అత్యాధునిక హైఎనర్జీ లేజర్ ఆయుధం రూపకల్పన,,,విప్లవాత్మక పరిణామంగా పేర్కొంటున్న చైనా నివేదిక

సైనిక ఆయుధ సాంకేతికతలో చైనా మరో మైలురాయిని అందుకుంది. సరికొత్త లేజర్ ఆయుధం పీపుల్స్ లిబరేషన్ ఆర్మీ చేతికి వచ్చినట్టు సౌత్ చైనా మార్నింగ్ పోస్ట్ నివేదిక పేర్కొంది. చాంగ్షాలోని నేషనల్ యూనివర్శిటీ ఆఫ్ డిఫెన్స్ టెక్నాలజీ శాస్త్రవేత్తలు.. లేజర్‌లను శక్తివంతం చేసే అత్యాధునిక శీతలీకరణ వ్యవస్థను అభివృద్ధి చేసినట్లు తెలిపింది. తాము అభివృద్ధి చేసిన ఈ లేజర్‌ వ్యవస్థ నిర్విరామంగా ఎంత దూరమైనా ప్రయాణిస్తుందని.. ఇది యుద్ధాల తీరుతెన్నులను పూర్తిగా మార్చేస్తుందని శాస్త్రవేత్తలు బల్లగుద్ధి మరీ చెబుతున్నారు.

హైఎనర్జీ లేజర్లను వేడెక్కకుండానే ఈ కూలింగ్‌ సిస్టమ్‌ అధిక శక్తిని అందిస్తుందని పేర్కొంది. అంటే ఆయుధాలు తమ లేజర్‌ కిరణాలను వాటికి అవసరమైనంత దూరం ప్రసరింపజేయవచ్చని తెలిపింది. కదన రంగంలో హైఎనర్జీ లేజర్లను ఉపయోగించే సమయంలో అనవసరంగా వేడెక్కకుండా ఈ వ్యవస్థ అడ్డుకొంటుందని నివేదిక వెల్లడించింది. ‘‘ఇది హైఎనర్జీ లేజర్‌ వ్యవస్థల్లో ఓ విప్లవాత్మక పరిణామం’’ అని ఆయుధ రూపకల్పలో పాల్గొన్న నేషనల్‌ డిఫెన్స్‌ టెక్నాలజీ శాస్త్రవేత్త యువాన్‌ షెంగ్ఫూ వ్యాఖ్యానించారు. ఈ మేరకు ఆగస్టు 4న ‘ఆక్టా ఆప్టిక్‌ సినికా’ అనే చైనా జర్నల్‌లో పరిశోధనా పత్రాన్ని ఆయన ప్రచురించారు.

వాస్తవానికి లేజర్‌ ఆయుధాలను ఉపయోగించే సమయంలో పుట్టుకొచ్చే ఉష్ణం అతిపెద్ద సవాల్. ఇది పలు సాంకేతిక సమస్యలకు కూడా కారణమవుతోంది. ఇప్పటికే అమెరికా హైగ్రేడ్‌ లేజర్‌ వ్యవస్థ అభివృద్ధికి ప్రయత్నిస్తోంది. నేవీ అడ్వాన్స్‌డ్‌ కెమికల్‌ లేజర్‌, మిడిల్‌ ఇన్ఫ్రారెడ్‌ అడ్వాన్స్‌డ్‌ కెమికల్‌ లేజర్‌, టాక్టికల్‌ హైఎనర్జీ లేజర్‌, స్పేస్‌ బేస్డ్‌ లేజర్‌ వంటివి వీటిల్లో ఉన్నాయి. ఇప్పటికే కొన్నింటిని క్షేత్రస్థాయిలో అమెరికా పరీక్షించింది. ఈ వ్యవస్థను హైపర్‌సానిక్‌ క్షిపణుల విధ్వంసానికి కూడా వినియోగించాలనే ఆలోచనలో ఉంది.

కానీ, ఈ లెజెర్ల పరిధి కేవలం కొన్ని కిలోమీటర్లు మాత్రమే. కానీ, తాజాగా డ్రాగన్ కనుగొన్న లేజర్ సాంకేతికత విధ్వంసక శక్తిని మరింత పెంచనుంది. ఈ నేపథ్యంలో నిపుణులు ఈ రంగంలో పరిణామాలను నిశితంగా గమనిస్తున్నారు. యూకే మాజీ సైనిక అధికారి స్టీవ్ వీవర్ ట్విట్టర్‌లో స్పందిస్తూ.. ‘వారు చెబుతున్నట్టు వేడి, వక్రీకరణ సమస్యలను అధిగమించి.. అమెరికా వైఫల్యాలను పరిగణనలోకి తీసుకుంటే ఇది అతిపెద్ద పురోగతి’ అని అన్నారు.

అయితే, ‘అధిక ఖర్చుతో కూడుకున్న సాంప్రదాయ క్షిపణి ఆధారిత వ్యవస్థల కంటే ఇది ఎక్కువ సామర్థ్యాన్ని కలిగి ఉంటుంది.. ఎందుకంటే దీనికి ఖరీదైన ఆయుధాలు అవసరం లేదు.. త్వరగా రీఛార్జ్ చేయొచ్చు.. అవసరమైతే, స్పేస్‌ఎక్స్ స్టార్‌లింక్ వంటి ఉపగ్రహాలపై లేజర్ ఆయుధాలను ఉపయోగించాలని చైనా యోచిస్తోంది’ అని చైనా మార్నింగ్ పోస్ట్ నివేదిక తెలిపింది.

నాసా ప్రకారం.. లేజర్ అనేది కృత్రిమంగా సృష్టించిన ఒక ప్రత్యేక కాంతి. ఇది ఇరుకైన కాంతి పుంజాన్ని ఉత్పత్తి చేస్తుంది. దీనిలో కాంతి తరంగాలు చాలా సారూప్య తరంగదైర్ఘ్యాలను కలిగి ఉంటాయి. లేజర్ కాంతి తరంగాలన్నీ ఒకే వరుసలో ప్రయాణిస్తాయి. ఈ ప్రత్యేక లక్షణం లేజర్ కిరణాలను చాలా శక్తివంతమైందిగా, చాలా ప్రకాశవంతంగా ఉండేలా చేస్తుంది. ఇవి చాలా దూరం ప్రయాణించి... చిన్న చిన్నప్రదేశాల్లో చాలా శక్తిని కేంద్రీకరించగలవు. కానీ అణువులకు అధిక శక్తి క్రిస్టల్ లేదా గ్యాస్ వంటి మాధ్యమం ద్వారా పుంజం ఉత్పత్తి అవుతుంది. గాలి ద్వారా ప్రయాణించే లేజర్ దాని మార్గంలో వాయువును వేడెక్కించి అల్లకల్లోలాన్ని సృష్టిస్తుంది.