ఏపీలో రేషన్‌కార్డులు ఉన్నవారికి,,,సెప్టెంబర్ నుంచి ఫోర్టిఫైడ్ బియ్యం పంపిణీ

ఏపీలో ఉన్న రేషన్‌కార్డులు ఉన్నవారికి జగన్ సర్కార్ మరో శుభవార్త చెప్పింది. సెప్టెంబర్‌ నుంచి ఫోర్టిఫైడ్‌ బియ్యాన్ని పంపిణీ చేస్తామని రాష్ట్ర పౌర సరఫరాలశాఖ మంత్రి కారుమూరి వెంకట నాగేశ్వరరావు తెలిపారు. అన్ని జిల్లాల్లో పీడీఎస్‌, ఎండీఎం, ఐసీడీఎస్‌ల ద్వారా అందజేస్తామన్నారు. ఫోర్టిఫైడ్‌ బియ్యంలో ఐరన్‌, పోలిక్‌ ఆవ్లుం, బి12 ఉంటాయని.. వీటి వలన ఐరన్‌ రక్తహీనతను నిరోధిస్తుందన్నారు. ఫోర్టిఫైడ్‌ రైస్‌ కెర్నల్స్‌ ను సాధారణ బియ్యంలో 1:100 నిష్పత్తిలో కలపటం వల్లన పోషక బియ్యం తయారవుతుంది అన్నారు. ఈ బియ్యం గర్భిణీలు, బాలింతలు, చిన్నారులు ఎక్కువగా తీసుకోవడం మంచిది అంటున్నారు మంత్రి.

ఈ ఫోర్టిఫైడ్‌ బియ్యంతో శరీరానికి పోషకాలు అందడంతో పాటుగా విటమిన్స్‌ అందుతాయన్నారు. ఫోర్టిఫైడ్‌ బియ్యంపై కొంత మంది కావాలని ప్రభుత్వం ప్లాస్టిక్‌ బియ్యం సరఫరా చేస్తున్నదని సోషల్ మీడియాలో ట్రోలింగ్‌ చేస్తున్నారని.. ఇది సరికాదన్నారు. సీఎం వైఎస్ జగన్ రాష్ట్ర ప్రజలకు ఆరోగ్యం చేకూర్చటానికి ఫోర్టిఫైడ్‌ బియ్యం పంపిణీ చేస్తున్నారన్నారు. ఇప్పటికే ఫైలట్‌ ప్రాజెక్ట్‌ గా ఉత్తరాంధ్ర, రాయలసీమ జిల్లాల్లో పంపిణీ చేస్తున్నామన్నారు.

ఇకపై రాష్ట్రవ్యాప్తంగా పీడీఎస్‌, ఎండీఎం, ఐసీడీఎస్‌ ద్వారా ఈ ఫోర్టిఫైడ్ బియ్యం అందించనున్నట్లు తెలిపారు. దేశంలో ఫోర్టిఫైడ్‌ బియ్యం పంపిణీ చేస్తున్న రాష్ట్రాల్లో ఏపీ మొదటి స్థానంలో ఉందన్నారు. ఈ నెల నుంచి ఐసీడీఎస్‌ ద్వారా గర్భిణీలకు, బాలింతలకు మూడు కేజీల పోషక బియ్యం ప్యాకెట్లను ఇంటికే రేషన్‌ పథకం కింద పంపిణీ చేస్తున్నామన్నారు. ఫోర్టిఫైడ్ బియ్య విషయంలో ఎలాంటి అపోహలు వద్దన్నారు. ప్రజల్లో అవగాహన కల్పించడానికి ఇప్పటికే పోస్టర్లు తయారు చేశామన్నారు. ప్రముఖ క్రీడాకారిణి పీవీ సింధుతో వీడియో కూడా రూపొందించి ప్రచారం చేస్తున్నామన్నారు.

ఫోర్టిఫైడ్ బియ్యంపై విస్తృత ప్రచారం ద్వారా ప్రజల్లో అవగాహన పెంచుతామన్నారు. ఫోర్టిఫైడ్‌ బియ్యంతో పాటుగా రేషన్‌ దుకాణాల్లో ఫోర్టిఫైడ్‌ కెర్నల్స్‌ కలిపిన గోధుమపిండి కూడా అందించటానికి ఏర్పాట్లు చేస్తున్నామన్నారు. దీనికి సంబంధించి త్వరలో టెండర్లు కూడా పిలవబోతున్నట్లు తెలిపారు. ఫోర్టిఫైడ్‌ బియ్యం ప్రతి ఒక్కరూ తీసుకుని అందరూ ఆరోగ్యంగా ఉండాలన్నదే ప్రభుత్వ లక్ష్యమన్నారు. ఫోర్టిఫైడ్‌ బియ్యం ప్లాస్టిక్‌ బియ్యం అనే అనుమానాలు ఉంటే.. మెడికల్‌ షాపుల్లో దొరికే అయోడిన్‌ను తెచ్చి ఫోర్టిఫైడ్‌ బియ్యంపై వేస్తే నీలం రంగులోకి మారతాయన్నారు. ప్లాస్టిక్‌ అయితే రంగు మారవన్నారు.

ఫోర్టిఫైడ్‌ బియ్యం నీళ్లలో నానబెట్టినప్పడు త్వరగా మెత్తబడతాయన్నారు. అదే ప్లాస్టిక్‌ మెత్తబడదని.. డెమో కూడా అందరికీ చూపించారు. ఫోర్టిఫైడ్‌ బియ్యంను పంజాబ్‌, హర్యానా, మహారాష్ట్ర తదితర రాష్ట్రాలతో పాటుగా ఏపీలో కూడా తయారు చేస్తున్నట్లు మంత్రి వివరించారు. రాయలసీమ జిల్లాల్లో రేషన్‌ పంపిణీలో బియ్యంతో పాటు రాగులు, జొన్నలు అందిస్తున్నామన్నారు. ఇకపై రాష్ట్రవ్యాప్తంగా పంపిణీ చేయనున్నామని మంత్రి తెలిపారు. సీజన్‌ లో 50 లక్షల మెట్రిక్‌ టన్నులు ధాన్యం సేకరించాలని లక్ష్యంగా నిర్ణయించామన్నారు. ధాన్యం రైతులకు ఐదు నుంచి ఆరు రోజుల్లో నగదు జమచేస్తామన్నారు. దళారీలకు అస్కారం లేకుండా కొనుగోళ్లు ఉంటాయన్నారు మంత్రి.