అనంతపురం జిల్లా వింత దొంగతనం,,,గతంలోనూ ఇదే తరహాలో చోరీలు

ఇన్నాళ్లూ రెక్కీ చేసి చోరీలకు పాల్పడే దొంగల్ని చూశాం.. తాళం వేసిన ఇళ్లను టార్గెట్ చేసి సొత్తు ఎత్తుకెళ్లే గ్యాంగుల్ని చూశాం.. ఇళ్ల బయట బైకుల్ని తీసుకెళ్లే దొంగల్ని చూసుంటాం. వీళ్లు మాత్రం అలా కాదు.. దొంగతనంలో కూడా కొత్త రూట్‌లో వెళ్లారు. బంగారం, డబ్బులు, విలువైన వస్తువులు కాకుండా కాస్త వెరైటీగా పందుల్ని ఎత్తుకెళ్లారు. వినడానికి విచిత్రంగా ఉన్న ఈ చోరీ అనంంతపురంలో జరిగింది. ముసుగులు ధరించి మరీ వచ్చారు.. పందుల్ని ఎత్తుకెళ్లారు.

అమిద్యాలకు చెందిన పుల్లమ్మ పందులను పెంచుకుంటూ జీవనం సాగిస్తున్నారు. ఊర్లోనే రోడ్డు పక్కన పందుల దొడ్డి ఉంది.. గురువారం అర్థరాత్రి సమయంలో కొందరు గుర్తు తెలియని దుండగులు ముసుగులు ధరించి వచ్చారు. రోడ్డు మీద వరకు ఆ పందులను తొలుకొచ్చారు.. తమ వెంట తెచ్చుకున్న వాహనంలోకి ఎక్కించి అక్కడి నుంచి వెళ్లిపోయారు. 30 పందుల వరకు ఎత్తుకెళ్లారు. తెల్లవారిన తర్వాత పుల్లమ్మ పందుల దొడ్డికి రాగా.. అక్కడ పందులు కనిపించకపోవడంతో అవాక్కయ్యారు.

పందులు కనిపించకపోవడంతో పుల్లమ్మ ఆందోళన చెందారు. దొడ్డిలో ఉన్న పందుల్ని ఎవరో ఎత్తుకెళ్లారని పుల్లమ్మ ఇరుగుపొరుగువారికి స్థానికులకు చెప్పి వాపోయారు. గ్రామ శివార్లలో ఏర్పాటు చేసిన సీసీ కెమెరాను పరిశీలిస్తే.. చోరీ జరిగినట్లు గుర్తించారు. కొందరు దుండగులు ముఖానికి ముసుగులు వేసుకుని వాహనంలో వచ్చినట్లు గుర్తించారు. దొంగలు తీసుకొచ్చిన వాహనం నెంబర్ సీసీ కెమెరాలో రికార్డ్ అయినట్లు తెలుస్తోంది. బాధితురాలు పోలీసులకు ఫిర్యాదు చేయగా.. కేసు నమోదు చేసి సీసీ ఫుటేజ్ ఆధారంగా దర్యాప్తు చేస్తున్నారు. ఇప్పటి వరకు బంగారం, డబ్బులు, విలువైన వస్తువుల్ని ఎత్తుకెళ్లిన దొంగలు.. ఈసారి మాత్రం పందుల్ని చోరీ చేయడం చర్చనీయాంశమైంది. ఇదేం కక్కుర్తి పందుల్ని కూడా బతకనివ్వరా బాబూ అంటూ స్థానికులు అవాక్కయ్యారు.

2019లో కూడా గన్నవరం ప్రాంతంలో పందుల్ని ఇలానే కొందరు వ్యక్తుులు ఎత్తుకెళ్లిన ఘటన అప్పట్లో చర్చనీయాంశం అయ్యింది.

అక్కడ ఏకంగా కొన్ని వారాల వ్యవధిలో సుమారు 200 పందుల్ని ఎత్తుకెళ్లారట. మళ్లీ ఇప్పుడు అనంతపురం జిల్లాలో ఇప్పుడు 30 పందుల్ని దొంగలు ఎత్తుకెళ్లారు. దీంతో పందులకు మార్కెట్‌లో ఇంత డిమాండ్ ఉందా అనే చర్చ జరుగుతోంది. వాస్తవానికి కొందరు సీమ పందులతో ఫార్మ్‌లన నిర్వహిస్తుంటారు.. కొందరు నాటు పందుల్ని పెంచుకుంటూ జీవనం సాగిస్తుంటారు. కొందరు దొంగలు వీటిపై కన్నేసి ఎత్తుకెళుతున్నారని అనుమానాలు వ్యక్తమవుతున్నాయి. మొత్తం మీద పందుల దొంగతనం ఇప్పుడు హాట్ టాపిక్ అవుతోంది.