైక్‌తో ప్రయాణం చేస్తుండేవారు. జంస్కార్ లోయలోని చాదర్ ట్రెక్‌లో ట్రెక్కింగ్ అనుభవం తన అత్యుత్తమ అనుభవాలలో ఒకటి అని ఆయన చాలా సందర్భాల్లో చెప్పారు.

ఢిల్లీ టెక్నలాజికల్ యూనివర్సిటీ నుంచి 1994లో సివిల్ ఇంజనీరింగ్.. 1994-1996లో ఐఐఎం కలకత్తా నుంచి ఎంబీఏ పూర్తి చేశారు. తర్వాత ప్రముఖ చాక్‌లైట్స్ ఉత్పత్తుల కంపెనీ క్యాడ్‌బరీలో మేనేజ్‌మెంట్ ట్రెయినీగా చేరారు. ఆ కంపెనీ ఏరియా సేల్స్ మేనేజర్‌గా కేరళలో విధులు నిర్వర్తించారు. చదువుకుంటున్నప్పుడే ఆయన వ్యాపారంలోకి అడుగుపెట్టారు. ఇంటి దగ్గర ట్యూషన్లు చెబుతూ.. దానిని చిన్న వ్యాపారంగా చేసుకున్నారు. ‘ట్యూటర్స్ బ్యూరో’పేరుతో పాఠశాల విద్యార్థులకు రెండేళ్లు పాఠాలు చెప్పారు.

దాదాపు ఐదేళ్ల పాటు క్యాడ్‌బరీలో పనిచేసి 2001లో బయటకు వచ్చారు. అనంతరం ఐసీఐసీఐ ప్రుడెన్షియల్ ఏఎంసీలో మ్యూచువల్ ఫండ్‌లో చేరారు. 2003లో ఆర్థిక శిక్షణ వెంచర్ ఆరిజిన్ రిసోర్సెస్‌ను ప్రారంభించినా పెద్దగా విజయం సాధించలేకపోయాడు. తిరిగి 2005లో బ్రిటానియాలో మార్కెటింగ్ మేనేజర్‌గా చేరి... 7 నెలల్లో eBay ఇండియాకు మారాడు. రెండేళ్ల పాటు భారత్, ఫిలిప్పీన్స్, మలేషియా ప్రతినిధిగా పనిచేశారు. ఇ-కామర్స్ వ్యాపారం వేగంగా అభివృద్ధి చెందుతుందని గ్రహించిన మూర్తి.. స్వంతంగా స్టార్టప్‌ను ప్రారంభించాలని నిర్ణయించుకున్నాడు. 2011లో ఆశిష్ షాతో కలిసి పెప్పర్‌ఫ్రై పేరుతో గృహాలంకరణ, ఫర్నిచర్ కోసం ఈ-కామర్స్ ప్లాట్‌ఫారమ్‌ను ప్రారంభించారు. 2013లో ఫర్నీచర్-హోమ్ డెకర్‌కు డిమాండ్ ఉందని గ్రహించిన ఆ వ్యాపారంపైనే దృష్టి సారించారు. 2016లో అంబరీష్ మూర్తి వివాహం చేసుకున్నారు.