ఇద్దరు పిల్లలకు 18 ఏళ్లు వచ్చే వరకూ లీవ్,,,చైల్డ్ కేర్ లీవ్‌పై కేంద్రం కీలక ప్రకటన

ప్రభుత్వ ఉద్యోగం చేసే మహిళలు, ఒంటరి పురుషులకు శిశు సంరక్షణ సెలవుల (Child Care Leave)పై కేంద్ర ప్రభుత్వం బుధవారం కీలక ప్రకటన చేసింది. మహిళలు, ఒంటరి పురుష ప్రభుత్వ ఉద్యోగులు 730 రోజుల చైల్డ్ కేర్ లీవులకు అర్హులని కేంద్ర సిబ్బంది వ్యవహారాల శాఖ సహాయ మంత్రి జితేంద్ర సింగ్ వెల్లడించారు. ఈ మేరకు ఆయన పార్లమెంట్‌లో ఓ ప్రకటన చేశారు.

‘కేంద్ర వ్యవహారాలకు సంబంధించి సివిల్ సర్వీసెస్, ఇతర విభాగాల్లో నియమితులైన మహిళా, ఒంటరి పురుష ప్రభుత్వ ఉద్యోగులు, సెంట్రల్ సివిల్ సర్వీసెస్ (లీవ్) రూల్స్, 1972లోని 43-C ప్రకారం చైల్డ్ కేర్ లీవ్ (CCL)కి అర్హులు.. వారి మొదటి ఇద్దరు పిల్లలకు 18 ఏళ్లు వచ్చే వరకూ సంరక్షణకు మొత్తం సేవలో గరిష్టంగా 730 రోజులు సెలవు తీసుకోవచ్చు. దివ్యాంగులైన పిల్లల విషయంలో వయోపరిమితి లేదు’ అని ఆయన లోక్‌సభకు ఇచ్చిన లిఖితపూర్వక సమాధానంలో తెలియజేశారు.

ఇది కేవలం కేంద్ర ప్రభుత్వ సర్వీసుల్లో పనిచేసే ఉద్యోగులకు మాత్రమే వర్తిస్తుంది. 6వ కేంద్ర వేతన సంఘం సిఫార్సు ఆధారంగా కేంద్రం మైనర్ పిల్లలను కలిగి ఉన్న మహిళా ఉద్యోగులకు గరిష్ట కాలం వరకు చైల్డ్ కేర్ లీవ్‌ను పొందేందుకు అనుమతిస్తూ ఉత్తర్వులు జారీ చేసింది. రెండేళ్లు (అనగా 730 రోజులు) వారి మొత్తం సేవలో ఇద్దరు పిల్లల పెంపకం కోసం సెలవులు వాడుకోవచ్చు.

రాష్ట్ర ప్రభుత్వ ఉద్యోగులకు ఆయా రాష్ట్రాలను బట్టి నిబంధనలు ఉంటాయి. ఆంధ్రప్రదేశ్‌లో 180 రోజులు, తెలంగాణలో 90 రోజుల చైల్డ్ కేర్ లీవ్ అమల్లో ఉంది. అలాగే, పిల్లలను దత్తత తీసుకునే ఉద్యోగినులకు దత్తత సెలవు 180 రోజుల వరకూ మంజూరు చేస్తారు. ఇద్దరు పిల్లలు లోపు ఉన్నవారికి ఇది వర్తిస్తుంది.

ఒక ఏడాదిలోపు వయసున్న వారిని దత్తత తీసుకున్నపుడు సెలవు ఇస్తారు. పురుష ఉద్యోగులకు ఇలాంటి సందర్భాల్లో పితృత్వ సెలవు 15 రోజులు ఇస్తారు. పెళ్లికాని పురుషులు, భార్య మరణించినవారు, విడాకులు తీసుకున్నవారికి ఇది వర్తిస్తుంది. పిల్లలను దత్తత తీసుకున్న ఆరు నెలలలోపు ఈ సెలవు వినియోగించుకోవాల్సి ఉంటుంది. సెలవు కాలానికి జీతం ఇస్తారు. పిల్లలకి 18 సంవత్సరాలు లేదా అంతకంటే ఎక్కువ వయస్సు ఉంటే చైల్డ్ కేర్ లీవ్ అనుమతించరు. మైనర్లు.. దత్తత తీసుకున్న పిల్లల పెంపకానికి ఈ సెలవులను తమ సర్వీసు కాలంలో వాడుకోవచ్చు.