పవన్ చేసిన ఆరోపణలపై ,,,మంత్రి గుడివాడ అమర్‌నాథ్ ఓపెన్ ఛాలెంజ్

విస్సన్నపేట భూములకు సంబంధించి తనపై వచ్చి భూ ఆరోపణలపై మంత్రి గుడివాడ అమర్‌నాథ్ క్లారిటీ ఇచ్చారు. విస్సన్నపేటలో తన పేరిట 600 ఎకరాల భూమి ఉన్నట్లు జనసేన అధినేత పవన్ కళ్యాణ్ నిరూపిస్తే ఈ ప్రెస్‌మీట్‌కు వచ్చిన ఒక్కో విలేఖరికి ఒక్కో ఎకరం ఇస్తానంటూ తెలిపారు. ఇంకా మిగిలితే ఆ భూమి జనసేన పార్టీకి రాసిస్తానంటూ ఛాలెంజ్ చేశారు. 'పవన్ కల్యాణ్ విశాఖ పర్యటనలో చేసిన వ్యాఖ్యల్లో విషం, విద్వేషం కనిపించాయి. పవన్ ప్రసంగంలో విషయం ఉండదు. జగన్ మోహన్ రెడ్డి ప్రభుత్వంపై విషం కక్కడం మాత్రమే ఆయన ప్రసంగంలో ఉంటుంది. రుషికొండలో ఏపీటీడీసీ స్థలంలో ప్రభుత్వ నిర్మాణంపై ప్రశ్నించే మీరు ఒక్కసారి ఎదురుగా గీతం యూనివర్సిటీని చూసి ఉంటే బాగుండేది. గీతంలో పెద్దఎత్తున జరిగిన భూకబ్జాను కనీసం పట్టించుకోలేదు. చంద్రబాబు కోసం కోతిలా పవన్ గెంతుతున్నారు. టీడీపీ హయాంలో పెద్దఎత్తున జరిగిన అక్రమాలపై అప్పటి మంత్రులే ఫిర్యాదు చేశారు. టీడీపీ అక్రమాలపై పవన్ ఎందుకు నోరు మెదపరు. రుషికొండపై గతంలో రిసార్ట్స్ ఉన్నాయి. రిసార్ట్స్ మరమత్తులకు గురి కావడంతో అధికారుల నిర్ణయంతో కొత్త భవనం జరుగుతోంది' అని విమర్శించారు.

'రామానాయుడు స్టూడియో, వెంకటేశ్వరస్వామి ఆలయం, వెల్‌నెస్ సెంటర్లు కొండపై ఉన్నాయి. చిరంజీవి జూబ్లీహిల్స్‌లో ఇల్లు ఎక్కడ కట్టారు. రుషికొండలో ప్రభుత్వ భూమిలో ప్రభుత్వం కోసం అన్ని అనుమతులతో నిర్మాణం జరిగితే పవన్ దుష్ప్రచారం చేస్తున్నారు. స్క్రిప్ట్ చదవడం, పక్కవారు చెప్పే మాటలు ప్రసంగించడం పవన్‌కు అలవాటు. ఏమంటే కేంద్రానికి ఫిర్యాదు చేస్తామన్నారు. వెళ్లి మీ అత్తారిల్లు రష్యా అధ్యక్షుడు పుతిన్‌కి చెప్పు. ఏపీలో 175 సీట్లకు పోటీ చేస్తానని ఎప్పుడు చెప్పరు. చంద్రబాబుతో కలిసి బీచ్ రోడ్, విసన్నపేటలో తిరగొచ్చు కదా.. వేర్వేరుగా తిరగడం ఎందుకు.  చంద్రబాబు కరకట్టపై నిర్మాణం చేపట్టవచ్చు.. మేము అన్ని అనుమతులతో నిర్మాణం చేపడితే ఎందుకు రాద్దాంతం చేస్తారు' అని అమర్‌నాథ్ తెలిపారు.

'పేదలకు ఇళ్ల స్థలాలు రాకుండా చంద్రబాబు అడ్డుకుంటే పవన్ ఎందుకు మాట్లాడవు. అమరావతి ఓ కులానికి చెందిన ప్రాంతమని గతంలో అన్న మీకు ఇప్పుడు విశాఖపై ఎందుకు ద్వేషం. గాజువాక ప్రజలకు పవన్ సమాధానం చెప్పాలి. ఎన్నికల్లో ఓడినా, గెలిచినా అక్కడే ఉంటానని మీరు చెప్పిన మాట మర్చిపోయారు. లేపాక్షి ఉత్సవాలకు చిరంజీవిని పిలవడానికి స్టేటస్ ఉండాలని బాలకృష్ణ అన్న మాటలు గుర్తు లేవా?' అని అమర్‌నాథ్ ప్రశ్నించారు.